ភ្នំពេញ៖ បុរសម្នាក់បើកបរម៉ូតូក្នុងស្ថានភាពស្រវឹង បានជ្រុលទៅបុករថយន្តដែលចតចោលគ្មានសណ្ដាប់ធ្នាប់បណ្ដាលឲ្យដួលរងរបួសធ្ងន់ បង្កការភ្ញាក់ផ្អើលកាលពីវេលាម៉ោង១០និង២០នាទីយប់ថ្ងៃទី៤ ខែធ្នូ ឆ្នាំ២០១៥ ត្រង់ចំនុចមុខផ្ទះលេខ៨៥ ផ្លូវ៥៨P ស្ថិងក្នុងភូមិដីថ្មី សង្កាត់ភ្នំពេញថ្មី ខណ្ឌសែនសុខ។
បុរសអ្នកបើកបរម៉ូតូត្រូវគេស្គាល់ឈ្មោះសុខ ចាន់ អាយុ២៧ឆ្នាំ ស្រុកកំណើតក្នុងភូមិព្រៃប្រសព្វកណ្ដាល ឃុំព្រៃប្រសព្វ ស្រុកព្រៃប្រសព្វ ខេត្តក្រចេះ ជិះម៉ូតូម៉ាកវ៉េវ សេរីឆ្នាំ២០១៥ពណ៌ខ្មៅលាយក្រហមពាក់ស្លាកលេខភ្នំពេញ 1FG 7970 បើកបរក្នុងទិសដៅពីលិចទៅកើតក្នុងស្ថានភាពស្រវឹងជោកជាំ។ រីឯរថយន្តដែលចតចោលម៉ាកហាយឡែនឌ័រ ពណ៌ខ្មៅ ពាក់ស្លាកលេខ ភ្នំពេញ 2R 3989។
តាមប្រភពព័តមានពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់ បើកបរក្នុងស្ថានភាពស្រវឹងជោកក្នុងទិសដៅពីលិចទៅកើត។ លុះមកដល់ចំនុចកើតហេតុ ដោយសារតែនៅតំបន់នោះងងឹតផង ជ្រុលទៅបុកចំពីក្រោយរថយន្ត ដែលឈប់សំចតនៅក្បែរចិញ្ចើមផ្លូវ ចំពីក្រោយពេញទំហឹងលាន់សូរដូចរន្ទះ បណ្ដាលដួលម៉ូតូម្ចាស់ហោះចេញពីម៉ូតូ ទៅបោកបែកក្បាលនិងកញ្ចក់ខាងក្រោយនៃរថយន្តរងរបួសធ្ងន់។ រីឯម៉ូតូទទួលការខូចខាតផ្នែកខាងមុខទាំងស្រុង។ ចំណែករថយន្តវិញខូចខាតបែកកញ្ចក់ខាងក្រោយខ្ទេចទាំងស្រុង ។
ក្រោយពេលកើតហេតុជនរងគ្រោះ ត្រូវបានបញ្ជូនទៅកាន់មន្ទីរពេទ្យឯកជន ដែលនៅក្បែរនោះ។ រីឯម៉ូតូនិងរថយន្តត្រូវបានយកទៅរក្សាទុកនៅអធិការដ្ឋានខណ្ឌសែនសុខ ដើម្បីរង់ចាំការដោះស្រាយនៅពេលក្រោយ៕
ដោយ៖ វិបុល
