បេីករថយន្តសណ្ដោងដឹកទំនិញបុករបាំងថ្មពុះចែកទ្រូងផ្លូវខូចខាតខ្លាំង

ចែករំលែក៖

ភ្នំពេញ ៖ បុរសម្នាក់បេីករថយន្តសណ្ដោងដឹកទំនិញបានរេចង្កូតទៅបុករបាំងថ្មពុះចែកទ្រូងផ្លូវបណ្ដាលឲ្យរងការខូចខាតទាំងរថយន្តនិងរបាំងថ្មយ៉ាងដំណំ តែសំណាងល្អមិនបណ្ដាលឲ្យនរណាម្នាក់រងរបួសនោះទេ ។

ហេតុការណ៍គ្រោះថ្នាក់ចរាចរណ៍នេះបានបង្កឲ្យមានការភ្ញាក់ផ្អើលឡើងកាលពីវេលាម៉ោងជាង១២យប់រំលងអាធ្រាត្រឈានចូលថ្ងៃទី១៨ ខែកុម្ភះ ឆ្នាំ២០១៩ ទីតាំងស្ថិតនៅតាមបណ្ដោយផ្លូវព្រះមុន្នីរ៉េត ចំណុចមុខវត្តស្ទឹងមានជ័យ ស្ថិតក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។

តាមប្រភពព័ត៌មានពីកន្លែងកើតហេតុបានប្រាប់ឲ្យដឹងថាមុនពេលកើតហេតុគេឃើញរថយន្តម៉ាក HYUNDAI ធុនធំប្រភេទសណ្ដោងភ្លៅ៤មួយគ្រឿង ពណ៌ស ពាក់ស្លាកលេខភ្នំពេញ3D-2861បេីកបរដោយបុរសម្នាក់ធ្វើដំណើរតាមបណ្ដោយផ្លូវព្រះមុន្នីរ៉េតក្នុងទិសដៅលិចទៅកេីត លុះមកដល់ចំណុចកើតហេតុមុខវត្តស្ទឹងមានជ័យស្រាប់តែរថយន្តខាងលើបានរេចង្កូតមកឆ្វេងដៃ ក៏ជ្រុលទៅបុករបាំងថ្មពុះចែកទ្រូងផ្លូវបណ្ដាលឲ្យរងការខូចខាតចំនួន៥ផ្ទាំង ចំណែកឯរថយន្តវិញរងការខូចខាតដាច់កង់ជំហៀងផ្នែកខាងឆ្វេងទៅមុខលែងរួច។

ក្រោយកើតហេតុសមត្ថកិច្ចមូលដ្ឋានបានចុះមកដល់រួចធ្វេីការទាក់ទងទៅសមត្ថកិច្ចជំនាញដេីម្បីឲ្យចុះមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញដេីម្បីរងចាំដោះស្រាយគ្នាទៅតាមផ្លូវច្បាប់នៅពេលក្រោយ ៕ ដោយ៖ ភារ៉ា ដង្កោ