ខេត្តកោះកុង ៖ វត្តមានយានយន្តអត់ពន្ធនៅពាសពេញផ្ទៃប្រទេសមិនត្រឹមតែបង្ហាញនូវការមិនស្មើភាពគ្នានៅក្នុងសង្គមអ្នករកស៊ីស្របច្បាប់ទេ ថែមទាំងធ្វើឲ្យបាត់បង់ចំណូលពន្ធរបស់រដ្ឋយ៉ាងសន្ធឹកសន្ធាប់ទៀតផង។
ប្រភពព័ត៌មានពីអាជ្ញាធរថៃឱ្យដឹងថា នៅថ្ងៃទី១៦ ខែមករា ឆ្នាំ២០១៩ ទាហានប៉ារ៉ាថៃបានបង្រ្កាប ម៉ូតូស៊េរីថ្មី១១គ្រឿង របស់ឈ្មួញខ្មែរ ដឹកតាម ទូក២គ្រឿង ផ្លូវសមុទ្រ នៅខេត្ត ខ្លងយ៉ៃ ប្រទេសថៃ បម្រុងនាំចូលតាមខេត្តកោះកុង។
ក្នុងប្រតិបត្តិការបង្រ្កាប ទាហានថៃចាប់ឃាត់ខ្លួនម្ចាស់ទូក២នាក់ជនជាតិខ្មែរ និងទូក២គ្រឿង។សេចក្តីរាយការណ៍ឱ្យដឹងទៀតថាបទល្មើសនាំចូលម៉ូតូ និងទំនិញគេចពន្ធកំពុងកើត មានយ៉ាងច្រើន ឈ្មួញបង្វែពីដឹកតាមច្រកព្រំដែនផ្លូវគោក ទៅតាមច្រកក្នុងដែនសមុទ្រ រវាងប្រទេសកម្ពុជា និងថៃ នោះវិញ ពីព្រោះមានភាពងាយស្រួលក្នុងការប្រព្រឹត្តបទល្មើសគេចពន្ធខុសច្បាប់។
សមត្ថកិច្ចថៃអះអាងថា ការរកស៊ីនាំម៉ូតូគេចពន្ធទាំងនេះចូល សង្ស័យថាជារបស់ឈ្មួញដែលធ្លាប់នាំចូលម៉ូតូ តាមច្រកព្រំដែន កម្ពុជានិងថៃ នៅទិសពាយព្យនៃប្រទេសកម្ពុជា៕ ដោយ៖ជាយក្រុង
