ភ្នំពេញ៖ ទំនាស់រឿងមេភូមិសុំដាក់អំពូលភ្លើងតាមផ្លូវសាធារណៈ ធ្វើឲ្យមនុស្សពីរក្រុមប្រើហិង្សាដាក់គ្នា និងប្រើប្រាស់អាវុធការពារខ្លួនរៀងៗខ្លួនដោយម្ខាងជាភាគីមេភូមិមានដាវសាមូរ៉ៃ និងម្ខាងទៀតមានកាំភ្លើងខ្លី បានបើកឆាកប្រយុទ្ធគ្នា យ៉ាងស៊ីសាច់ហុតឈាម ហើយទីបំផុតធ្វើឲ្យភាគីម្ខាងមានម្នាក់ជាមេភូមិនិងកូនប្រុសបានបាត់បង់ជីវិតនិងចៅម្នាក់រងរបួសធ្ងន់។ រីឯភាគីម្ខាងទៀតមានម្នាក់រងរបួសធ្ងន់ដែរត្រូវបានដឹកយកទៅសង្រ្គោះនៅមន្ទីរពេទ្យកាល់ម៉ែត ព្រមទាំងម្នាក់ទៀតត្រូវបានសមត្ថកិច្ចឃាត់ខ្លួនយកទៅសាកសួរ ។
ហេតុការណ៍នេះបានកើតឡើងកាលពីវេលាម៉ោង ៣ និង ៤០ នាទីរសៀល នៅចំណុចមុខផ្ទះលេខ២២C ក្រុម៣៣ ភូមិ៤ ផ្លូវលេខ៣៥៨ សង្កាត់ទួលស្វាយព្រៃទី១ ខណ្ឌចំការមន ។
ជនរងគ្រោះដែលស្លាប់ និងរបួសក្នុងពេលប្រើអំពើហិង្សាខាងលើនេះមានឈ្មោះ ទី១-ជប់ ឡាយ ភេទប្រុស អាយុ៥២ឆ្នាំ ជាប្រធានភូមិ(ស្លាប់)/ ទី២ឈ្មោះប៊ុន លឿន ភេទប្រុស អាយុ២៨ឆ្នាំ ជាកូនប្រធានភូមិ(ស្លាប់) និងទី៣-ឈ្មោះប៊ុន រិទ្ធី ភេទប្រុស អាយុ១៨ឆ្នាំ ជាចៅប្រធានភូមិ(រងរបួសធ្ងន់) ។ ចំណែកភាគីម្ខាងទៀតដែលមានកាំភ្លើងខ្លីឈ្មោះកែវ ឫទ្ធី ភេទប្រុស អាយុ២៧ឆ្នាំ មានទីលំនៅភូមិ-សង្កាត់កើតហេតុខាងលើ ។ ដោយឡែកមនុស្សម្នាក់ទៀតជាភាគីរបស់ជនមានកាំភ្លើងខ្លីឈ្មោះស៊ុំ សារិទ្ធ ភេទប្រុស អាយុ៣២ឆ្នាំ ត្រូវបានសមត្ថកិច្ចឃាត់ខ្លួនយកទៅសាកសួរនៅអធិការដ្ឋាននគរបាលខណ្ឌចំការមន ក្រោយកើតហេតុភ្លាមៗ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុលោកប្រធានភូមិ ឈ្មោះ ជប់ ឡាយ រួមជាមួយកូន និងចៅប្រុសបានដើរទៅប្រាប់ប្រជាពលរដ្ឋនៅក្នុងភូមិដើម្បីយកអត្តសញ្ញាណប័ណ្ណចាស់ទៅប្តូរយកអត្តសញ្ញាណប័ណ្ណថ្មីវិញ ព្រោះអត្តសញ្ញាណប័ណ្ណចាស់អស់សុពលភាពហើយ។ លុះធ្វើដំណើរមកដល់ផ្ទះលេខ២២Cត្រង់ចំណុចកើតហេតុខាងលើបានជួបបុរសឈ្មោះកែវ រិទ្ធី និង សាច់ញាតិម្នាក់ទៀតដែលនគរបាលឃាត់ខ្លួននោះបានចេញមកសួរថា ផ្លូវនៅមុខផ្ទះងងឹតណាស់ ព្រោះអត់អំពូលភ្លើងបំភ្លឺ។ ពេលនោះលោកប្រធានភូមិក៏ប្រាប់ថា បើគ្មានអំពូលភ្លើងទេ មានតែយើងទាំងអស់គ្នាជួយចេញលុយទិញអំពូលភ្លើងមកដាក់ដើម្បី បានភ្លឺទាំងអស់គ្នា ។
ប្រភពព័ត៌មានដដែលបានឲ្យដឹងទៀតថា បន្ទាប់ពីមានចម្លើយនេះធ្វើឲ្យឈ្មោះកែវ ឫទ្ធី ខឹងសម្បានឹងលោកមេភូមិថា ជាអ្នកបម្រើប្រជារាស្រ្តរឿងអ្វីឲ្យប្រជារាស្រ្តចេញលុយទិញអំពូលភ្លើង? ករណីនេះធ្វើឲ្យមាន ទំនាស់គ្នាឡើងរហូតជេរដៀមដាមដាក់គ្នាទៅវិញទៅមកហើយពេលនោះភាគីលោកប្រធានភូមិទំនងជាទ្រាំ មិនបានក៏ស្ទុះយកដាវសាមូរ៉ៃទៅកាប់ភាគីម្ខាងហើយដោយឃើញដូច្នេះឈ្មោះកែវ ឫទ្ធី បានដកកាំភ្លើងខ្លីម៉ាកបេរ៉េតា បាញ់សម្តៅប្រធានភូមិបណ្តាលឲ្យស្លាប់នៅនឹងកន្លែង។ ពេលឃើញដូច្នេះកូនប្រុសនិងចៅប្រធានភូមិបានស្ទុះទៅប្រតាយប្រតបជាមួយឈ្មោះកែវ ឫទ្ធី ធ្វើឲ្យឈ្មោះនេះទ្រាំមិនបានបាញ់ជាច្រើនគ្រាប់ទៀត(អស់១៥គ្រាប់)និងធ្វើឲ្យគ្រាប់កាំភ្លើងដែលពេលមានការប្រតាយប្រតបនោះត្រូវខ្លួនឯងផងត្រូវភាគីគូទំនាស់ផងរងរបួសធ្ងន់ទាំងអស់គ្នា ។
ក្រោយមកអ្នករងគ្រោះទាំង៣នាក់ត្រូវបានគេដឹកយកទៅសង្គ្រោះនៅមន្ទីរពេទ្យកាល់ម៉ែតហើយទីបំផុតមួយសន្ទុះក្រោយមកឈ្មោះប៊ុន លឿន ជាកូនប្រធានភូមិដែលរងរបួសធ្ងន់នោះបានបាត់បង់ជីវិតនៅក្នុងមន្ទីរពេទ្យតែម្តង ៕
ដោយ៖ ស រស្មី
មឈូស៣ រោងបុណ្យតែមួយក្រោយអំពើហិង្សាបាញ់សម្លាប់គ្នារឿងលុយ៥០ដុល្លារ
