អ្នកប្រដាល់៤នាក់ឈ្នះ៣ពិន្ទុដូចគ្នានៅសង្វៀនទូរទស្សន៍ប៉ុស្តិ៍លេខ៥កាលពីថ្ងៃទី១៩-២០ខែធ្នូ

ចែករំលែក៖

ភ្នំពេញ៖ អ្នកប្រដាល់៤នាក់មកពីក្លិបប្រដាល់ផ្សេងគ្នាសុទ្ធតែរកបានម្នាក់៣ពិន្ទុ ក្រោយពីវាយគូប្រកួតរៀងៗខ្លួន កាលពីល្ងាចថ្ងៃសៅរ៍និងល្ងាចថ្ងៃអាទិត្យទី ១៩-២០ខែធ្នូ ឆ្នាំ២០១៥កន្លងទៅ នៅសង្វៀនទូរទស្សន៍ ប៉ុស្តិ៍លេខ៥ ចំនួន២កម្មវិធី ក្នុងនោះកីឡាករ សុខ សុវណ្ណ មកពីសមាគមកីឡាប្រដាល់ក្រសួងការពារជាតិ វាយឈ្នះកីឡាករ ថៃ ឈ្មោះ Yort Sing ដោយពិន្ទុ ខណៈដែលកីឡាករ ម៉ន ចាន់ដារ៉ា មកពីក្លិប ការិយាល័យ ទី៥ កងទ័ពជើងគោក វាយឈ្នះកីឡាករ រឿង សារ័ត្ន មកពីក្លិបកងពលតូចឆត្រយោងលេខ៩១១ ដោយពិន្ទុ ។

TV5

សម្រាប់កីឡាករ សុខ សុវណ្ណ Yort Sing ម៉ន ចាន់ដារ៉ានិងកីឡាករ រឿង សារ័ត្ន ពួកគេទាំង៤នាក់ នេះប្រកួតក្នុងកម្មវិធីកំពូលអ្នកប្រដាល់ស៊ីម៉ងត៍អូដ្ឋវគ្គ២ ប្រភេទទម្ងន់៦០គីឡូក្រាម ស្ថិតនៅពូលB ហើយជាលទ្ធផ លជុំទី១សប្តាហ៍ទី២ កីឡាករ សុខ សុវណ្ណមាន៣ពិន្ទុ និងកីឡាករ ម៉ន ចាន់ដារ៉ា ក៏រកបាន៣ពិន្ទុផងដែរ។

ពូលA មានកីឡាករ ឌុម កែវ ដា មកពីក្លិបមកុដរាជសីហ៍ កីឡាករថៃ ឈ្មោះPich Phanom កីឡាករ សេក គឹមរួន មកពីក្លិប អង្គរមានជ័យខេត្តសៀមរាប និង កីឡាករ ឆាយ មាស មកពីក្លិបសំរោងកោងកីឡា ខេត្តបន្ទាយមាន ជ័យ ត្រូវប្រកួតវិលជុំសន្សំពិន្ទុក្នុងពូល ហើយកីឡាករ ២នាក់ក្នុងពូលនីមួយៗដែលមានពិន្ទុ ច្រើនជាងគេ ត្រូវឡើងទៅប្រកួតនៅវគ្គពាកកណ្តាលផ្តាច់ព្រ័ត្រនិងផ្តាច់ព្រ័ត្រ។

ដោយឡែកលទ្ធផលប្រកួត មួយកម្មវិធីទៀត គឺប្រកួតប្រដាល់ក្បាច់បុរាណខ្មែរ ដណ្តើមពានរង្វាន់ទីហ្វី ទម្ងន់៥៧គីឡូក្រាម នៅសង្វៀនខាងលើនេះដែរ កីឡាករ គួន ប៊ុនហ៊ីម មកពី ក្លិបពន្លឺ សាមគ្គីខេត្តបាត់ ដំបង បានវាយឈ្នះកីឡាករ ចាត សីហា មកពីក្លិបអប់រំកាយនិងកីឡា ស្រុកអន្លង់វែងខេត្តឧត្តរមានជ័យដោយពិន្ទុ ។ កីឡាករ បឺត សង្ឃឹម មកពីក្លិប រ៉ាហាប់ស្វាយប៉ាក យកឈ្នះកីឡាករ ម៉ន រ៉ៃយ៉ា មកពីក្លិបការិយាល័យទី៥ កងទ័ពជើងគោក ដោយពិន្ទុ។

ចំពោះលក្ខខណ្ឌនៃការប្រកួតគឺខុសគ្នាពីការប្រកួត កម្មវិធីកំពូលអ្នកប្រដាល់ស៊ីម៉ងត៍អូដ្ឋ ពីព្រោះកម្មវិធី ទ្វីហ្វី មានកីឡាករ ចូលរួមរហូតដល់ទៅ៣២នាក់ ហើយរូបមន្តប្រកួតតម្រូវឲ្យកីឡាករ ទាំងអស់ប្រកួតវិលជុំ សម្រាំងយក តែ១៨នាក់ប៉ុណ្ណោះក្នុងចំណោមកីឡាករម៣២នាក់នោះ។ ដើម្បីបន្តការប្រកួតវគ្គទី២ជុំទី២ គេតម្រូវឲ្យកីឡាករ ទាំង១៦នាក់ប្រកួតវិលជុំដដែលដោយជម្រុះទុកតែ៨នាក់ ឡើងទៅវគ្គទី៣បន្ត ។ ក្រោយមកកីឡាករទាំង៨នាក់នេះត្រូវប្រកួតវិលជុំជម្រុះទុកតែ៤នាក់ សម្រាប់ប្រកួតវគ្គពាកកណ្តាលផ្តាច់ព្រ័ត្រ និងផ្តាច់ព្រ័ត្រ ដណ្តើម យកពានជើងឯកទ្វីហ្វី វគ្គ២ទម្ងន់៥៧គីឡូក្រាម។

គួររំលឹកថា ការប្រកួតដណ្តើមពានរង្វាន់ទ្វីហ្វី ចាប់ពីដំណាក់កាលទី១រហូតដល់វគ្គផ្តាច់ព្រ័ត្រ តម្រូវឲ្យ កីឡាករ វាយតែ៣ទឹកប៉ុណ្ណោះ ក្នុងមួយប្រកួត ៕