សារព័ត៌មានរ៉យទ័របានផ្សាយថា៖បារាំងបានស្នើអាមេរិក មិនត្រូវអូសណាតូ ឲ្យចូលក្នុងសង្គ្រាមប្រដាប់អាវុធនៅតំបន់ឈូងសមុទ្រនោះឡើយ ។ ការស្នើរខាងលើក្រោយពេល ទីក្រុងវ៉ាស៊ីនតោននិង តេអ៊ីរ៉ង់ប្រឈមមុខតានតឹងយ៉ាងខ្លាំង អាចផ្ទុះអាសង្គ្រាមគ្រប់ពេល ។
សំណើរខាងលើរបស់បារាំងកើតឡើង ក្រោយជំនួបពិភាក្សាសម្ងាត់ រវាង មន្ត្រីការបរទេសបារាំងនិងរដ្ឋមន្ត្រីការពារជាតិអាមេរិកលោក Mark Esper កាលពីថ្ងៃទី២៧ខែមិថុនា ។តំណាងប្រទេសអាល្លឺម៉ង ក៏បានឯកភាពជាមួយបារាំង ក្នុងការរារាំងណាតូ ធ្លាក់ចូលក្នុងសង្គ្រាមជាមួយអ៊ីរ៉ង់។
ក្នុងពេលជាមួយគ្នា នោះ រដ្ឋមន្ត្រីការពារជាតិអាមេរិក បានលើកឡើងថា ទីក្រុងវ៉ាស៊ីនតោន មិនបានស្វែងរកការធ្វើសង្គ្រាមជាមួយអ៊ីរ៉ង់នោះឡើយ។ ប៉ុន្តែអាមេរិក និងមិនលើកលេង ប្រសិនបើអ៊ីរ៉ង់បន្តបាញ់ប្រហារទៅលើយន្តហោះចម្បាំងអាមេរិក។
រដ្ឋមន្ត្រីការពារជាតិ ណាតូបានជួបប្រជុំនៅទីក្រុង ប៊្រុចសែល កាលពីថ្ងៃទី២៧ខែមិថុនា ដោយពិភាក្សាផ្តោតសំខាន់ទៅលើបញ្ហាអ៊ីរ៉ង់ ក៏ដូចជា សន្ធិសញ្ញាអាវុធបរមាណូរយៈចម្ងាយមធ្យម ព្រមទាំង ការទិញមីស៊ីលពីរុស្ស៊ីរបស់តួកគី ផងដែរ។
ជាមួយគ្នានេះប្រធានាធិបតិចិន លោកស៊ី ជីនពីង បានលើកឡើងថា តំបន់ឈូងសមុទ្រពែកបានធ្លាក់ក្រោមស្ថាន ភាពដ៏រសើបមួយ និងកំពុងឈរនៅលើផ្លូវបំបែករវាងសង្រ្គាមនិងសន្តិភាព។
លោកប្រធានាធិបតីចិន បាននិយាយបែបនេះ ក្នុងឱកាសជួបពិភាក្សាជាមួយអគ្គលេខាធិការនៃអង្គការសហប្រជាជាតិ លោក អាន់តូនីញ៉ូ ហ្គូតឺរ៉ែស (Antonio Guterres) នៅមុនការបើកកិច្ចប្រជុំនៃប្រទេសមានសេដ្ឋកិច្ចកំពូលៗទាំង២០ ហៅថា G20 ឬ Group of 20 ដែលត្រូវរៀបចំឡើងនៅក្នុងទីក្រុងអូសាកា (Osaka) របស់ប្រទេសជប៉ុន ចាប់ពីថ្ងៃសុក្រនេះ រហូតដល់ថ្ងៃសៅរ៍ ស្អែក។ ទាក់ទងនឹងស្ថានភាពនៅតំបន់ឈូងសមុទ្រពែក លោក ស៊ី បានអះអាងថា ប្រទេសលោកឈរនៅខាងសន្តិភាពជានិច្ច ហើយប្រឆាំងដាច់ខាតចំពោះសង្រ្គាម។
គួរជម្រាបថា ក្តីព្រួយបារម្ភកាន់តែខ្លាំងថា ជម្លោះនឹងផ្ទុះឡើងនៅតំបន់ឈូងសមុទ្រពែក បានកើតឡើង ចាប់តាំងពី មានករណី វាយ ប្រហារលើនាវាដឹកប្រេងនៅក្បែរច្រកសមុទ្រហកមូស (Hormuz) កាលពីខែឧសភា និងខែមិថុនានេះ ខណៈអ៊ីរ៉ង់គឺជាអ្នក ទទួល រងការទម្លាក់កំហុស បូករួមជាមួយការដែលយោធាអ៊ីរ៉ង់បានបាញ់ទម្លាក់យន្តហោះដ្រូនស៊ើបការណ៍អាមេរិក ដែលអ៊ីរ៉ង់ អះអាងបានរំលោភចូលដែនអាកាសរបស់ខ្លួន នាពេលថ្មីៗនេះថែមទៀត៕ ម្លិះ
