ភ្នំពេញ ៖ ប្រទះឃើញសពយុវជនម្នាក់អណ្តែតទឹក បន្ទាប់ពីយុវជនរូបនេះបានសម្រេចចិត្តមកលោតទឹកសម្លាប់ខ្លួនដោយសារបងប្អូនស្តីបន្ទោសបន្តិចបន្តួចរឿងដើរលេងច្រើន ។ហេតុការណ៍ភ្ញាក់ផ្អើលរកឃើញសពនេះកើតឡើងកាលពីម៉ោងជិត១រសៀលថ្ងៃទី២ ខែមីនាឆ្នាំ ២០១៩ នៅក្រោមស្ពានជ្រោយចង្វារ ភូមិដើមគរ សង្កាត់ជ្រោយចង្វា ខណ្ឌជ្រោយចង្វា ។
សពជនរងគ្រោះត្រូវបានគេស្គាល់ឈ្មោះ ពៅដាវីនហៅនីត អាយុ ២២ឆ្នាំរស់នៅភូមិចុងខ្សាច់សង្កាត់ទួលសង្កែ1 ខណ្ឌឬស្សីកែវ មុខរបររត់ម៉ូតូកង់បី ។
បើតាមសម្តីក្រុមគ្រួសារ ជនរងគ្រោះបានឱ្យដឹងថា មុនពេលកើតហេតុជនរងគ្រោះបានផឹកស៊ីជាមួយបងប្អូននៅភូមិចុងខ្សាច់ សង្កាត់ទួលសង្កែ1 ខណ្ឌឬស្សីកែវ ហើយត្រូវបានបងប្អូនស្តីបន្ទោសរឿងដើរលេងដាច់យប់ច្រើន រកលុយមិនសល់ ។ ក្រោយមកដោយសារស្រវឹងផង ហើយយុវជនរូបនេះបានគិតច្រើនផងក៏បានជិះម៉ូតូទាំងយប់ ដោយមិនដឹងទៅណានោះទេ ។
ប្រភពបន្តថា នៅយប់នោះជនរងគ្រោះបានទូរសទ្ទ័ប្រាប់បងប្អូនម្នាក់ទៀតថា យើងលាសិនហើយព្រោះអស់កម្មពៀនឹងគ្នាហើយរួចក៏ផ្តាំឱ្យបងប្អូនមកយកម៉ូតូផងនៅលើស្ពានជ្រោយចង្វា។ ដោយសារបងប្អូនមិនចាប់អារម្មណ៍ ស្មានតែនិយាយលេង រហូតដល់ម៉ោង៥ល្ងាចថ្ងៃទី១ ខែមីនា បាត់មិនឃើញ តេក៏មិនចូល។ ប្រភពឱ្យដឹងទៀតថា នៅព្រឹកថ្ងៃទី២ ខែមីនា ក្រុមគ្រួសារក៏ជួលគេមុជទឹករាវរហូតដល់ម៉ោងជាង១២ ថ្ងៃត្រង់ក៏ប្រទះឃើញសព រួចបានស្រងមកលើគោក ដឹកយកទៅធ្វើបុណ្យនៅវត្តទួលសង្កែតាមប្រពៃណី ៕ជ្រោយពេជ្រ
