ភ្នំពេញ៖ បុរសម្នាក់បើករថយន្ដHILUXមួយគ្រឿងក្នុងល្បឿនលឿនដល់ចំណុចផ្លូវកែងមិនប្រយ័ត្នជ្រុលទៅបុកឃឿនសួនច្បារទ្រូងផ្លូវហើយរថយន្ដហោះផ្លោងទៅផ្លូវម្ខាងទៀតបណ្ដាលអោយទៅបុកជាមួយរថយន្ដទេសចរណ៍មួយគ្រឿងទៀតដែលធ្វើដំណើរបញ្ច្រាសទិសគ្នារងការខូចខាតនិងរបួសធ្ងន់ម្នាក់ ។

ហេតុការណ៍គ្រោះថ្នាក់ចរាណ៍នេះបានកើតឡើងកាលពីម៉ោងជិត១២យប់ថ្ងៃទី១៣ ខែធ្នូ ឆ្នាំ២០១៥ នៅតាមផ្លូវជាតិលេខ៦ ក្បែររង្វង់មូលជ្រោយចង្វាថ្មី ស្ថិតក្នុងសង្កាត់-ខណ្ឌជ្រោយចង្វា រាជធានីភ្នំពេញ ។

ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុគេបានឃើញរថយន្តមួយគ្រឿងម៉ាកHILUXពណ៍ខ្មៅ ពាក់ស្លាកលេខ ភ្នំពេញ2F-2457 បើកបរដោយបុរសម្នាក់ក្នុងល្បឿនលឿនដោយធ្វើដំណើរតាមបណ្ដោយផ្លូវជាតិលេខ៦ ទិសដៅពីជើងទៅត្បូង លុះមកដល់ចំណុចកើតហេតុផ្លូវមានសភាពកោងមិនបន្ថយល្បឿនក៏ជ្រុលបុកឃឿនសួនច្បារទ្រូងផ្លូវបណ្ដាលអោយរថយន្ដហោះផ្លោងទៅផ្លូវម្ខាងទៀតជ្រុលទៅបុករថយន្ដទេសចរណ៍មួយគ្រឿងទៀតពណ៍ស ពាក់ស្លាកលេខ ភ្នំពេញ3D-0601 ដែលធ្វើដំណើរបញ្ច្រាសទិសគ្នាពេញទំហឹងបណ្ដាលរងការខូចខាតទាំងសងខាង និងម្ចាស់រថយន្ដHILUX រងរបួសធ្ងន់ ។

ក្រោយកើតហេតុរថយន្ដសង្គ្រោះបន្ទាន់បានដឹកជនរងគ្រោះទៅសង្គ្រោះនៅមន្ទីរពេទ្យ ចំណែករថយន្ដទាំងពីរគ្រឿងត្រូវបានកម្លាំងជំនាញចុះធ្វើការវាស់វែងស្ទួចយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីរងចាំធ្វើការដោះស្រាយតាមនិតិវិធីច្បាប់ ៕

ដោយ៖ ជ្រោយពេជ្រ