ភ្នំពេញ៖ ឧប្បត្តិហេតុគ្រោះថ្នាក់ចរាចរណ៍មួយគឺដោយសារតែយុវជនម្នាក់បានបើកបររថយន្ត  មួយគ្រឿងក្នុងល្បឿនលឿនជ្រុលទៅបុករនាំងដែកពុះចែកទ្រូងផ្លូវបណ្តាលឱ្យរងការខូចខាតចំនួន6ផ្ទាំង ចំណែករថយន្តខូចខាតផ្នែកខាងមុខ តែមិនមានអ្នករងរបួសនោះទេ ។

ហេតុការណ៍ខាងលើនេះបានកើតឡើងកាលពីវេលាម៉ោង៧ព្រឹកថ្ងៃទី១៥ ខែឆ្នូ ឆ្នាំ២០១៥ តាមបណ្តោយផ្លូវសហព័ន្ធរុស្សីស្ថិតនៅភូមិសេបេសេ សង្កាត់ទឹកថ្លា ខណ្ឌសែនសុខ ។

​សាក្សីនៅកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញរថយន្តមួយគ្រឿងម៉ាក ឆែរ៉ូលែត ពណ៍ស ពាក់ស្លាកលេខភ្នំពេញ 2AI-3333 បើកបរដោយបុរសម្នាក់ បើកបរតាមបណ្តោយផ្លូវសហព័ន្ធរុស្សី ទិសដៅពីលិចទៅកើតក្នុងល្បឿនយ៉ាងលឿន ខណៈមកដល់ចំណុចកើតហេតុ ក៏រេចង្កូតជ្រុលទៅបុករនាំងដែក ពុះចែកទ្រូងផ្លូវពេញទំហឹង បណ្តាលឱ្យបាក់អស់ចំនួន6ផ្ទាំង ចំណែករថយន្តរងការខូចខាតយ៉ាងដំណំផ្នែកខាងមុខ តែមិនបង្កអោយនរណាម្នាក់រងរបួសនោះទេ ។

​ក្រោយកើតហេតុសមត្ថកិច្ចមូលដ្ឋានបានចុះមកអន្តរាគមន៍ដល់កន្លែងកើតហេតុ និងបានសហការជាមួយជំនាញ ធ្វើការវាសង់វែងនិងស្តូចយករថយន្តទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយនាពេលក្រោយ ៕

ដោយ៖ តុង សីហា