នរៈ សិរីវិទ្យា រំពឹងខ្ពស់ក្រោយកុងត្រានៅ Town និងSun Super Models

ចែករំលែក៖

ភ្នំពេញ៖ ក្រោយប្រឡូកក្នុងវិស័យសិល្បៈជិត៤ឆ្នាំ នរៈ សិរីវិទ្យាចាប់ផ្តើមទទួលបានជោគជ័យខ្ពស់ ទាំងការសម្តែងបង្ហាញម៉ូត ច្រៀងនិង ការងារមនុស្សធម៌ ក្នុងបុព្វហេតុសង្គមផងដែរ ។ កាន់តែធ្វើឲ្យគេសម្លឹងមើលឃើញពីភាពជោគជ័យកាន់តែច្បាស់ ក្នុងពេលដ៏ខ្លីខាងមុខ ក្រោយពីតារាវ័យក្មេងរូបនេះបានចុះកិច្ចសន្យាសម្តែង និងបង្ហាញម៉ូត សម្រាប់ផលិតកម្ម ថោន (Town) និងក្រុមបង្ហាញម៉ូត Sun Super Models ។

12325461_760242804079626_2112364104_n

នរៈ សិរីវិទ្យា បានធ្វើឲ្យអ្នកគាំទ្រខ្លួនកាន់តែច្រើនក្រោយពីទទួលបានការសម្តែង ច្រៀងរាំ ជាហូរហែតាមកញ្ចក់ទូរទស្សន៍ និងតាមរយៈការសម្តែង បទចម្រៀងល្បីៗជាច្រើនរបស់ផលិតកម្ម ថោន។ ការទទួលបានការចុះកិច្ចសន្យាការសម្តែង និងច្រៀងមួយចំនួននៅលើកញ្ចាក់ទូរទស្សន៍បានធ្វើឲ្យនរៈ សិរីវិទ្យា ទទួលបានការគាំទ្រពីទស្សនិកជន ។ ថ្មីៗនេះមានការងារសង្គម ជាច្រើនដែលតារាសម្តែងវ័យ២២ឆ្នាំរូបនេះ ស្ម័គ្រចិត្តជួយ ដូចជាការចុះអប់រំផ្សព្វផ្សាយកម្មវិធីអប់រំបញ្ហាសុខភាពនៅតាមគ្រឹះស្ថានសិក្សា តំបន់រោងចក្រ ដែលមានកម្មករកម្មការិនីកាត់ដេរ និងសហគមន៍នានាផងដែរ។

ការក្តាប់បានតំណែងនៅ Town និងSun Super Models នឹងក្លាយជាក្តីរំពឹងខ្ពស់ ខណៈដែលជាឱកាសដ៏សម្បើមសម្រាប់សាងឈ្មោះក្នុងចង្កោមសិល្បៈ ហើយក៏មានសិល្បករជាច្រើនប្រាថ្នាចង់បាន ។

ផលិតកម្មថោនដែលគេដឹងថា នឹងមានគម្រោងផលិតខ្សែភាពយន្តខ្នាតធំជាច្រើននៅពេលខាងមុខបន្ថែមលើផ្នែកផលិតបទចម្រៀង ខណៈដែល Sun Super Models គឺជាក្រុមហ៊ុនបង្ហាញម៉ូតធំមួយ ក្នុងចំណោមក្រុមបង្ហាញម៉ូតល្បីៗ នៅកម្ពុជា ដូចនេះតារារូបនេះនឹងមិនពិបាកក្នុងការចាប់បានកេរឈ្មោះលេចធ្លោរក្នុងចង្កោមសិល្បៈឡើយ។

នរៈ សិរីវិទ្យា បញ្ជាក់ថា ការទទួលបានការងារជាច្រើននៅផលិតកម្មថោន និងចុះកិច្ចសន្យារយៈពេល៥ឆ្នាំនេះគឺលោកពិតជារំភើបនិងជឿជាក់សម្រាប់កសាងភាពល្បីល្បាញបាន ។ តារាវ័យក្មេងសំឡេងពិរោះរូបនេះ នៅមិនទាន់បង្ហើបនៅឡើយទេថា នឹងមានការងារអ្វីខ្លះដែលផលិតកម្ម និងក្រុមបង្ហាញម៉ូតខាងលើផ្តល់ឲ្យទេ។ ទោះជាយ៉ាងណាលោកនៅតែអាចបន្តឡើងច្រៀងនៅតាមកម្មវិធីប្រគុំតន្ត្រី តាមស្ថានីយទូរទស្សន៍ ការសម្តែងឈុតផ្សព្វផ្សាយពាណិជ្ជកម្ម និងកម្មវិធីអប់រំនានាជាធម្មតាលើកលែងតែការសម្តែងសម្រាប់ផលិតកម្មផ្សេង។

គួរបញ្ជាក់ដែរថាតារាសម្តែងនរៈ សិរីវិទ្យាត្រូវបានគេចាប់ផ្តើមស្គាល់ក្នុងខ្សែភាពយន្តអប់រំរបស់មណ្ឌលព័ត៌មានស្ត្រីកម្ពុជារឿង“ក្របីរាល” ពិសេសលើកិច្ចការងារសសង្គមជាច្រើនបូករួមទាំងការចុះផ្សព្វផ្សាយចំណេះដឹងផ្សេងនៅតាមមូលភូមិឃុំ និងតំបន់រោងចក្រជាដើម ។ តារារូបនេះនឹងត្រូវគេរំពឹងថា អាចឈរក្នុងតំណែងជួរមុខក្នុងពេលដ៏ខ្លីខាងមុខនេះ ៕

12351034_761140610656512_2105161561_n