ប៉ូលិសក្រុងស៊ីដនីបានធ្វើប្រតិបត្តិការប្រឆាំងក្រុមភេរវកម្ម ដោយបាចនចាប់ខ្លួនក្មេរជំទង់អាយុ១៥ឆ្នាំម្នាក់ និងបុរសម្នាក់អាយុ២០ឆ្នាំ ដើម្បីចោទប្រកាន់ទៅតាមផ្លូវច្បាប់ពីបទរៀបចំគម្រោងវាយប្រហារភេរវកម្ម ។ នេះបើតាមការផ្សព្វផ្សាយរបស់ប៊ីប៊ីស៊ី កាលពីថ្ងៃទី១០ ខែធ្នូ ឆ្នាំ២០១៥ ។
ប៉ូលិសសហព័ន្ធរបស់អូស្ត្រាលីបានបញ្ជាក់ថា ជនទាំងពីរនាក់ត្រូវចោទពីបទរៀបចំគម្រោងវាយប្រហារភេរវកម្ម ។ នេះជាប្រតិបត្តិការរបស់ប៉ូលិសប្រឆាំងទៅលើក្រុមភេរវកម្មដែលទាក់ទងការវាយប្រហារនៅអូស្ត្រាលីកាលពីឆ្នាំ២០១៤កន្លងមក ។
ប៉ូលិសអូស្ត្រាលីបានបង្កើនការឆ្មក់ ក៏ដូចស៊ើបអង្កេតស្រាវជ្រាវ និងចាប់ខ្លួនមនុស្សកាន់តែច្រើនឡើង ដោយសង្ស័យមានជាប់ពាក់ព័ន្ធជាមួយក្រុមភេរវកម្ម ។
កាលពីខែវិច្ឆិកា ឆ្នាំ២០១៥ កន្លងមកនេះ អូស្ត្រាលីបានរកឃើញថា ពលរដ្ឋរបស់ខ្លួនភាគច្រើនទទួលរងការគំរាមកំហែងពីការវាយប្រហារភេរវកម្ម ។ ដោយមូលហេតុនេះហើយទើបបានជានាយករដ្ឋមន្ត្រីអូស្ត្រាលីបានប្រកាសឲ្យពលរដ្ឋរក្សាការស្ងាត់ស្ងៀម ហើយរដ្ឋាភិបាលនឹងចាត់វិធានការមិនឲ្យមានការក្រុមផ្តាច់ខ្លួនជ្រុលនិយមលុកលុយបង្កចលាចលនៅក្នុងប្រទេសរបស់ខ្លួននោះឡើយ ។
ប៉ូលិសអូស្ត្រាលីប្រដាប់ដោយកាំភ្លើងធុនធ្ងន់បានធ្វើប្រតិបត្តិការប្រឆាំងក្រុមជ្រុលនិយមចាប់តាំងពីខែកញ្ញា ឆ្នាំ២០១៤រហូតមកដល់ពេលនេះ គឺបានចាប់ខ្លួនមនុស្សប្រមាណ១៦នាក់ដែលពាក់ព័ន្ធជាមួយក្រុមភេរវកម្ម។ នេះជាប្រតិបត្តិការទ្រង់ទ្រាយធំដែលប៉ូលិសរហូតដល់៨០០នាក់ចូលរួមប្រតិបត្តិការប្រឆាំងក្រុមភេរវកម្មទាំងនេះ ។
កាលពីថ្ងៃទី១០ ខែធ្នូ ឆ្នាំ២០១៥ ប៉ូលិសទីក្រុងស៊ីដនីបានអះអាងថា ការចាប់ខ្លួននៅពេលនេះ មិនទាក់ទងការរៀបគម្រោងវាយប្រហារថ្មីណាមួយនៅក្នុងទឹកដីអូស្ត្រាលីនោះឡើយ ប៉ុន្តែតាមឯកសារតាមឯកសារសម្ងាត់បានបញ្ជាក់ថា ជនសង្ស័យមានគម្រោងវាយប្រហារទៅលើអគាររដ្ឋាភិបាល និងស្នាក់ការប៉ូលិស ៕
ប្រែសម្រួល៖ ថាច់ យ៉ាត
