ភ្នំពេញ៖ ជនមិនស្គាល់មុខបានបើករថយន្តឡិចសុីស៥៧០ ពណ៌ខ្មៅ មកបាញ់បុរសម្នាក់ដែលកំពុងតែអូសរទះដើររើសអេតចាយ បណ្ដាលឲ្យរងរបួសធ្ងន់ បង្កឲ្យមានការភ្ញាក់ផ្អើលដល់ប្រជាពលរដ្ឋនិងសមត្ថកិច្ចរួមទាំងកងកម្លាំងប្រដាប់អាវុធហត្ថក្រុងចុះដល់កន្លែងកើតហេតុភ្លាមៗ ដែលហេតុការនោះមានទីតាំងនៅតាមបណ្ដោយផ្លូវ១០៥ កែងនិងផ្លូវ៤៣២ ស្ថិតក្នុងសង្កាត់បឹងត្របែក ខណ្ឌចំការមន ។
ជនរងគ្រោះមានឈ្មោះវណ្ណ សុភាអាយុ៣៦ឆ្នាំ ស្នាក់នៅផ្ទះជួលម្តុំសង្កាត់ផ្សារដើមថ្កូវ ។ បើតាមការរៀបរាប់សម្ដីជនរងគ្រោះបានរៀបរាប់ប្រាប់ឲ្យដឹងថា មុនពេលកើតហេតុជនរងគ្រោះបានកំពុងតែអូសរទះដើររើសអេតចាយ តាមបណ្ដោយផ្លូវ៤៣២ កែងនិងផ្លូវ១០៥ ពេលនោះជនរងគ្រោះបានមកដល់ចំណុចកើតហេតុ រួចក៏ឱនរើសអេតចាយ ពេលនោះស្រាប់តែមានរថយន្តឡិចសីុស៥៧០ ពណ៌ខ្មៅ មួយគ្រឿងមិនចាំស្លាកលេខ បើកបរតាមបណ្តោយផ្លូវលេខ១០៥ ទិសដៅពីជើងទៅត្បូង ហើយបានបើកកញ្ចក់រថយន្តរួចបានដកកាំភ្លើងបាញ់សំដៅមកលើគាត់ចំនួន១គ្រាប់ ចំត្រង់ត្រគៀកខាងស្តាំដួលតែម្តង ហើយរថយន្តបានបន្ថែមល្បឿនគេចទៅបាត់តែម្តង។
បើតាមសាក្សីក្បែរកន្លែងកើតហេតុបាននិយាយថា គាត់ពិតជាបានលឺសម្លេងផ្ទុះពិតប្រាកដមែន ប៉ុន្តែមិនដឹងថាជាស្នូរកាំភ្លើងមែនឬក៏អត់ទេ តែឃើញរថយន្តសេរីទំនើបនោះបើកចេញពីកន្លែងមែន។
ក្រោយពេលកើតហេតុសមត្ថកិច្ចមូលដ្ឋានបានមកដល់កន្លែងកើតហេតុ ប៉ុន្តែរកមិនឃើញសំបកគ្រាប់នោះទេ ហើយក៏បានទំនាក់ទំនងទៅរថយន្តសង្គ្រោះបន្ទាន់ឲ្យមកដឹកជនរងគ្រោះទៅសង្គ្រោះដែរ តែបែរជាចាំយូរៗមិនឃើញក៏ត្រូវបានសមត្ថកិច្ចមូលដ្ឋានលើកដាក់ម៉ូតូដឹកយកទៅកាន់មន្ទីរពេទ្យមិត្តភាពខ្មែរសូវៀត ដើម្បីជួយសង្គ្រោះភ្លាមៗតែម្ដង ៕
ដោយ៖ ភារ៉ា ដង្កោ
