ប្រាក់ដុល្លារអាមេរិក គឺជាប្រាក់ចរាចរណ៍នៅលើពិភពលោក ក្នុងវិស័យពាណិជ្ជកម្ម រាល់ការទិញដូរ ទិញដូរទំនិញទាំងឡាយគឺ បានកំណត់​យកប្រាក់ដុល្លារជាគោល​។ ប៉ុន្តែមួយរយៈពេលចុងក្រោយនេះចាប់តាំង ពីលោកត្រាំឡើងកាន់តំណែងដឹកនាំអាមេរិក ប្រាក់ដុល្លារអាមេរិក ត្រូវបានប្រទេសជាច្រើន ឈប់ប្រើប្រាស់ សម្រាប់វិស័យពាណិជ្ជកម្ម ទ្វេភាគី ឬពហុភាគី​ក្នុងគោលដៅបញ្ចៀសហានិភ័យ​ អាចកើតឡើងដោយសារតែការដាក់ទណ្ឌកម្ម របស់អាមេរិក ។

កន្លងមក​ប្រទេសដែលជាសម្ព័ន្ធមិត្តជិតសិទ្ធបំផុតរបស់អាមេរិកនៅអឺរ៉ុប ក៏បានសម្រេច ប្រើប្រាស់ប្រាក់អឺរ៉ូ​ដើម្បី ដោះដូរពាណិជ្ជកម្មជាមួយរុស្ស៊ី អុីរ៉ង់…។ នៅពេលនេះដែរ ប្រទេសសម្បូរប្រេង​ វេណេហ្ស៊ុយអេឡា ក៏បានសម្រេច បង្កើត ក្រុមសហពាណិជ្ជកម្ម មិនប្រើប្រាស់ប្រាស់ដុល្លារអាមេរិក ។

កាលពីថ្ងៃទី​១២ខែកុម្ភៈ រដ្ឋមន្ត្រីក្រសួងពាណិជ្ជកម្មវេណេហ្ស៊ុយអេឡា លោក​ Manuel Quevedu ​បានប្រកាសថា​ រដ្ឋាភិបាលទីក្រុង​ Caracas ​សង្ឃឹមថា​និង បង្កើត ពាណិជ្ជកម្មជាមួយចិន ឥណ្ឌា រុស្ស៊ី​…​ដោយមិនប្រើប្រាស់ប្រាក់ដុល្លារអាមេរិក ។ រាល់ការទូទាត់ប្រាក់ ក្នុងការទិញដូប្រេង​ ​នឹងត្រូវប្រើប្រាស់ រូបិយវត្ថុផ្សេងទៀត ដែលមានលំនឹង ជាងគេ បញ្ចៀសទណ្ឌកម្មពីអាមេរិក​។

មានប្រសាសន៍ក្រោយកិច្ចប្រជុំនៅទីក្រុង​ Petrotech ​របស់ឥណ្ឌា រដ្ឋមន្ត្រី Manuel Quevedu បានលើកឡើងថា បណ្តាប្រទេស អាចបង្កើន វិស័យសេដ្ឋកិច្ចពាណិជ្ជកម្ម​ ដោយមិនចាំបាច់យកប្រាក់ដុល្លារសម្រាប់ទូទាត់ ។ លោកបន្តទៀតថា វេណេហ្ស៊ូយអេឡា នៅតែបន្តផ្គត់ផ្គង់ថាមពលប្រេង ដល់ដៃគូពាណិជ្ជកម្មដដែល ក្នុងនោះមាន ក្រុមហ៊ុន​ Reliance Industries ​របស់ឥណ្ឌា ទោះបីកំពុងរងទណ្ឌកម្មពីអាមេរិកក្តី។

នៅពេលនេះដែរស្ថានភាពនយោបាយនៅក្នុងប្រទេសវេណេហ្ស៊ុយអេឡា កំពុងតែតានតឹង ដោយនៅក្នុងប្រទេសមួយមានប្រធានាធិបតីដល់ទៅពីរ ។ ប្រធានាធិបតី ប្រកាសតាំងខ្លួនឯង របស់មេបក្សប្រឆាំង ​ទទួលបានការគាំទ្រយ៉ាងខ្លាំងពីបណ្តាញប្រទេសលោកខាងលិច ក្នុងនោះមាន អាមេរិក កាណាដា កូឡំបី ប៉ារ៉ាហ្គាយ ប្រេស៊ីល ឈីលី​ អាហ្សង់ទីន អីក្វាឌឺ ហ្គេតេម៉ាឡា និងប៉េរ៉ូ ។

ចំណែកប្រធានាធិបតី នីកូឡាស ម៉ាឌូរ៉ូ​វិញទទួលបានការគាំទ្រយ៉ាងខ្លាំង ពីបណ្តាប្រទេស ដូចជា រុស្ស៊ី ចិន គុយបា តួកគី ម៉ិចស៊ីកូ … ទន្ទឹមនិងនោះ ប្រទេសទាំងនេះបានថ្កោលទោសយ៉ាងខ្លាំង ដល់សកម្មភាព របស់មេបក្សប្រឆាំង ដែលប៉ុនប៉ងធ្វើរដ្ឋប្រហារ ទម្លាក់ប្រធានាធិបតីស្របច្បាប់ ។

