ភ្នំពេញ៖ នៅព្រឹកថ្ងៃទី ០៧ ខែធ្នូ ឆ្នាំ២០១៥ សម្តេចតេជោ ហ៊ុន សែន នាយករដ្ឋមន្ត្រី បានចេញសារក្រើនរំលឹកមួយចំនួន ដល់អាជ្ញាធរដើម្បីអន្តរាគមន៍ ជួយបូមទឹកសង្គ្រោះស្រូវប្រជាពលរដ្ឋ និងកម្លាំងប្រដាប់អាវុធគ្រប់ប្រភេទ មន្ត្រីរាជការ ត្រូវចុះជួយកាត់ប្រមូលផលស្រូវរបស់កសិករ ខណៈកសិកម្មឆ្នាំនេះពិសេសដំណាំស្រូវទាំងស្រូវវស្សា ទាំងស្រូវប្រាំងបាន និងកំពុងប្រឈមនិងការខ្វះខាតទឹក។
សម្តេចតេជោ ហ៊ុន សែន បានបង្ហាញសារក្រើនរំឭកនៅលើ Facebook ផ្លូវការរបស់សម្តេចនាព្រឹកថ្ងៃនេះថា “កសិកម្មឆ្នាំនេះពិសេសដំណាំស្រូវទាំងស្រូវវស្សា ទាំងស្រូវប្រាំងបាន និងកំពុងប្រឈមនិងការខ្វះខាតទឹក។ ក្នុងសភាពការណ៍បែបនេះ ជាមួយនិងវិធានការដែលរាជរដ្ឋាភិបាលបានដាក់ចេញរួចមកហើយនោះ ៖
ខ្ញុំសូមរំលឹកលើចំណុចខ្លះៗ៖
១.ត្រូវអន្តរាគមន៍ជួយបូមទឹកសង្គ្រោះស្រូវប្រជាពលរដ្ឋ ដោយមិនត្រូវទុកឲ្យស្រូវខូចនៅតំបន់ដែលមានប្រភពទឹកនោះឡើយ។
២.កម្លាំងប្រដាប់អាវុធគ្រប់ប្រភេទ មន្ត្រីរាជការ ត្រូវចាត់តាំងកម្លាំងចុះជួយច្រូតកាត់ប្រមូលផលសំរាប់គ្រួសារដែលខ្វះកម្លាំងពលកម្ម (ចាស់ជរា ស្ត្រីមេម៉ាយជនពិការ គ្រួសារយុទ្ធជន)។
៣.ស្ថាប័នកសិកម្មត្រូវផ្ដល់ពូជដំណាំដល់ប្រជាកសិករដែលមិនអាចធ្វើស្រែប្រាំងបាន ជំរុញឲ្យពួកគាត់ដាំដុះដំណាំរួមផ្សំវិញ។
៤.ត្រៀមអន្តរាគមន៍កំចាត់សត្វបំផ្លាញដំណាំ និងទប់សា្កត់ជំងឺសត្វគ្រប់ប្រភេទ។
៥.ស្ថាប័នហិរញ្ញវត្ថុ និងធនាគារត្រូវធ្វើការជាមួយស្ថាប័នមីក្រូហិរញ្ញវត្ថុ ដើម្បីរកវិធីអនុគ្រោះមួយចំនួនជូនប្រជាជនដែលរងគ្រោះ ដូចជាពន្យារពេលសង ឬពន្យារពេលសងដោយមិនយកការប្រាក់ ឬបន្ថយការប្រាក់ ទប់ស្កាត់ការឆ្លៀតឱកាសរឹបអូសដីធ្លី ផ្ទះសម្បែង ទ្រព្យសម្បត្តិ។ល។ ពីសំណាក់ម្ចាស់បំណុល ចំពោះកូនបំណុលដែលកំពុងជួបការលំបាកដោយសារគ្រោះធម្មជាតិ”៕
ដោយ៖ ហេង សូរិយា
