ក្រសួងការពារជាតិអាហ្វហ្គានីស្ថានបានប្រកាសថា មនុស្សយ៉ាងតិច៣៧នាក់បានបាត់បង់ជីវិត ក្នុងនោះមានទាំងកុមារផងដែរ បន្ទាប់ពីការប៉ះទង្គិចគ្នារវាងកងកម្លាំងប៉ូលិសជាមួយនឹងក្រុមឧទ្ទាមតាលីបង់អាហ្វហ្គានីស្ថានដែលបានបើកការវាយប្រហារដោយប្រើកាំភ្លើងធុនធ្ងន់ស្ថិតនៅអាកាសយានដ្ឋាន Kandahar ភាគខាងត្បូងអាហ្វហ្គានីស្ថាន កាលពីថ្ងៃទី៩ ខែធ្នូ ឆ្នាំ២០១៥ ។
ជនរងគ្រោះត្រូវបានចាប់ជាចំណាប់ខ្មាំងរហូតដល់២៦ម៉ោង ប៉ុន្តែកងកម្លាំងទាហានអាហ្វហ្គានីស្ថាន នៅពេលនេះបានអះអាងថា បានគ្រប់គ្រងស្ថានភាពទាំងស្រុងហើយផងដែរ ។ នេះជាការវាយប្រហារភេរវកម្មថ្មីចុងក្រោយបំផុតដែលបង្កឡើងដោយក្រុមសកម្មប្រយុទ្ធតាលីបង់ ។
សូមបញ្ជាក់ផងដែរ កាលពីខែកញ្ញា ឆ្នាំ២០១៥កន្លងមកនេះ ក្រុមឧទ្ទាមតាលីបង់ក៏បានវាយប្រហារដណ្តើមគ្រប់គ្រងទីក្រុង Kunduz ភាគខាងជើងរបស់អាហ្វហ្គានីស្ថាននោះបានមួយរយៈពេលខ្លីផងដែរ ប៉ុន្តែក្រោយមកត្រូវកងកម្លាំងយោធាអាហ្វហ្គានីស្ថាន ដោយមានការគាំពារជួយជ្រោងពីលើដែនអាកាសរបស់កងទ័ពបរទេសផងនោះ ក្រុមឧទ្ទាមក៏បានរត់ខ្ចាត់ខ្ចាយអស់ពីទីប្រជុំ Kunduz នោះ ។
ក្រសួងការពារជាតិអាហ្វហ្គានីស្ថានបានអះអាងថា ក្រុមឧទ្ទាមតាលីបង់បានវាយប្រហារទៅលើអាកាសយានដ្ឋានខាងលើនេះ ដោយសម្លាប់មនុស្សយ៉ាងតិច៣៥នាក់ ។ ជុំវិញអាកាសយានដ្ឋាននោះ សុទ្ធតែជាលំនៅឋានរបស់មន្ត្រីយោធា និងជាបន្ទាយរបស់កងទ័ពណាតូផងដែរ ។
បណ្តាញទូរទស្សន៍ Tolo News TV បានផ្សព្វផ្សាយថា ក្រុមឧទ្ទាមបានស្លៀកពាក់ឯកសណ្ឋានបន្លំខ្លួនជាយោធាអាហ្វហ្គានីស្ថាន និងប្រដាប់ដោយអាវុធធុនធ្ងន់។ ពួកគេបានឆ្លងទម្លុះរបាំងរបងទី១ រួចចូលទៅកាន់អគារសាលារៀន រួចបាញ់ប្រហារជាមួយកងកម្លាំងសន្តិសុខដែលយាមកាមនៅទីនោះ ។
សាក្ស៊ីឃើញហេតុការណ៍ផ្ទាល់ភ្នែកបានអះអាងថា ក្រុមឧទ្ទាមតាលីបង់បានចាប់ជាចំណាប់ខ្មាំងក្រុមគ្រួសាររបស់កងកម្លាំង និងបានប្រើប្រាស់ចំណាប់ខ្មាំងទាំងនោះធ្វើជាឈ្នន់ ។ ប្រភពអះអាងថា គេបានឮសំឡេងរបស់កងកម្លាំងប្រដាប់អាវុធបញ្ជាឲ្យក្រុមឧទ្ទាមដោះលែងចំណាប់ខ្លួនដែលសុទ្ធតែស្ត្រី និងកុមារទាំងនោះឲ្យមានសេរីភាពវិញផងដែរ ។
លោក Ahmadullah Faizi ប្រធានអាកាសយានដ្ឋាន Kandahar បានប្រាប់ទីភ្នាក់ងារព័ត៌មាន AFP ថា អ្នកដំណើរខ្លះបានជាប់គាំងនៅក្នុងយន្តហោះ ដោយសារតែការវាយប្រហារនេះផងដែរ ។
មានការរិះគន់ដល់កងកម្លាំងសន្តិសុខអាហ្វហ្គានីស្ថានថា បានធ្វេសប្រហែលបណ្តោយឲ្យក្រុមឧទ្ទាមតាលីបង់បញ្ជូនអាវុធ និងបន្លំខ្លួនចូល វាយប្រហារបែបនេះ ។
អំពើហិង្សានៅក្នុងប្រទេសនេះមានការកើនឡើង ជាពិសេសចាប់ពីកងកម្លាំងណាតូ និងអាមេរិកដកចេញពីប្រទេសនេះកាលពីឆ្នាំកន្លងមកនោះ ។
ការវាយប្រហារចុងក្រោយនេះបានកើតឡើង បន្ទាប់ពីប្រធានាធិបតីអាហ្វហ្គានីស្ថាន លោក Ashraf Ghani បានអំពាវនាវឲ្យមានការជួយក្នុងសកម្មភាពប្រយុទ្ធប្រឆាំងទៅលើក្រុមភេរវកម្មនៅក្នុងទឹកដីអាហ្វហ្គានីស្ថាន ។
លោក Ashraf Ghani បានថ្កោលទោសចំពោះការវាយប្រហារនៅអាកាសយានដ្ឋាន Kandahar នេះ និងបានថ្លែងរំលែកមរណទុក្ខជាមួយក្រុមគ្រួសាររងគ្រោះផងដែរ ។ រដ្ឋមន្ត្រីក្រសួងការបរទេសអាហ្វហ្គានីស្ថាន លោក Salahuddin Rabbani ស្ថិតនៅក្នុងសន្និសីទសារព័ត៌មាន លោកបានអំពាវនាវឲ្យមានការចាប់ផ្តើមពិភាក្សារកសន្តិភាពជាមួយក្រុមឧទ្ទាមតាលីបង់ដែលកំពុងជាប់គាំងនោះឡើងវិញ ៕
ប្រែសម្រួល៖ ថាច់ យ៉ាត
