ខេត្តកំពង់ឆ្នាំង៖ អ្នកនេសាទម្នាក់ជាជនជាតិវៀតណាម ត្រូវបានជនសង្ស័យ២នាក់ដែលបានបិទមុខជិត និងដៃកាន់កាំភ្លើងខ្លី និង ពូថៅ បានសម្រុកចូលទៅទូកជនរងគ្រោះដោយម្នាក់យកកាំភ្លើងភ្ជុង និង ម្នាក់ទៀតយកពូថៅកាប់ប្រហារទៅលើក្បាលជនរងគ្រោះ បណ្តាលអោយសា្លប់ក្នុងថ្លុកឈាម ។
ហេតុការណ៍នេះបានកើតឡើងកាលពីវេលាម៉ោង ៤ទៀបភ្លឺថ្ងៃទី៧ ខែធ្នូ ឆ្នាំ២០១៥ នៅត្រង់ចំណុច ចន្លោះវាលភក់ ខាងជើងកោះក្រញ៉ាន និងកោះទន្លា ស្ថិតក្នុងភូមិសាស្ត្រឃុំផ្លូវទូក ស្រុកកំពង់លែងព្រំប្រទល់ជាប់និង ខេត្តកំពង់ធំ ។
សមត្ថកិច្ចមូលដ្ឋានបានអោយដឹងថា ជនរងគ្រោះ ឈ្មោះ ជិញ យ៉ាំងកុង ភេទប្រុស អាយុ៤២ឆ្នាំ ស្នាក់នៅក្នុងឃុំឆ្នុកទ្រូ ស្រុកបរិបូណ៌ខេត្តកំពង់ឆ្នាំង ។
សមត្ថកិច្ចបានអោយដឹងថា មុនពេលកើតហេតុជនរងគ្រោះនិងស្ត្រីម្នាក់ទៀត បានជិះកាណូតទៅអូសអួនដោយប្រើម៉ាស៊ីនធំ នៅចំណុចភូមិស្លត ឃុំផ្លូវទូក ស្រុកកំពង់លែង ដែលមានកម្មករជាច្រើនផងដែរ ប៉ុន្តែទូកជនរងគ្រោះបានចតនៅឆ្ងាយពីកម្មករអូសអួន ។ ក្នុងពេលដែលចត ក៍ស្រាប់តែមានជនសង្ស័យពីរនាក់ម្នាក់ប្រដាប់ដោយកាំភ្លើងខ្លី និង ម្នាក់ទៀតប្រដាប់ដោយពូថៅ បានជិះបាឡាជ័រ សំដៅមកទូកជនរងគ្រោះ ក្នុងពេលនោះមា្នក់បានដកកាំភ្លើងខ្លីភ្ជុងជនរងគ្រោះ និង ម្នាក់ទៀតបានដកពូថៅរួចហក់ចូលទៅទូកជនរងគ្រោះកាប់ប្រហាទៅលើក្បាលតែម្តង បណ្តាលអោយជនរងគ្រោះ រងរបួសធ្ងន់ក្នុងថ្លុកឈាម ក្រោយពីកាប់ប្រហារួចជនសង្ស័យទាំង២នាក់ បើកបាឡាជ័រគេចខ្លួនបាត់តែម្តង ។ ចំណែកឯជនរងគ្រោះបានស្លាប់ក្រោយពីបញ្ជូនមកសង្គ្រោះនៅមន្ទីរពេទ្យបង្អែកស្រុកបរិបូរណ៍ ។
រហូតមកដល់ពេលនេះសមត្ថកិច្ចកំពុងស្រាវជ្រាវរកជនដៃដល់ ដែលកាប់ប្រហាមកលើជនរងគ្រោះដើម្បី យកមកផ្តន្ទាទោសតាមផ្លូវច្បាប់ ៕
ដោយ៖ ចន្ថា
