ភ្នំពេញ៖ មានរឿងរ៉ាវជាច្រើនដែលធ្វើឲ្យមហាជនភ្ញាក់ផ្អើលនឹងចាប់អារម្មណ៍ខ្លាំងចំពោះអ្នកសិល្បៈ ក្រោយពីពួកគេបានជួបបញ្ហាក្នុងជីវិតដែលមិននឹកស្មានដល់ រហូតដល់មានសិល្បករមួយចំនួនបានបាត់បង់ជីវិតបន្តបន្ទាប់គ្នា។
យ៉ាងហោចណាស់មានសិល្បករ៤នាក់បានស្លាប់បាត់បង់ជីវិតចាប់តាំងពីដើមខែមករាឆ្នាំ២០១៩មក ខណៈដែលសិល្បករមួយចំនួនកំពុងសង្គ្រោះបន្ទាន់នៅមន្ទីរពេទ្យ និងសិល្បករមួយចំនួននូវតែដក់ជាប់នូវអារម្មណ៍សោកស្តាយ និងភ័យខ្លាច។
នាយ សានម៉ៅ៖ ដើមខែមករាឆ្នាំនេះតារាកំប្លែងធូ ចំរ៉ុងហៅនាយ សាន ម៉ៅ មានស្ថានភាពជំងឺកាន់តែឈឺធ្ងន់ រហូតក្រុមគ្រួសារសម្រេចបញ្ជូនទៅព្យាបាលនៅមន្ទីរពេទ្យ នៅនៅស្រុកអ៊ូប៊ុនប្រទេសថៃ។ ក្រុមគ្រួសារតារារូបនេះបានដាក់បញ្ចាំប្លង់ផ្ទះដើម្បីដោះទ័ល ៕
អ្នកនាងស្វែង សុជាតា៖ តារាសម្តែងស្វែង សុជាតាបានជួបរឿងក្តុកក្តួលនិងជួបទុក្ខធំក្រោយអ្នកម្តាយនាងបានទទួលមរណភាព កាលពីថ្ងៃទី០៦ ខែមករានេះ ដោយជរាពាធ ក្នុងជន្មាយុ ៨៣ឆ្នាំ៕
នាយក្តិប៖ តារាកំប្លែង នាយ ក្ដឹប ត្រូវបានក្រុមគ្រួសារដឹកទៅព្យាបាលនៅប្រទេសថៃកាលពីអំឡុងពាក់កណ្តាលខែនេះបន្ទាប់ពីស្ថានភាពជំងឺបេះដូង សួត តម្រងនោម ធ្វើទុក្ខខ្លាំងរួចមក ។ បញ្ហាសម្រាប់ក្រុមគ្រួសារមួយនេះ កាន់តែជួបទុក្ខកាន់តែខ្លាំងបន្ថែមទៀត ដោយសារខ្វះថវិកា។ក្រុមគ្រួសាររបស់តារារូបនេះ ប្រាប់ថា ជំងឺរបស់លោក អាចចំណាយដល់ជាង១ម៉ឺនដុល្លារ ក្នុងការព្យាបាលនៅប្រទេសថៃ ក្នុងខេត្ត អ៊ូប៊ុន៕
សាស្ត្រាចារ្យ គង់ ណារី៖ សាស្ត្រាចារ្យបង្ហាត់ចម្រៀង គង់ ណារី បានទទួលមរណភាពនៅថ្ងៃ ទី២០ខែមករានេះដោយរោគាពាធក្នុងវ័យ ៦៥ឆ្នាំ បន្ទាប់ពីសម្រាកព្យាបាលជិត២ខែ នៅមន្ទីរពេទ្យព្រះកុសមៈ។សពរបស់សាស្ដ្រាចារ្យ ត្រូវបានបញ្ជូនទៅវត្តស្រះចក ខណ្ឌដូនពេញ រាជធានីភ្នំពេញ ដើម្បីតម្កល់និងរៀបចំធ្វើបុណ្យតាមប្រពៃណី ក្រោមការចូលរួមយ៉ាងច្រើនកុះករពីអ្នកសិល្បៈ៕
រឿន សារ៉ាត់៖ មរណភាពរបស់តារាសម្ដែង រឿន សារ៉ាត់ វ័យ២៣ឆ្នាំបានធ្វើឲ្យអ្នកសិល្បៈតក់ស្លុតយ៉ាងខ្លាំង ដោយសារតែលោកទើបបានប្រឡូកក្នុងវិស័យនេះ មិនទាន់បានប៉ុន្មានផង ។ ដំណើរដើមទងនៃការស្លាប់មិនត្រូវបានបញ្ជាក់លម្អិតនោះទេគ្រាន់តែសាច់ញាតិបញ្ជាក់ថាស្លាប់ដោយសារលង់ទឹកក្រោយពីដំណើរកម្សាន្តជាមួយតារាសម្តែងយូ នីស្កូនៅលើទឹកដីនៃខេត្តកំពត៕
លោក គង់ ចំរើន ៖ថ្មីៗនេះអ្នកចម្រៀងតាម រោងការ ម្នាក់ឈ្មោះ គង់ ចំរើន បានបាត់បង់ជីវិតគួរឲ្យសោកស្ដាយចោលកូនស្រី២នាក់ ក្រោយកើតជំងឺបេះដូង ហើយគ្មានប្រាក់ព្យាបាល ទុករហូតដល់ស្លាប់ខ្លួន។អ្នកសិល្បៈទម្លាយថាបញ្ហាធំបំផុត គឺលោកមិនមានប្រាក់សម្រាប់មើលថែខ្លួនរក្សាជីវិត ទុកមើលថែកូនស្រីទាំង២ឡើយ ទើបចេះតែទុករហូតដល់ជំងឺកំណាចឆក់យកជីវិតលោកទៅគ្មានថ្ងៃវិលត្រឡប់៕
នាយកុយ និងនាយក្រិន៖ កាលពីថ្ងៃទី២០ ខែមករា ឆ្នាំ២០១៩នេះ តារាកំប្លែងនាយ កុយ និងនាយ ក្រិនបាន ជួបគ្រោះថ្នាក់ចរាចរណ៍ ដោយរថយន្តបែកកង់ និងបានរ៉េចង្កួតទៅបុកនឹងដើមឈើ។លោក ជួង ជី ហៅនាយកុយ បានរងរបួសកែងដៃខាងស្តាំ ស្រាំឆ្អឹង និងលោក ទេស សុជន ហៅនាក្រឹន គ្មានរបួស ក្នុងករណីគ្រោះថ្នាក់ចរាចរណ៍នេះ។
កញ្ញា ខេមរៈ ស្រីពៅ៖ មរណភាពរបស់តារាចម្រៀង ខេមរៈ ស្រីពៅ ប្អូនស្រី លោក ខេមរៈ សិរីមន្តកាលពីថ្ងៃទី២៥ខែមករានេះបានធ្វើឲ្យមហាជនមានការក្តុកក្តួលយ៉ាងខ្លាំងពេញផ្ទៃប្រទេស ។ ម្ចាស់បទ “ជួបស្នេហ៍ក្នុងពេលខូចចិត្ត” បានបាត់បង់ជីវិតនៅប្រទេសឥណ្ឌា បន្ទាប់ពីក្រុមគ្រួសារសម្រេចដឹកយកទៅព្យាបាលនៅទីនោះ ។ក្រុមគ្រួសារកំពុងរៀបចំដឹកយកមកធ្វើបុណ្យនៅលើទឹកដីកំណើតនៃខេត្តកំពង់ចាម៕ វឌ្ឍនា
