ភ្នំពេញ ៖ បុរសម្នាក់ទំនងជាស្រវឹងស្រា បានបើករថយន្តស៊េរីទំនើបម៉ាកRANGE ROVER ក្នុងល្បឿនលឿន ហើយរេចង្កូតជ្រុលទៅបុកបង្គោលភ្លើង និងបង្គោលប៉ាណូវីងវេលុយបាក់អស់ចំនួន២ដើម បណ្ដាលឲ្យរងការខូចខាតយ៉ាងដំណំ និងធ្វើឲ្យដាច់ភ្លើងងងឹតផ្ទះប្រជាពលរដ្ឋជាច្រើនគ្រួសារ កាលពីវេលាម៉ោង២និង៣០នាទី រំលងអធ្រាត្រ ឈានចូលថ្ងៃពុធ ទី៨ ខែឧសភា ឆ្នាំ២០១៩ ទុលមុខនិងផ្សារ បឹងតាម៉ាត ផ្លូវបេតុងបឹងតាម៉ាត ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ។
យោងតាមប្រភពពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញ បុរសមិនស្គាល់អត្តសញ្ញាណម្នាក់ វ័យប្រហែល ជាង៣០ឆ្នាំ មិនដឹងថាចេញពីកម្មវីធីផឹកស៊ីនៅទីណានោះទេ ដោយមានស្ថានភាពស្រវឹង និងធ្វើដំណើរតាមផ្លូវ បេតុង បឹងតាម៉ាត ក្នុងទិសដៅ ពីលិចទៅកើត ក្នុងល្បឿនលឿន ខណៈមកដល់ចំនុចកើតស្រាប់តែ រេចង្កូតទៅខាងឆ្វេងដៃ ជ្រុលទៅបុក និងបង្គោលភ្លើងបេតុងនិង បង្គោលប៉ាណូវីង វេលុយនិងដកលុយ បាក់ដាច់ខ្ទាត សង្កត់លើរថយន្ត តែសំណាងដែរមិនមានគ្រោះថ្នាក់ដល់ មនុស្សណាម្នាក់នោះទេ ។
ដោយឡែក រថយន្តបង្កក៏រងការខូចខាត ខ្ទេចផ្នែកខាងមុខយ៉ាងដំណំផងដែរ ។ ភ្លាមនោះដែរ ក៏មានអ្នកបើករថយន្ត ស៊ីរ៉ែន មកដឹក អ្នកបើករថយន្តបង្កហេតុចេញទៅបាត់ ដោយបន្សល់ទុករថយន្ត បង្កនៅនិងកន្លែងឲ្យសមត្ថកិច្ចជំនាញចរាចរណ៍ចុះទៅស្ទូចយកទៅរក្សាទុកនៅការរិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយនៅពេលក្រោយ៕ដោយ៖ ភារ៉ា ដង្កោ
