ខេត្តកំពង់ចាម ៖ ពិធីប្រកាសផ្ទេរតំណែងអភិបាលខេត្តកំពង់ចាម បានរៀបចំធ្វើជាផ្លូវការហើយ នៅរសៀលថ្ងៃទី២៨ ខែមិថុនា ឆ្នាំ២០១៩នេះ ខណៈគេដឹងថា អ្នកដែលត្រូវទទួលជំនួសតំណែងលោក គួច ចំរើន គឺលោក អ៊ុន ចាន់ដា ។ ពិធីនេះរៀបចំឡើងក្រោមអធិបតីភាពសម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ។
ដោយឡែក លោក ប្រាក់ សុវណ្ណ ដែលជាអភិបាលរងខេត្តស្វាយរៀង បានប្រកាសផ្ទេរមកកាន់តំណែងជំនួសលោក អ៊ុន ចាន់ដា ជាអភិបាលខេត្តព្រះវិហារ កាលថ្ងៃពីម្សិលមិញ មុនមួយថ្ងៃ លោក អ៊ុន ចាន់ដា ប្រកាសចូលកាន់តំណែងជាអភិបាលខេត្តកំពង់ចាមនៅក្នុងថ្ងៃសុក្រនេះ ។
គួរបញ្ជា្កក់ថា ការផ្លាស់ប្តូរតំណែងបន្ទាប់ពីកើតមានឧបទ្ទេវហេតុនៃការបាក់រលំអគារ៧ជាន់នៅខេត្តព្រះសីហនុ ហើយលោក យន្ត មីន បានសុំលាលែងពីតួនាទីអភិបាលខេត្តព្រះសីហនុ ។ ទាំងលោក អ៊ុន ចាន់ដា លោក ប្រាក់ សុវណ្ណ និងលោក គួច ចំរើន សុទ្ធតែត្រូវតែងតាំងតាមព្រះរាជក្រឹត្យ ចុះកាលពីថ្ងៃទី២៤ ខែមិថុនា ឆ្នាំ២០១៩ ។
អ្វីដែលគួរកត់សម្គាល់ នៅក្នុងលិខិតសរសេរដាក់ជូនសម្តេចនាយករដ្ឋមន្ត្រី ហ៊ុន សែន នាយករដ្ឋមន្ត្រីនៃកម្ពុជា កាលពីថ្ងៃទី២៤ ខែមិថុនា សម្តេចក្រឡាហោម ស ខេង បានលើកឡើងពីគុណសម្បត្តិរបស់លោក អ៊ុន ចាន់ដា ថាទទួលបានការគាំទ្រ និងសម្រេចបានសមិទ្ធផលជាច្រើនក្នុងតួនាទីជាអភិបាលខេត្តព្រះវិហារកន្លងមក។
«ការផ្ទេរភារកិច្ចមកកាន់ខេត្តធំជាងនេះ ក្នុងគោលបំណងផ្តល់ឱកាសដល់លោក អ៊ុន ចាន់ដា ដើម្បីបន្តការខំប្រឹងប្រែងដឹកនាំ និងសម្របសម្រួលការងារនៅកំពង់ចាម ស្របតាមសមត្ថភាព និងបទពិសោធន៍កន្លងមក»។ នេះបើតាមការគូសបញ្ជាក់របស់សម្តេច ស ខេង។
នៅលើទំព័រហ្វេសប៊ុករបស់លោក គួច ចំរើន បានសរសេរសារយ៉ាងខ្លីដែលមានខ្លឹមសារថា ៖ «គិតត្រឹមរសៀលនេះ រយៈពេល២ឆ្នាំ និង១ថ្ងៃកន្លះ ដែលខ្ញុំចូលកាន់តំណែង ជាអភិបាលខេត្តកំពង់ចាម បេីទោះបីជារយះពេលខ្លី ក៏មនោសញ្ជោតនា ដួងចិត្តរបស់ខ្ញុំ បានចងចាំ និងដក់ជាប់ក្នុងក្រអៅបេះដូងជានិច្ច នូវទឹកចិត្តដ៏ល្អប្រពៃ ស្វាមន៍ រួសរាយរាក់ទាក់សោមនស្ស របស់ព្រះសង្ឃ មន្ត្រីរាជការ ប្រជាជនទូទាំងខេត្តកំពង់ចាម ដែលចូលរួមសហការក្នុងដំណេីរការងាររដ្ឋបាល និងការអភិវឌ្ឍខេត្តកំពង់ចាមទទួលបានជោគជ័យ»។
ខ្ញុំសូមជូនពរប្រជាពលរដ្ឋទាំងអស់ជួបតែសេចក្តីសុខ សុខភាពល្អ និងរកទទួលទានកាន់តែរីកចំរើន ៕ ដោយ ៖ វណ្ណៈ
