សម្តេចនាយករដ្ឋមន្ត្រីហ៊ុន សែន បានមានប្រសាសន៍ញយដងរួចមកហើយអំពីបញ្ហាតម្លៃប្រេងនៅក្នុងប្រទេសកម្ពុជាដែលមិនសមស្របទៅនឹងតម្លៃប្រេងនៅលើទីផ្សារអន្តរជាតិ ។ វេលានេះតម្លៃប្រេងនៅទីផ្សារអន្តរជាតិបានធ្លាក់ចុះមកនៅក្រោម៤០ដុល្លារក្នុងមួយបារ៉ែល។ ប៉ុន្តែនៅកម្ពុជា តម្លៃប្រេងមិនទាន់ធ្លាក់ចុះនៅឡើយ ។
ក្នុងនាមប្រជាពលរដ្ឋម្នាក់ ក្រៅពីការប្រើប្រាស់ប្រេងសម្រាប់យានជំនិះ ប្រជាពលរដ្ឋកម្ពុជាត្រូវការប្រេងសម្រាប់បូមទឹកដាក់ស្រែ ។ ក្នុងនាមប្រជាពលរដ្ឋមានចម្ងល់អំពីបញ្ហាតម្លៃប្រេងនៅក្នុងប្រទេសកម្ពុជា ដែលមិនស្របទៅតាមតម្លៃប្រេងនៅលើទីផ្សារអន្តរជាតិ គ្រាដែលគេដឹងថា កម្ពុជាក៏បាននាំប្រេងពីប្រភពនៃទីផ្សារអន្តរជាតិនោះដែរ ។ ចុះហេតុអ្វីបានជាគេមិនអាចបញ្ចុះតម្លៃប្រេងបានឲ្យស្របទៅតាមទីផ្សារអន្តរជាតិយ៉ាងដូច្នេះ? ឬមួយក៏អ្វីៗស្ថិតនៅលើការសម្រេចរបស់ឈ្មួញ ។
ប្រជាពលរដ្ឋកម្ពុជាពិតជាខ្នក់ចិត្តអំពីបញ្ហានេះ ព្រោះថា រាជរដ្ឋាភិបាលតាមរយៈក្រសួងពាណិជ្ជកម្ម ហាក់ដូចជាមិនអាចតម្រែតម្រង់ក្រុមហ៊ុនប្រេងឥន្ធនៈឲ្យដើរទៅតាមផ្លូវមួយស្របច្បាប់នោះឡើយ ។ មួយរយៈចុងក្រោយនេះ គេកត់សម្គាល់ឃើញថា តម្លៃប្រេងនៅលើទីផ្សារអន្តរជាតិបន្តធ្លាក់ចុះ ក្នុងពេលដែលតម្លៃប្រេង នៅប្រទេសកម្ពុជានឹងថ្កល់មួយកន្លែង ។ នេះជាបញ្ហាមួយដែលប្រជាពលរដ្ឋឆ្ងល់ ហើយគួរតែក្រសួងពាណិជ្ជកម្មពន្យល់ប្រជាពលរដ្ឋឲ្យបានដឹងផង ។
ការដែលក្រុមហ៊ុនប្រេងមិនអាចបញ្ចុះតម្លៃបាន វាហាក់ដូចជាធ្វើឲ្យប្រជាពលរដ្ឋបាត់បង់ទំនុកចិត្តលើចំណាត់ការរបស់ក្រសួងពាណិជ្ជកម្ម ។ ក្រសួងពាណិជ្ជកម្មដែលបានកោះអញ្ជើញក្រុមហ៊ុនប្រេងឲ្យមកជជែកពិភាក្សាគ្នាអំពីបញ្ហាតម្លៃប្រេង ឃើញថា មិនទទួលបានលទ្ធផលអ្វីជាដុំកំភួននៅឡើយ ។ ជាក់ស្តែងពេលនេះ ពេលដែលតម្លៃប្រេងនៅលើទីផ្សារកំពុងធ្លាក់ចុះ តម្លៃប្រេងនៅកម្ពុជាមិនធ្លាក់ទេ ៕
ដោយ៖ ប្រជាពលរដ្ឋម្នាក់
