ខេត្តសៀមរាប: ផ្ទះឈើប្រក់ស្បូវមួយខ្នងត្រូវបានអគ្គិភ័យបំផ្លាញអស់ទាំងស្រុង ហើយត្រូវបានម្ចាស់ផ្ទះអះអាងថាបណ្តាលមកពីផ្ទុះដែកកេះហ្គាសដែលគាត់ស៊កនឹងដំបូលស្បូវហើយត្រូវកម្តៅថ្ងៃក្តៅខ្លាំងទើបផ្ទុះជាអណ្តាតភ្លើងឆេះរាលដល់ស្បូវពេញបន្ទុកតែម្តង។
ឧបទ្ទវហេតុនេះកើតឡើងកាលពីវេលាម៉ោង២រសៀល ថ្ងៃអាទិត្យ ៧ រោច ខែបុស្ស ឆ្នាំ ច សំរឹទ្ធិស័ក ព.ស.២៥៦២ ត្រូវនឹង ថ្ងៃទី២៧ ខែមករា ឆ្នាំ២០១៩ ក្នុងភូមិល្វា ឃុំស្រែណូយ ស្រុកវ៉ារិន ខេត្តសៀមរាប នៅចំណុចត្រពាំងបេង។
មន្ត្រីនគរបាលប៉ុស្តិ៍ ស្រែណូយ បានឲ្យដឹងថា ម្ចាស់ផ្ទះឈ្មោះ ពិន លឿ ភេទប្រុស អាយុ៥២ឆ្នាំ និងប្រពន្ធឈ្មោះ ពេក នៀវ អាយុ៤៦ឆ្នាំ រស់នៅភូមិ ឃុំ កន្លែងកើតហេតុខាងលើ ។
អគ្គិភ័យនេះបំផ្លាញផ្ទះឈើប្រក់ស្បូវទំហំ៤ម៉ែត្រ X៦ម៉ែត្រ ជញ្ជាំងក្តារមួយចំហៀងលាយស្បូវ និងខូចខាតទ្រព្យសម្បត្តិជាច្រើនមានដូចជា–ម៉ូតូមួយគ្រឿងម៉ាកហុងដា (វេវ)–ប្រាក់រៀលចំនួន១២៦០,០០០រៀល (មួយលានពីរសែនប្រាំមួយម៉ឺនរៀល)–ម៉ាស៊ីនបាញ់ថ្នាំចំនួន០១គ្រឿង
–ម៉ាស៊ីនចាក់ស៊ីឌី(លេបថប់)ចំនួន០២គ្រឿង–អាគុយកម្លាំង៤០វ៉ុលចំនួនមួយ–ស្រូវចំនួន១០ការ៉ុង–ឯកសារ(អត្តសញ្ញាណប័ណ្ណនឹងសំបុត្រកំណើត) មួយចំនួន។បន្ទាប់ពីមានអគ្គិភ័យនេះកើតឡើង មិនមានរថយន្តពន្លត់អគ្គិភ័យរបស់អធិការដ្ឋាននគរបាលស្រុកវ៉ារិន ចេញមកជួយពន្លត់ទាន់ពេលវេលាទេ ព្រោះអង្គភាពទទួលព័ត៌មានយឺតយ៉ាវ និងម៉្យាងផ្ទះនេះនៅដាច់ស្រយ៉ាលពីភូមិ ផ្លូវចូលមិនរួច និងផ្លូវឆ្ងាយរយ:ចម្ងាយជាង១០គីឡូម៉ែត្រ ពីអធិការដ្ឋាននគរបាលស្រុកផង៕
