ភ្នំពេញ៖ បុរសជាអ្នករើសអេតចាយ នៅកណ្ដាលរាជធានីភ្នំពេញម្នាក់ដែល រងការបាញ់ប្រហារពីអ្នកបើករថយន្ដ ទំនើបម្នាក់កំពុងស្ថិតក្នុងការសង្គ្រោះ បន្ទាន់នៅមន្ទីរពេទ្យហើយបានដង្ហោយ រកយុត្ដិធម៌ដោយស្នើឱ្យសមត្ថកិច្ចចាប់ខ្លួនជនប្រព្រឹត្ដមកផ្ដន្ទាទោសតាមច្បាប់។ ឆ្លើយតបនឹងករណីនេះមន្ដ្រីជាន់ខ្ពស់ ក្រសួងមហាផ្ទៃអះអាងថា សមត្ថកិច្ច កំពុងស្វែងរកជនប្រព្រឹត្ដទោះអ្នកប្រព្រឹត្ដនោះជានរណាក៏ដោយត្រូវតែទទួល ទោសតាមច្បាប់ ។
បុរសរងគ្រោះឈ្មោះ វ៉ាន សុភា អាយុ៣៦ឆ្នាំ មានប្រពន្ធឈ្មោះ សុខ ពាន និងមានកូនបីនាក់ក្នុងបន្ទុកថែមទាំងជួយ ចិញ្ចឹមក្មួយ៣នាក់ទៀតផង ។ ប្ដីប្រពន្ធ ប្រកបរបររើសអេតចាយនេះស្នាក់នៅក្នុង ភូមិ៥ ក្រុម៣១ សង្កាត់ផ្សារដើម ថ្កូវ ខណ្ឌចំការមន ហើយបុរសជាប្ដីបាន រស់នៅក្នុងរាជធានីភ្នំពេញតាំងពីដើម មក ចំណែកប្រពន្ធមានស្រុកកំណើតនៅ ខេត្ដកំពង់ចាម ។ បុរសរងគ្រោះកំពុង ស្ថិតក្នុងសភាពសង្គ្រោះបន្ទាន់នៅមន្ទីរ ពេទ្យមិត្ដភាពខ្មែរ-សូវៀតដែលកម្រើក ខ្លួនស្ទើរតែមិនបាននោះមកទល់ពេល នេះក្រុមគ្រូពេទ្យបានវះកាត់យកគ្រាប់ កាំភ្លើងចេញរួចហើយ ។
ស្ថិតក្នុងសភាពស្លេកស្លាំងសម្រាក លើគ្រែកំពុងបញ្ចូលខ្យល់អុកស៊ីហ្សែន បុរសរូបនេះបានរៀបរាប់ទាំងសំឡេង ខ្សាវៗនៅថ្ងៃទី១៦ ខែធ្នូថា នៅពេលនេះ គាត់ឈឺចាប់ខ្លាំងនៅកន្លែងរបួសនិង កន្លែងវះកាត់យកគ្រាប់កាំភ្លើងចេញ។ គាត់ប្រាប់ថា គាត់មិនដែលស្គាល់ជន បង្កហេតុទេហើយក៏មិនដឹងមកពីមូល ហេតុអ្វីដែលនាំឱ្យមានការបាញ់ប្រហារ លើរូបគាត់ដែរ ។
ជនរងគ្រោះ វ៉ាន សុភា បានឱ្យដឹងថា នៅយប់កើតហេតុក្នុងពេលគាត់កំពុង រើសអេតចាយពីគំនរសំរាមនៅម្ដុំលូទឹកស្អុយនិងបានចតរទេះដាក់អេតចាយនៅ តាមបណ្ដោយផ្លូវនោះស្រាប់តែបុរស ម្នាក់ដែលមិនស្គាល់មុខបានទាញកាំភ្លើង បាញ់មកលើរូបគាត់ហើយក៏បើករថ យន្ដគេចបាត់ស្រមោលទៅ ។
សាក្សីនៅកន្លែងកើតហេតុឱ្យដឹងថា មូលហេតុបណ្ដាលឱ្យមានការបាញ់ ប្រហារនេះ ព្រោះបុរសជាអ្នករើសអេត ចាយចតរទេះធ្វើឱ្យទើសផ្លូវធ្វើចរាចរណ៍ របស់បុរសបើករថយន្ដទំនើបនៅយប់ កើតហេតុនោះ ។ បុរសឈ្មោះ ឯក សំណាង ជាអ្នករស់នៅជិតខាងនឹងជនរងគ្រោះ បានប្រាប់ថា អ្នកទាំងពីរមិនដែលមាន ទំនាស់ជាមួយអ្នកជិតខាងឬលួចអីវ៉ាន់ របស់អ្នកណានោះទេ ។ លោកថាប្ដី ប្រពន្ធនេះក្រៅពីមានជីវភាពក្រលំបាក ហើយថែមទាំងឈឺញឹកញាប់ទៀតផង ។
ចំណែកភរិយារបស់លោក វ៉ាន សុភា អ្នកស្រី សុខ ពាន ដែលជាអ្នកដើររើស អេតចាយដែរនោះនិងកំពុងថែរក្សា ស្វាមីនៅមន្ទីរពេទ្យបានរំលឹកពីព្រឹត្ដិ ការណ៍ដែលកើតឡើងនៅយប់នោះថា នៅពេលអ្នកស្រីទៅដល់កន្លែងកើត ហេតុឃើញប្ដីរបស់អ្នកស្រីដេកដួលលើផ្លូវហូរឈាមសស្រាក់ ។ ដោយសារប្ដី អ្នកស្រីជាអ្នករើសអេតចាយគ្មានរថយន្ដសង្គ្រោះបន្ទាន់មកដឹកបញ្ជូនទៅមន្ទីរ ពេទ្យនោះទេ ។ អ្នកស្រីថា ពេលនោះ កុំតែបាននគរបាលសង្កាត់បឹងត្របែក យកម៉ូតូផ្ទាល់ខ្លួនដឹកប្ដីអ្នកស្រីមកមន្ទីរ ពេទ្យ ។ អ្នកស្រីស្នើឱ្យសមត្ថកិច្ចតាម ចាច់ខ្លួនបុរសដែលបាញ់ប្ដីរបស់អ្នកស្រី ដើម្បីផ្ដន្ទាទោសតាមច្បាប់និងទាមទារឱ្យជនប្រព្រឹត្ដផ្ដល់សំណងមកអ្នកស្រីឱ្យ បានសមរម្យ ។
ទាក់ទងនឹងបញ្ហានេះអ្នកនាំពាក្យ ក្រសួងមហាផ្ទៃលោកនាយឧត្ដមសេនីយ៍ ខៀវ សុភ័គ បានឱ្យដឹងថា លោកបានដឹង រឿងនេះហើយហើយពេលនេះសមត្ថកិច្ចកំពុងស្រាវជ្រាវរកជនដៃដល់ ។ លោក បន្ដថា ច្បាប់មិនលើកលែងទោសចំពោះ អ្នកប្រព្រឹត្ដបទល្មើសទេ ហើយលោកថា ករណីនេះគ្មានអ្វីជាអាថ៌កំបាំងនោះទេ យ៉ាងណាកម្លាំងនគរបាលនឹងចាប់ខ្លួនជនដៃដល់មកផ្ដន្ទាទោសឱ្យបាន ៕
ដោយ៖ វិបុល
