ក្រុមសង្កេតការណ៍សិទ្ធិមនុស្សរបស់អង្គការសហប្រជាជាតិបានជំរុញប្រទេសចិនឲ្យបញ្ឈប់ការធ្វើទារុណកម្មទៅលើអ្នកទោស ព្រមទាំងបញ្ឈប់ការឃុំឃាំងអ្នកទោសនៅក្នុងមន្ទីរឃុំឃាំងសម្ងាត់ទាំងអស់នៅក្នុងប្រទេសនេះ ។
គណៈកម្មការអង្គការសហប្រជាជាតិប្រឆាំងការធ្វើទារុណកម្មក៏បានអំពាវនាវឲ្យបញ្ឈប់ការចាត់វិធានការប្រឆាំងទៅលើមេធាវី និងក្រុមសកម្មជននៅក្នុងប្រទេសចិនផងដែរ ។
គណៈកម្មការអង្គការសហប្រជាជាតិប្រឆាំងការធ្វើទារុណកម្មដែលចេញរបាយការណ៍របស់ខ្លួននៅពេលនេះ គឺបន្ទាប់ពីតុលាការនៅក្នុងប្រទេសចិនបានបើកសវនាការរយៈពេលពីរថ្ងៃសាកសួរទៅលើប្រតិភូរដ្ឋាភិបាលចិនចំនួនច្រើននាក់រួចមកនោះ ។
គណៈកម្មការនេះបានផ្តល់ពេល១ឆ្នាំឲ្យរដ្ឋាភិបាលទីក្រុងប៉េកាំងកែទម្រង់ឲ្យបានប្រសើរឡើងស្របទៅតាមកតិកាសញ្ញាស្តីអំពីការប្រឆាំងការធ្វើទារុណកម្ម ។
តាមរបាយការណ៍ខាងលើនេះបានបញ្ជាក់ថា គណៈកម្មការមានការព្រួយបារម្ភចំពោះការនៅតែមានរបាយការណ៍ស្តីអំពីការធ្វើទារុណកម្ម និងការធ្វើទុក្ខបុកម្នេញ នៅតែបន្តកើតមានយ៉ាងជ្រាលជ្រៅក្នុងប្រព័ន្ធ យុត្តិធម៌ ដែលត្រួតពិនិត្យទៅលើការសារភាព និងមូលដ្ឋាននៃការចោទប្រកាន់នោះ ។
រដ្ឋាភិបាលចិនដែលបានធ្វើសវនាការពិនិត្យទៅលើរបាយការណ៍ស្តីអំពីការធ្វើទារុណកម្ម និងដែលមិនធ្លាប់ធ្វើឡើងតាំងពីឆ្នាំ២០០៨នោះ ចិនបានបដិសេធន៍ថាខ្លួនបានធ្វើទារុណកម្មទៅលើអ្នកទោសនយោបាយ និងបានអះអាងថា ខ្លួនបានហាមប្រាមមិនឲ្យមានការធ្វើទារុណកម្មទៅលើអ្នកទោសនយោបាយនោះឡើយ ។ ចិនបានចំអកដល់របាយការណ៍ខាងលើនេះ និងថាជាសកម្មភាពប្រឆាំងមកលើរដ្ឋាភិបាលក្រុងប៉េកាំង ។
គណៈកម្មការបានបញ្ជាក់ថា ក្រុមមេធាវីនៅក្នុងប្រទេសចិនរហូតដល់២០០នាក់បានស្ថិតក្រោមការធ្វើទុក្ខបុកម្នេញពីក្រុមអាជ្ញាធរចិនតាំងពីខែកក្កដារៀងមក ហើយរហូតមកដល់ពេលនេះ មេធាវីយ៉ាងតិច២៥នាក់ កំពុងស្ថិតនៅក្នុងមន្ទីរឃុំឃាំងនៅឡើយ ។ គណៈកម្មការនេះក៏បានព្រួយបារម្ភទៅលើអ្នកទោសដែលបាត់បង់ជីវិតនៅក្នុងពន្ធនាគារផងដែរ ។
កាលពីថ្ងៃ១០ ខែធ្នូ ឆ្នាំ២០១៥ អ្នកនាំពាក្យក្រសួងការបរទេសចិន លោក Hua Chunying បានថ្លែងការពារចំពោះការចោទប្រកាន់មកលើរដ្ឋាភិបាលចិនតាមរយៈរបាយការណ៍របស់គណៈកម្មការអង្គការសហប្រជាជាតិប្រឆាំងទៅលើការធ្វើទារុណកម្មនោះ ដោយលោកបានថ្លែងសង្ខេបជាមួយទីភ្នាក់ងារព័ត៌មាន ដេលីញូវថា នៅក្នុងប៉ុន្មានឆ្នាំចុងក្រោយនេះ រដ្ឋាភិបាលចិនបានសើកស្ទួយការអនុវត្តច្បាប់ និងការខិតខំប្រឹងប្រែងដើម្បីឲ្យបានប្រសើរឡើង ក្នុងនោះមានការអនុវត្តប្រឆាំងទៅលើការធ្វើទារុកម្មផងដែរ៕
ប្រែសម្រួល៖ ថាច់ យ៉ាត
