រហូតមកដល់ព្រឹកថ្ងៃទី២៤ ខែធ្នូ ឆ្នាំ២០១៨ ជនរងគ្រោះបាត់បង់ជីវិតដោយសាររលកយក្សស៊ូណាមិនៅក្នុងប្រទេសឥណ្ឌូនេស៊ីបានកើនឡើងរហូតដល់២៨១នាក់ហើយ ខណៈដែល១០១៦នាក់ផ្សេងទៀតរងរបួស ។
លោក Sutopo Purwo Nugroho អ្នកនាំពាក្យគ្រោះមហន្តរាយឥណ្ឌូនេស៊ីថ្លែងប្រាប់ភ្នាក់ងារព័ត៌មានAP ដោយបន្ថែមថា ជនរងគ្រោះបាត់បង់ជីវិតអាចកើនឡើងច្រើនជាងនេះទៀត ខណៈជនរងគ្រោះ៥៧នាក់នៅបាត់ខ្លួន ។
សូមរំលឹកថា កាលពីយប់ថ្ងៃសៅរ៍សប្តាហ៍មុន ខណៈដែលមាត់ច្រាំងសមុទ្រមានសភាពអ៊ូអរដោយការប្រគំតន្រីផងដែរ ស្រាប់តែមានរលកយក្សស៊ូណាមិវាយប្រហារដោយគ្មានសញ្ញាប្រាប់ជាមុន ធ្វើឲ្យគ្រប់យ៉ាងត្រូវរលាយខ្សុលដូចអំពិលត្រូវទឹក ។
អ្នកជំនាញបញ្ជាក់ថា រលកយក្សស៊ូណាមិកើតឡើងដោយមូលហេតុ បំណាក់ដីក្រោមបាទសមុទ្រ បន្ទាប់ពីភ្នំភ្លើង Anak Krakatau កម្រើកសកម្មភាព បង្កជារលកយក្សស៊ូណាមិវាយប្រហារនៅច្រកសមុទ្រ Sunda Strait តាមបណ្តោយឆ្នេរភាគខាងលិចកោះ ជ្វា និងភាគខាងត្បូងកោះស៊ូម៉ាត្រា ។ វាបានវាយប្រហារចូលភូមិឋានប្រជាពលរដ្ឋនៅវេលាម៉ោងរាត្រីស្ងាត់ជ្រងំ មិនបានព្រមានឲ្យដឹងជាមុននោះឡើយ ៕
