ខេត្តកំពង់ឆ្នាំង: មានករណីហិង្សាដោយចេតនាមួយ បណ្តាលឲ្យបុរសម្នាក់បែកក្បាលហូរឈាមកក្លាក់ ដោយសារពេលស្រវឹងស្រាមាត់មិននៅស្ងៀមបែរជាស្រែកច្រៀងនិង ជេរដៀមដាមដាក់ស្រ្តីម្នាក់ ធ្វើឲ្យនាងទ្រាំមិនបានទាញដំបងវាយក្បាលបុរសនេះតែម្តង ។
ករណីហិង្សាដោយចេតនានេះកើតឡើងកាលពី វេលាម៉ោង ៥ល្ងាច ថ្ងៃព្រហស្បតិ៍៧ កើត ខែចេត្រ ឆ្នាំ ច សំរឹទ្ធិស័ក ព.ស.២៥៦២ ត្រូវនឹងថ្ងៃទី១១ ខែមេសាឆ្នាំ ២០១៩ នៅចំណុចផ្ទះភូមិឃ្លាំងប្រាក់សង្កាត់ប្អេរ ក្រុងកំពង់ឆ្នាំង។
ក្រោយមានអំពើហិង្សានេះកើតឡើង ស្រ្តីជាជនសង្ស័យ ឈ្មោះ អ៊ូ ចាន់វ៉ាន់ អាយុ ២៩ឆ្នាំ មានទីលំនៅភូមិកើតហេតុខាងលើត្រូវបាននគរបាលឃាត់ខ្លួន ។រីជនរងគ្រោះឈ្មោះ អ៊ុ សុភ័ន្ត ភេទប្រុស អាយុ ២៥ឆ្នាំ មុខរបរកម្មករសំណង់ មានទីលំនៅ មិនពិតប្រាកដ ដែលរងរបួសបែកក្បាល ត្រូវបានគេដឹកយកទៅរុំរបួសនៅមន្ទីរពេទ្យភ្លាមៗដែរ ។
មន្រ្តីនគរបាលព្រហ្មទណ្ឌក្រុងកំពង់ឆ្នាំងបានឲ្យដឹងថា ករណីនេះកើតឡើងដោយសារមុនពេលកើតហេតុ ជនរងគ្រោះស្រវឹងស្រាដើរកាត់មុខផ្ទះស្រែកឡូឡានិង ច្រៀងដៀមដាមជេរប្រមាថទៅលើស្រ្តីសង្ស័យ ជាហេតុធ្វើឲ្យនាងទ្រាំលែងបានទាញដំបងវាយក្បាលជនរងគ្រោះរបួសធ្ងន់តែម្តង។
ក្រោយពេលកើតហេតុ ជនសង្ស័យ ត្រូវបានសមត្ថកិច្ចឃាត់ខ្លួន យកទៅអធិការដ្ឋាន ដើម្បីដោះស្រាយតាមនីតិវិធី ៕
