ខេត្តបាត់ដំបង ៖ ស្ត្រីម្នាក់ដែលធ្លាប់ត្រូវសត្វឆ្កែឆ្កួតខាំ កាលពីកន្លះខែមុននេះ ពេលនេះ ត្រូវបានក្រុមគ្រួសារបញ្ជូនយ៉ាងប្រញាប់ប្រញាល់ទៅកាន់មន្ទីរពេទ្យបង្អែកខេត្ត នៅវេលាម៉ោង១១យប់ថ្ងៃទី០៤ មីនា ឆ្នាំ២០១៩ បន្ទាប់ពី ស្ត្រីរូបនេះកើតឡើងនូវអាការ:ប្រកាច់បែកពពុះមាត់ ។
ស្ត្រីរងគ្រោះខាងលើ ឈ្មោះពូន យឿម អាយុ៣៧ឆ្នាំ រស់នៅភូមិបួរ ឃុំបួរ ស្រុកភ្នំព្រឹក ។ បើតាមសមត្ថកិច្ចបានប្រាប់ទៀតថា ស្ត្រីរូបនេះ ត្រូវឆ្កែឆ្កួតខាំកាលពីថ្ងៃទី១៩ កុម្ភៈ កន្លងទៅ ។ តែក្រោយឆ្កែខាំភ្លាម គាត់មិនមានបញ្ហាអ្វីកើតឡើងទេ លុះដល់យប់ថ្ងៃទី០៤ មីនា យប់មិញនេះ ស្រាប់តែរោគឆ្កែខាំនេះ ធ្វើទុក្ខធ្វើឱ្យស្ត្រីរូបនេះ ប្រកាច់បែកពរពុះមាត់តែម្ដង ។
បើតាមក្រុមគ្រួសារឱ្យដឹងទៀតថា ពេលស្ត្រីរងគ្រោះធ្វើទុក្ខម្ដងៗ គឺចង់តែខាំដៃខ្លួនឯង រហូតបងប្អូនចាប់ដៃចងភ្ជាប់នឹងខ្លួន កុំឱ្យលើកខាំដៃខ្លួនឯងបាន ។
ដោយឃើញស្ថានភាពបែបនេះ ក្រុមគ្រួសារក៏បានសម្រេចចិត្តដឹកស្ត្រីរងគ្រោះរូបនេះ ទៅកាន់មន្ទីរពេទ្យបង្អែកខេត្តទាំងកណ្ដាលយប់ ដើម្បីឲ្យគ្រួពេទ្យជំនាញពិនិត្យនិងព្យាបាល ៕
