ភ្នំភ្លើងនៃប្រទេសឥណ្ឌូនេស៊ី Anak Krakatau បានស្ថិតក្នុងកម្រិតប្រកាសអាសន្ន ពណ៌ក្រហម ដែលអាជ្ញាធរសង្ស័យថា អាចផ្ទុះសារជាថ្មី បន្ទាប់ពីការផ្ទុះកាលពីសប្តាហ៍មុនបង្កឲ្យមានរលកយក្សស៊ូណាមិ ។ ពេលនេះ ជើងហោះហើរទាំងឡាយ មិនត្រូវបានអនុញ្ញាតឲ្យឆ្លងកាត់តំបន់ភ្នំភ្លើងខាងលើនេះទេ ។
រលកកម្ពស់ប្រហែល៥ម៉ែត្របណ្តាលមកពីភ្នំភ្លើងខាងលើនេះ កាលពីសប្តាហ៍មុ បង្កឲ្យមានរលកយក្សវាយប្រហារនៅច្រកសមុទ្រ Sunda Strait របស់ប្រទេសឥណ្ឌូនេស៊ី ។ ការិយាល័យអង្គការសហប្រជាជាតិ ក្នុងសេចក្តីថ្លែងការណកាលពីថ្ងៃទី២៦ ខែធ្នូ បញ្ជាក់ថា មនុស្ស៤៣០នាក់បាត់បង់ជីវិត និង១៤៩៥នាក់រងរបួសធ្ងន់ និងស្រាល ។
ភ្នាក់ងារចរាចរណ៍ផ្លូវអាកាសឥណ្ឌូនេស៊ី នៅថ្ងៃទី២៧ ធ្នូ បានប្រកាសថា ជើងហោះហើរទាំងអស់ត្រូវផ្លាស់ប្តូរផ្លូវហោះហើរ ដោយអាស្រ័យថា ភ្នំភ្លើង Krakatau មានព្រួសផេះ និងស្ថិតក្នុងកម្រិតប្រកាសអាសន្នពណ៌ក្រហម ។
ឥណ្ឌូនេស៊ីជាប្រទេសមួយដែលមានភ្នំភ្លើងច្រើន និងតែងតែកើតមានការរញ្ជួយដីជាញឹកញាប់ដោយសារតែប្រទេសនេះ ស្ថិតនៅចន្លោះអង្គត់នៃផ្តិតមហាសមុទ្រប៉ាស៊ីហ្វិក ។
កាលពីខែកក្កដា និងសីហា ឆ្នាំ២០១៨ រញ្ជួយដីមួយបានវាយប្រហារដែនកោះទេសចរណ៍ Lombok បណ្តាលឲ្យស្លាប់មនុស្សយ៉ាងរង្គាល ។ ក្នុងខែកញ្ញា ដែនកោះ Sulawesi ការរញ្ជួយដី និងរលកយក្សស៊ូណាមិវាយប្រហារបណ្តាលឲ្យមនុស្សយ៉ាងតិច២០០នាក់បាត់បង់ជីវិត ៕