ពាក់ព័ន្ធនិងស្ថានភាពនៅក្នុងប្រទេសវេណេហ្ស៊ុយអេឡា អគ្គលេខាធិការអង្គការសហប្រជាជាតិលោក Antonio Guterres បានបង្ហាញពីសំណើរបស់លោកជាថ្មីម្តងទៀត ក្នុងការជួយសម្របសម្រួលដើម្បីបញ្ចប់វិបត្តិនៅប្រទេសនេះ។ លោក Guterres បានជួបជាមួយរដ្ឋមន្ត្រីក្រសួងការបរទេសវេណេហ្ស៊ូអេឡាលោក Jorge Arreaza នៅទីក្រុងញូវយ៉កតាមសំណើរបស់រដ្ឋាភិបាលក្រុង Caracas ស្របពេលដែលការប្រឈមមុខដាក់គ្នារវាងលោកប្រធានាធិបតី Nicolas Maduro និងមេដឹកនាំគណបក្សប្រឆាំងលោក Juan Guaido នៅតែតានតឹង។

អង្គការសហប្រជាជាតិបានអំពាវនាវឲ្យមានការចរចានយោបាយដោយយកចិត្តទុកដាក់រវាងភាគីទាំងពីរដើម្បីទប់ស្កាត់ការធ្លាក់ចូលទៅក្នុងអំពើហិង្សាបន្ថែមទៀតនៅក្នុងប្រទេសអាមេរិកខាងត្បូងមួយនេះ។

អ្នកនាំពាក្យអង្គការសហប្រជាជាតិលោក Stephane Dujarric បាននិយាយថា “លោកអគ្គលេខាធិការបានបញ្ជាក់ជាថ្មីថា សំណើរបស់លោកសម្រាប់មុខតំណែងដ៏ល្អដល់ភាគីទាំងពីរនៅតែអាចធ្វើទៅបានសម្រាប់ការចរចាដើម្បីជួយប្រទេសនេះចេញពីការប្រឈមមុខដាក់គ្នានាពេលបច្ចុប្បន្នសម្រាប់ផលប្រយោជន៍របស់ប្រជាជនវេណេហ្ស៊ូអេឡា”។
កាលពីសប្ដាហ៍មុន ប្រមុខអង្គការសហប្រជាជាតិបាននិយាយថា លោកនឹងមិនចូលរួមក្នុងគំនិតផ្តួចផ្តើមណាមួយដែលត្រូវបានជំរុញដោយក្រុមប្រជាជាតិដើម្បីធានាភាពជឿជាក់លើការផ្តល់ “មុខតំណែងដ៏ល្អ” របស់គាត់នោះទេ។
លោក Guterres បានទទូចថា ភាគីទាំងពីរត្រូវតែស្នើសុំការសម្រុះសម្រួលរបស់គាត់ជាមុនសិនមុនពេលគាត់អាចឈានជើងចូលទៅក្នុងការដោះស្រាយបញ្ហានេះបាន។
អ្នកការទូតអង្គការសហប្រជាជាតិបាននិយាយថា រដ្ឋាភិបាលរបស់លោក Maduro បានត្រៀមខ្លួនរួចជាស្រេចហើយដើម្បីធ្វើកិច្ចចរចាប៉ុន្តែវានៅតែមិនទាន់ច្បាស់ថាតើលោក Guaido នឹងទទួលយកតួនាទីរបស់អង្គការសហប្រជាជាតិដែរឬទេ។

នៅពេលនេះប្រជាជនវ៉េណេស៊ុយអេឡារាប់ពាន់នាក់បានមកដល់ប្រទេស អេស្ប៉ាញ ខ្លះនៅក្នុងចំណោមពួកគេគ្មានលុយសូម្បីតែមួយសេន តែអ្នកខ្លះមានលុយទិញផ្ទះល្វែងយ៉ាងល្អប្រណីតនៅទីនោះ។
យោងតាមក្រសួងមហាផ្ទៃបានឲ្យដឹងថា សំណើសុំសិទ្ធិជ្រកកោនបានកើនឡើងជិត ២ ដង នៅក្នុងប្រទេស អេស្ប៉ាញ នៅក្នុងឆ្នាំនេះ ដោយជិត ២ មុឺននាក់ នៅក្នុងឆ្នាំ ២០១៨។
ក្រសួងនោះបានឲ្យដឹងទៀតថាមានតែសំណើ ២៩ ប៉ុណ្ណោះ ទទួលបានជោគជ័យកាលពីឆ្នាំទៅ ដោយសារវាគឺជាការពិបាកសម្រាប់អ្នកដែលចំណាកស្រុកដោយហេតុផលសេដ្ឋកិច្ចដើម្បីទទួលបានសិទ្ធិជ្រកកោននោះ៕

ដោយ៖ សាធី