ភ្នំពេញោ: រថយន្តលុចស៊ីស៣៣០បុករះរ៉ឺម៉កកង់បី និងម៉ូតូមួយគ្រឿង បណ្ដាលឲ្យបុរសជនជាតិបរទេសម្នាក់ស្លាប់និងមនុស្ស២នាក់ទៀតរងរបួសធ្ងន់។

ហេតុការណ៍នេះបង្កការភ្ញាក់ផ្អើលដល់ប្រជាពលរដ្ឋកាលពីម៉ោង៣ រំលងអាធ្រាត្រ ឈានចូលថ្ងៃទី២ ខែមីនា ឆ្នាំ២០១៩ នៅតាមបណ្តោយផ្លូវព្រះសុីសុវត្ថិ ខាងមុខព្រះបរមរាជវាំង ស្ថិតក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ ។

សមត្ថកិច្ចបានឲ្យដឹងថាសពជនជាតិបរទេស និងជនរងគ្រោះរបួសធ្ងន់២នាក់ទៀតកនៅមិនទាន់ស្គាល់អត្តសញ្ញាណនោះទេ ។

ប្រភពពត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញ ម៉ូតូសណ្តោងរ៉ឺម៉កមួយគ្រឿងធ្វើដំណើរតាមបណ្ដោយផ្លូវព្រះស៊ីសុវត្តិ ក្នុងទិសដៅពីជើងទៅត្បូង ដោយមានជនរងគ្រោះ៣នាក់ ជនបរទេស២នាក់ និងម្ចាស់ម៉ូតូសណ្តោងរ៉ឺម៉កម្នាក់ ខណៈមកដល់ចំណុចកើតហេតុស្រាប់តែមានរថយន្តលុចស៊ីសRX330 ពណ៌ខ្មៅ ពាក់ស្លាកលេខភ្នំពេញ2AX5853 បានបើកចូលផ្លូវម៉ូតូសណ្តោងរ៉ឺម៉កបុកចំពីមុខពេញទំហឹង ខ្ទាតទៅបុកម៉ូតូកុបជ្រុងមួយគ្រឿងចតនៅចញ្ចើមផ្លូវ បណ្ដាលឲ្យបុរសម្នាក់ជាជនជាតិបរទេសស្លាប់ភ្លាមៗនៅនិងកន្លែង និងមនុស្ស២នាក់ទៀតរងរបួសធ្ងន់ត្រូវបានរថយន្តសាមុយដឹកបញ្ចូនមន្ទីពេទ្យភ្លាមៗផងដែរ ។

បន្ទាប់ពីកើតហេតុ សមត្ថកិច្ចមូលដ្ឋាន និងសមត្ថកិច្ចជំនាញចរាចរ បានចុះមកវាស់វែងយករថយន្តបង្ក ម៉ូតូរងគ្រោះ យកទៅរក្សាទុក រងចាំដោះស្រាលតាមផ្លូវច្បាប់ ។ ចំណែកសពជនរងគ្រោះ ត្រូវបានសមត្ថកិច្ចទាក់ទងទៅសាច់ញាតិ និងក្រុមគ្រួសារយកទៅធ្វើបុណ្យតាមប្រពៃណី៕ជ្រោយពេជ្រ