ខេត្តឧត្ដរមានជ័យ÷ ដោយសារតែប្រាក់ដប់ម៉ឺន រៀលថ្លៃទិញស៊ុប ក្រោយពេលចេញពីច្រៀងខារ៉ាអូខេផឹកស៊ីឆ្អែត ស្រ្ដីពីរនាក់បានប្រើហិង្សាដាក់គ្នា បណ្ដាលអោយរងរបួស អ្នកចាញ់ដេកពេទ្យនាក់ឈ្នះដេកគុក។
ហេតុបានកើតឡើងនៅ ថ្ងៃទី០៦ ខែកក្កដា ឆ្នាំ២០១៩ ចំណុចមុខបន្ទប់ជួល ស្ថិតក្នុងភូមិកំណប់ សង្កាត់បន្សាយរាក់ ក្រុងសំរោង ខេត្តឧត្ដរមានជ័យ។
សមត្ថកិច្ចបានអោយដឹងថាជនសង្ស័យឈ្មោះ ឡេង ស្រីពៅ ភេទស្រី អាយុ២៦ឆ្នាំ ស្នាក់នៅបណ្ដោះអាសន្នបន្ទប់ជួលកន្លែងកើតហេតុខាងលើ ។
ជនរងគ្រោះឈ្មោះ ឈឿន ផល្លា ភេទស្រី អាយុ ៣០ឆ្នាំ ស្នាក់នៅបណ្ដោះអាសន្នបន្ទប់ជួលនៅក្បែងជនសង្ស័យ ។
សមត្ថកិច្ចបានបន្តថា នៅថ្ងៃទី០៦ ខែកក្កដា ឆ្នាំ២០១៩ វេលាម៉ោង ១៤៖៣០នាទី ឈ្មោះ ឈឿន ផល្លា និងឈ្មោះ ឡេង ស្រីពៅ បាននាំគ្នាទៅផឹកស៊ី និងច្រៀងខារ៉ាអូខេ យីហោឈ្មោះ ប៊ុន រឿន ជាមួយឈ្មោះ ចេត ជើល លុះនៅវេលាម៉ោង ១៧៖៣០នាទី ឈ្មោះ ចេត ជើល បានឲ្យប្រាក់ទៅឈ្មោះ ឡេង ស្រីពៅ ចំនួន១០ម៉ឺនរៀល ដើម្បីទិញស៊ុបយកទៅហូបបន្តនៅបន្ទប់ជួល ។ លុះនៅម៉ោង ១៨៖៣០នាទី ពេលឈ្មោះ ចេត ជើល និងឈ្មោះ ឈឿន ផល្លា ទៅដល់បន្ទប់ជួលវិញ មិនឃើញមានស៊ុប ឈ្មោះ ឈឿន ផល្លា បានសួរទៅកាន់ ឈ្មោះ ឡេង ស្រីពៅ អំពីរឿងស៊ុប តែត្រូវឈ្មោះ ឡេង ស្រីពៅនិយាយថា ៖ មិនទាន់បានទិញ ពេលនោះ ក៏កើតរឿងប្រកែកគ្នារវាងឈ្មោះ ឈឿន ផល្លា និងឈ្មោះ ឡេង ស្រីពៅ បន្ទាប់មក ឈ្មោះ ឡេង ស្រីពៅ បានយកចាន ថ្មគប់ទៅលើឈ្មោះ ឈឿន ផល្លា និងបានយកកាំបិតប៉័ងតោ កាប់ទៅលើឈ្មោះ ឈឿន ផល្លា បន្ថែមទៀត ក្នុងពេលនោះឈ្មោះ ចេត ជើល បានចូលទៅឃាត់ហើយក៏ត្រូវបានឈ្មោះ ឡេង ស្រីពៅ កាប់ត្រូវចំបាត់ដៃខាងឆ្វេងបណ្ដាលឲ្យរយះដេរចំនួន ៦ថ្នេរ ។
បច្ចុប្បន្នឈ្មោះ ឡេង ស្រីពៅ ត្រូវបានឃាត់ខ្លួន នៅអធិការដ្ឋានគរបាលក្រុងសំរោង ដើម្បីសួរនាំនិងកសាងសំណុំរឿងតាមនិតិវិធី៕ ប៉ែន នួន
