ខេត្តឧត្ដរមានជ័យ ៖ បេីគ្មានជំនាញច្បាស់លាស់ទេ កុំផ្សងគ្រោះថ្នាក់ កុំប្រើទម្លាប់ដែលមិនត្រឹមត្រូវ គ្រប់កិច្ចការដែលមានហានិភ័យពិតជាងាយបង្កអោយគ្រោះថ្នាក់ខ្លាំងណាស់។
មន្ត្រីស៊ីម៉ាក់បានសម្តែងការសោកស្តាយវិនាសកម្មមួយដែលបានកេីតឡេីងចំពោះពលរដ្ឋ៣នាក់ ដែលប្រកបរបរស៊ីឈ្នួលបោសសំអាតគ្រាប់មីន បានទទួលរងគ្រោះថ្នាក់បាត់បង់ជីវិតពីរនាក់ និង ម្នាក់ទៀតរួចផុតពីសេចក្តីស្លាប់ ក្រោយពីពួកគេ ប្រេីជំនាញដោះមីនខ្វះបច្ចេកទេស បណ្តាលអោយផ្ទុះ ។
មន្ត្រីក៏សូមអំពាវនាវបងប្អូនប្រជាពលរដ្ឋ ចៀស វាងដាច់ខាត កុំប្រកបមុខរបររកស៊ីដោះមីន ដោយគ្មានការហ្វឹកហ្វឺន និងសម្ភារបច្ចេកទេស មិនបានត្រឹមត្រូវ ហើយមុខរបរបែបនេះប្រឈមនិងប្រថុយប្រថានជីវិតខ្លួនឯង។
សេចក្ដីរាយការណ៍ថា ប្រជាពលរដ្ឋ៣នាក់ ស៊ីឈ្នួលបោសសំអាតគ្រាប់មីនបានទទួលរងគ្រោះថ្នាក់ផ្ទុះមីនតោន បណ្តាលឲ្យផ្ទុះស្លាប់២នាក់ និងម្នាក់ទៀតផុតពីគ្រោះថ្នាក់ ។ ហេតុការណ៍នេះកើតឡើងនៅវេលាម៉ោង១ និង១០នាទីរសៀល ថ្ងៃទី១៤ ខែមីនា ឆ្នាំ២០១៩ នៅលើដីចំការរបស់ឈ្មោះមាន សីហា ភេទប្រុស ចំណុចផ្លូវបារាំង ភូមិសែនសំ ឃុំអូរស្វាយ ស្រុកត្រពាំងប្រាសាទ ខេត្តឧត្ដរមានជ័យ។
អ្នកបាត់បង់ជីវិត ១-ឈ្មោះ ហុក រ៉ាឆាន់ អាយុ១៨ ឆ្នាំ រស់នៅ ភូមិព្រះអណ្តូង ឃុំស្តុកប្រវឹក ស្រុករុក្ខរី ខេត្តបាត់ដំបង , ២-ឈ្មោះមៅ កំសត់ ប្រុសអាយុ២០ឆ្នាំ រស់នៅ ភូមិត្រពាំងបី ឃុំព្រះប្រឡាយ ស្រុកត្រពាំងប្រាសាទ ខេត្តឧត្ដរមានជ័យ ។ ចំណែកអ្នកផុតពីសេចក្តីស្លាប់ ឈ្មោះ តែម ប៊ុនធីម អាយុ៤៩ឆ្នាំ រស់នៅភូមិត្រពាំងបី ឃុំព្រះប្រឡាយ ស្រុកត្រពាំងប្រាសាទ ខេត្តឧត្ដរមានជ័យ ៕ ដោយ ៖ ជាយក្រុង
