ភ្នំពេញ៖ យុវជនពីរនាក់បានរងរបួសធ្ងន់ និងស្រាល ខណៈកំពុងជិះម៉ូតូបទឆ្លងផ្លូវហើយត្រូវបានរថយន្តមួយគ្រឿងបើកក្នុងល្បឿនលឿនដែលមិនប្រយ័ត្នបានជ្រុលមកបុកពេញទំហឹងតែម្ដង ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១១និង១០នាទីយប់ ថ្ងៃទី១៧ ខែធ្នូ ឆ្នាំ២០១៥ នៅតាមបណ្ដោយផ្លូវម៉ៅសេទុង កែងផ្លូវ៦៣ ស្ថិតក្នុងសង្កាត់បឹងកេងកង១ ខណ្ឌចំការមន ។
បើតាមសាក្សីដែលឃើញហេតុការណ៍នេះបានឲ្យដឹងថា មុនពេលកើតហេតុគេបានឃើញយុវជនពីរនាក់ជិះម៉ូតូមួយគ្រឿងម៉ាកហង់ដាធូដេ ពណ៌ក្រហម គ្មានស្លាកលេខ ជិះក្នុងទិសដៅពីជើងទៅត្បួង(ផ្លូវ៦៣)ក្នុងល្បឿនល្មមហើយបានជិះឆ្លងផ្លូវម៉ៅសេទុង ខណះមកដល់ពាក់កណ្ដាលផ្លូវ ស្រាប់តែមានរថយន្តមួយគ្រឿងម៉ាក កាមរីបាឡែន ពណ៌ស្ក មិនចាំស្លាកលេខ បើកតាមបណ្ដោយផ្លូវម៉ៅសេទុងទិសដៅពីលិចទៅកើត ក្នុងល្បឿនលឿនហើយមកបុកម៉ូតូពេញទំហឹងបណ្ដាលឲ្យយុវជនម្នាក់បាក់ជើងស្ដាំម្ខាង និងម្នាក់ទៀតរងរបួសស្រាល ។
ក្រោយពេលកើតហេតុរថយន្តបង្កបានបន្តល្បឿនបើកគេចខ្លួនបាត់ស្រមោល ក្រោយមកជនរងគ្រោះដែលរបួសធ្ងន់ត្រូវបានថយន្តសាមុយដឹកយកទៅសង្គ្រោះនៅមន្ទីពេទ្យឯកជន រីឯម៉ូតូត្រូវបានមិត្តភក្តិជួយយកទៅផ្ទះតែម្ដង ៕
ដោយ៖ ភារ៉ា ដង្កោ
