ភ្នំពេញ៖ នារីម្នាក់បើករថយន្តកូរ៉ូឡាគេចជាមួយនឹងរថយន្តមួយគ្រឿងមិនបានប្រុងប្រយ័ត្នបានជ្រុលទៅ បុករថយន្តនីសាន់ចំពីមុខពេញទំហឹងបណ្តាលអោយរងការខូចខាតយ៉ាងដំណំ ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង១០ និង២០នាទីយប់ ថ្ងៃទី២០ ខែធ្នូ ឆ្នាំ២០១៥ តាមបណ្តោយផ្លូវលេខ៣១៥ ស្ថិតក្នុងសង្កាត់បឹងកក់ទី១ ខណ្ឌទួលគោក។
សាក្សីនៅកន្លែងកើតហេតុបានអោយដឹងថា មុនពេលកើតហេតុគេបានឃើញរថយន្តកូរ៉ូឡា ពណ៍ក្រហម ពាក់ស្លាកលេខ 2A 8063 បើកបរដោយនារីវ័យជាង២០ឆ្នាំនិងនារីម្នាក់ទៀតរួមដំណើរជាមួយ បានបើកតាមបណ្តោយផ្លូវលេខ៣១៥ ទិសដៅពីកើតទៅលិច ពេលមកដល់កន្លែងកើតហេតុបានគេចជាមួយរថយន្តមិនចាំម៉ាកមួយគ្រឿង ហើយក៏ជ្រុលទៅបុករថយន្តនីសាន់មួយគ្រឿងទៀតដែលបើកបញ្ច្រាសតីស ដែលពាក់ស្លាកលេខ ភ្នំពេញ 2AL 7279 ចំពីមុខពេញទំហឹង រងការខូចខាតយ៉ាងដំណំ ហើយនារីក្នុងរថយន្តកូរ៉ូឡារងរបួសធ្ងន់និងស្រាល។
ក្រោយកើតហេតុសមត្ថកិច្ចមូលដ្ឋានបានសហការជាមួយជំនាញធ្វើការវាស់វែង និងស្ទូចយកទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយនាពេលក្រោយ ៕
ដោយ៖ ចាន់ធឿន
