ភ្នំពេញ៖ តារាចម្រៀង ខេមរៈ សិរីមន្ត បានទម្លាយថា មូលហេតុដំបូងដែលធ្វើឲ្យប្អូនស្រីរបស់លោក ធ្លាក់ខ្លួនឈឺធ្ងន់ រហូតដល់ថ្នាក់បាត់បង់ជីវិត គឺបណ្ដាលមកពីដំបូងឡើយ វេជ្ជបណ្ឌិតនៅក្នុងមន្ទីរពេទ្យឯកជនម្នាក់ បានធ្វើការវិនិច្ឆ័យរោគ មិនបានត្រឹមត្រូវ រួចក៏បានផ្សំថ្នាំឲ្យនាងលេបខុសពីជំងឺផ្សំថ្នាំសន្លាក់ឲ្យលេបទើបបណ្ដាលឲ្យប្រតិកម្មថ្នាំ និងធ្លាក់ខ្លួនឈឺធ្ងន់ ត្រូវបញ្ជូនទៅព្យាបាលដល់ប្រទេសថៃ។ នេះបើតាមការថ្លែងឲ្យដឹងរបស់លោក ខេមរៈ សិរីមន្ត នៅក្នុងសន្និសីទសារព័ត៌មាន នៅ ថ្ងៃសៅរ៍ ១៣ រោច ខែបុស្ស ឆ្នាំ ច សំរឹទ្ធិស័ក ព.ស.២៥៦២ ត្រូវនឹង ថ្ងៃទី២ ខែកុម្ភៈ ឆ្នាំ២០១៩ ម្សិលមិញនេះ ។
លោក ខេមរៈ សិរីមន្ត បានបន្តទៀតថា មុននឹងទៅដល់ប្រទេសថៃ ឥទ្ធិពលថ្នាំបានជ្រាបចូលពេញខ្លួន និងបានបំផ្លាញសរីរាង្គក្នុងខ្លួនប្អូនស្រីរបស់លោក មានដូចជា ក្រពះ ពោះវៀន សួត ជាពិសេសក្រលៀន ធ្ងន់ធ្ងរទៅហើយ ដែលធ្វើឲ្យវេជ្ជបណ្ឌិតនៅក្នុងប្រទេសថៃ ពិបាកនៅក្នុងការព្យាបាល។ អំឡុងពេលទៅព្យាបាល នៅក្នុងប្រទេសថៃរយៈពេល៣ឆ្នាំនោះ គ្រួសាររបស់លោក បានចំណាយថវិកា អស់រាប់ម៉ឺនដុល្លារ តែស្ថានភាពរបស់ប្អូនស្រី មិនបានធូរស្បើយអ្វីឡើយ ពោលគឺមានតែធ្ងន់ធ្ងរជាងមុន ព្រោះបញ្ជូនទៅចំទីតាំងពេទ្យ ដែលគ្មានជំនាញច្បាស់លាស់ទៀត ។ទោះបីជាដឹងថា ប្អូនស្រីមិនបានធូរស្បើយក៏ដោយ ប៉ុន្តែលោកនៅតែលើកទឹកចិត្ត និងបន្តព្យាបាលប្អូនស្រីជាប់រហូត ទោះបីជាថ្នាំខ្លះថ្លែ គឺក្នុង១ម្ជុលមានតម្លៃរហូតដល់១ម៉ឺន ទៅ២ម៉ឺនដុល្លារ ក៏លោកហ៊ានចំណាយឲ្យពេទ្យដែរ។
លោកបន្តថាអំឡុងពេលនោះ ចំណូលបានមកពីការងាសិល្បៈ គឺត្រូវចំណាយជាអាទិភាពដំបូង ទុកសម្រាប់តែមើលជំងឺប្អូនស្រីពៅប៉ុណ្ណោះ មិនហ៊ានប្រើការខ្ជះខ្ជាយអ្វីឡើយ ពោលគឺពេលពេទ្យត្រូវការលុយពេលណា គឺផ្ញើទៅឲ្យភ្លាមៗតែម្ដង។
