ចៅក្រមស៊ើបសួរ នៃសាលាដំបូងរាជធានីភ្នំពេញដោះលែងថៅកែហាងកែសម្ផស្ស «ឌែម៉ូគ្លីនិក» និងអ្នកគ្រូពេទ្យវះកាត់ ករណីជំរិតទារប្រាក់ពីអតិថិជន នាំឲ្យកក្រើកពេញ Facebook

ចែករំលែក៖

ភ្នំពេញ៖ ថៅកែហាងកែសម្ផស្ស «ឌែម៉ូគ្លីនិក» និងអ្នកគ្រូពេទ្យវះកាត់ម្នាក់ទៀត កាលពីព្រលប់ថ្ងៃទី២៤ ខែមករា ឆ្នាំ២០១៩ម្សិលមិញ ត្រូវបានចៅក្រមស៊ើបសួរ នៃសាលាដំបូងរាជធានីភ្នំពេញ សម្រេចដោះលែង ឲ្យមានសេរីភាពចេញពីពន្ធនាគារ (PJ) វិញហើយ។​ នេះបើយោងតាមមន្ត្រីតុលាការ ទម្លាយឲ្យដឹងនៅព្រឹកថ្ងៃទី២៥ ខែមករា ឆ្នាំ២០១៩នេះ បង្កអោយមានភាពសង្ស័យនឹងការទទួលប្រយោជន៍ណាមួយ។

កាលពីព្រលប់ថ្ងៃទី២៤ ខែមករា ឆ្នាំ២០១៩ម្សិលមិញ គឺ លោក ម៉ុង មុន្នីសោភា ចៅក្រមស៊ើបសួរ នៃសាលាដំបូងរាជធានីភ្នំពេញ បានសម្រេចដោះលែងថៅកែហាងកែសម្ផស្ស «ឌែម៉ូគ្លីនិក» និងអ្នកគ្រូពេទ្យវះកាត់ម្នាក់ទៀត ឲ្យមានសេរីភាពចេញពីពន្ធនាគារ (PJ) ។ បន្ទាប់ពីអ្នកទាំងពីរត្រូវ បានបង្គាប់ឲ្យឃុំខ្លួនដាក់ពន្ធនាគារ PJ បណ្តោះអាសន្ន កាលពីរសៀលថ្ងៃទី០៥ ខែមករា ឆ្នាំ២០១៩កន្លងទៅ។

សូមរំលឹកថា ជនត្រូវចោទទាំង២នាក់នេះមានឈ្មោះ ហូវ ដាណេ ជាថៅកែហាងកែសម្ផស្ស «ឌែម៉ូគ្លីនិក» និងឈ្មោះ ពៅ ស៉ីណាត ជាគ្រូពេទ្យវះកាត់។ កាលពីរសៀលថ្ងៃទី៤ ខែមករា ឆ្នាំ២០១៩ អ្នកទាំងពីរត្រូវបានលោក សឿន មុនីរ័ត្ន ព្រះរាជអាជ្ញារងអមសាលាដំបូងរាធានីភ្នំពេញ ចោទប្រកាន់ពីបទ «ប៉ះពាល់ដល់សិទ្ធខាងរូបភាពនៃបុគ្គល» តាមមាត្រា៣០២នៃក្រមព្រហ្មទណ្ឌ, «បទកំហែងយក» តាមមាត្រ៣៦៣ និងមាត្រា៣៦៤នៃក្រមព្រហ្មទណ្ឌ និង «បទការគំរាមកំហែងហែកកេរ្តិ៍» តាមមាត្រា២៧២ និងមាត្រា២៧៣នៃក្រមព្រហ្ម។

ករណីនេះខាងកម្លាំងកងរាជអាវុធហត្ថលើផ្ទៃប្រទេសជាម្ចាស់ករណីកសាងសំណុំរឿងសំយោគបទល្មើសទៅសាលាដំបូងរាជធានី ខណៈនៅរសៀលថ្ងៃទី០២ ខែមករា ឆ្នាំ២០១៩កន្លងទៅ បានចុះឃាត់ខ្លួនកូនប្រសារសេដ្ឋីថៃ ដែលជាម្ចាស់ហាងកែសម្ផស្ស «ឌែម៉ូគ្លីនិក» ទើបរៀបការបានពីរថ្ងៃ ពោលនៅថ្ងៃទី៣១ ខែធ្នូ ឆ្នាំ២០១៨ ​ក្រោយមានបណ្ដឹងរឿងជំរិតទារប្រាក់ ពីអតិថិជនដែលចូលទៅទទួលសេវាកែសម្ផស្ស។ ករណីនេះក៏បានធ្វើឲ្យមានកក្រើកពេញ បណ្តាញសង្គម Facebook ផងដែរជាមួយនិងការគាំទ្រចំណាត់ការរបស់មន្ត្រីនគរបាលយុត្តិធម៍។

តាមប្រភពព័ត៌មានបានឲ្យដឹងថា៖ ​ការដាក់ពាក្យបណ្ដឹងនេះ​បន្ទាប់ពីជនរងគ្រោះ បានចូលទៅកែសម្ផស្ស​នៅក្នុងគ្លីនិកខាងលើ ហើយត្រូវបានម្ចាស់គ្លីនិក រៀបចំបង្កប់កាមេរ៉ាថតសកម្មភាពកែសម្ផស្ស ដែលក្នុងនោះរួមមានទាំងការកែរកេរ្ដិ៍ភេទ​ផងដែរ។ ទីតាំងហាងនេះ ស្ថិតក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ៕  ដោយ៖ សិលា

...


ចែករំលែក៖
ពាណិជ្ជកម្ម៖ Naza Wedding Planner ads2 ads3 ambel-meas ads5 ads6 scanpeople ads7 fk Print