ខេត្តក្រចេះ: សមត្ថកិច្ចនគរបាលស្រុកស្នួលបានឃាត់ខ្លួនយុវជនម្នាក់ ដែលបានប្រើហិង្សាដោយប្រើកាំបិតផ្គាក់កាប់មកលើជនរងគ្រោះម្នាក់បណ្តាលឲ្យរងរបួសធ្ងន់ ដោយសារតែខឹងជនរងគ្រោះនិងគ្នីគ្នាមួយចំនួនទៀតផឹកស៊ីនិយាយឮៗថ្លង់រំខានដល់រូបគេដែលនៅផ្ទះក្បែរគ្នាដេកពួនមិនបាន ។
ហេតុការណ៍មានអំពើហិង្សាដាក់គ្នាបណ្តាលឲ្យមនុស្សរងរបួសនេះកើតឡើងកាលពីយប់ថ្ងៃ ពុធ ៣ កើត ខែបុស្ស ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី៩ ខែមករា នៅ ភូមិក្បាលស្នួល ឃុំស្នួល ស្រុកស្នួល។
មន្រ្តីនគរបាលស្រុកស្នួលបានឲ្យដឹងថាយុវជនដៃដល់ត្រូវបាននគរបាលស្រុកស្នួលចុះទៅ ឃាត់ខ្លួនបានភ្លាមៗ ឈ្មោះ ភី ពេជ្រ អាយុ២៥ឆ្នាំ រស់នៅចំណុចកើតហេតុខាងលើ បានយកកាំបិតផ្គាក់កាប់ទៅលើជនរងគ្រោះម្នាក់អាយ២២ឆ្នាំ ដែលកំពុងផឹកស៊ីនៅផ្ទះក្បែរគ្នា បណ្តាលឲ្យរងរបួសត្រង់ដៃ នៅពេលជនរងគ្រោះបានយកដៃទៅរងនិងផ្លែកាំបិតដែលបានកាប់ប្រហារពីជនដៃដល់ ព្រោះតែខឹង នឹងជនរងគ្រោះ ផឹកស៊ីឡូឡាហាមមិនស្តាប់ ។
បន្ទាប់មកនគរបាលមូលដ្ឋានទៅដល់ចាប់ជនសង្ស័យ និងរឹបអូសវត្ថុតាងកាំបិតផ្គាក់មួយដើម ដើម្បីកសាងសំណុំរឿងចាត់ការតាមច្បាប់ ៕