ថ្លែងទាំងទឹកភ្នែកយំអួលដើមកទៀតថា លោកពិតជាស្រណោះខ្លាំងណាស់ នៅពេលដែលលោក ទៅជួបប្អូននៅក្នុងមន្ទីរពេទ្យម្តងៗ ប្អូនស្រីពៅតែងតែប្រាប់ថា ចង់មកច្រៀងវិញ ហើយលោកតែងតែលើកទឹកចិត្ត ដល់រូបនាងថា មិនអីទេ ឲ្យតែប្អូនបានជាសះស្បើយ គឺបងនឹងនាំប្អូនមក ចូលសិល្បៈវិញតាមបំណង។ តែអ្វីដែលរូបលោកកាន់តែអស់សង្ឃឹមនោះ គឺនៅពេលដែលស្ថានភាពជំងឺ របស់ស្រីពៅកាន់តែធ្ងន់ធ្ងរទៅៗ រហូតដល់ក្រុមគ្រួសារសម្រេចចិត្តបញ្ចូនពីមន្ទីរពេទ្យថៃ ទៅកាន់មន្ទីរពេទ្យក្នុងប្រទេសឥណ្ឌា ហើយពេលទៅដល់ដំបូង លោកគិតថា អ្វីៗនឹងអាចប្រសើរឡើង ប៉ុន្តែទីបំផុត គឺមិនអាចដូចបំណងឡើង។
ទោះបីជាប្អូនស្រីរបស់លោក បានបាត់បង់ជីវិត គួរឲ្យសោកស្តាយជាទីបំផុតទៅហើយក្តី ប៉ុន្តែអ្វីដែលលោកចង់ផ្តាំផ្ញើ គឺលោកចង់និយាយផ្តោតសំខាន់ទៅដល់វេជ្ជបណ្ឌិតមួយចំនួន ដែលបានផ្សំថ្នាំ ឬក៏ព្យាបាលអ្នកជំងឺ ត្រូវពិនិត្យ និងរកមើលរោគវិនិច្ឆ័យឲ្យបានច្បាស់លាស់ និងកុំយកជីវិតអ្នកជំងឺ មកធ្វើជាការលេងសើច ព្រោះថ្នាំ ឬឱសថអាចបំផ្លាញជីវិតមនុស្ស ដោយមិនដឹងខ្លួន។ ចំណែកឯ បងប្អូនប្រជាពលរដ្ឋវិញ ប្រសិនបើអាចជៀសវាងបាន ចំពោះការផ្សំថ្នាំលេប ពេលមានជំងឺតិចតួច ក៏ជៀសទៅ ដើម្បីកុំឲ្យស្ថានភាពធ្លាក់ដុនដាប ដូចជាប្អូនស្រីរបស់លោក នៅពេលនេះ។
ជាការពិតណាស់ ការទម្លាយនូវអាថ៌កំបាំងជំងឺរបស់ប្អូនស្រីលោក រយៈពេល៤ឆ្នាំមកនេះ គឺលោកចង់បញ្ជាក់ឲ្យមហាជនទូទៅ ដឹងច្បាស់ថា រាល់ព័ត៌មាន ឬពាក្យចចាមអារ៉ាម ដែលបានលេចឮកន្លងមក គឺពុំមែនជាការពិតនោះទេ ហើយការទម្លាយនេះ ក៏ជាការបញ្ចប់ នូវមន្ទិលសង្ស័យជាច្រើន ដែលតែងតែគិតថា ក្រុមគ្រួសារលោក មានអាថ៌កំបាំងអ្វីមួយ នៅពីក្រោយនឹងជំងឺបស់ ខេមរៈ ស្រីពៅ រហូតដល់នាងបាត់បង់ជីវិត។
យ៉ាងណាលោកខេមរៈ សិរីមន្ត មិនបានទម្លាយឲ្យដឹងថា តើវេជ្ជបណ្ឌិតមន្ទីរពេទ្យឯកជនមួយ ណាដែលបានធ្វើការវិនិច្ឆ័យរោគ មិនបានត្រឹមត្រូវ រហូតធ្វើឲ្យប្អូនស្រីពៅរបស់លោកមានសភាពជំងឺកាន់តែធ្ងន់ធ្ងរ ។ គេក៏នៅមិនទាន់ដឹងដែរថា តារាចម្រៀងរូបនេះ មានគម្រោងប្តឹង វេជ្ជបណ្ឌិតមន្ទីរពេទ្យឯកជន រូបនោះដែរឬយ៉ាងណានោះទេ ៕
ដោយ៖ ប្រាថ្នា
