ភ្នំពេញ៖​ ករណីដែលស្ត្រីសិចស៊ី ស្រស់ ស សាច់ខ្ចីម្នាក់ ដែលលក់ផលិតផល Live តាម Facebook ហើយត្រូវបុរសជាសង្សារវាយឲ្យរបួសនោះ នៅថ្ងៃទី០៨ ខែកក្កដា ឆ្នាំ២០១៩នេះ ជនរងគ្រោះសម្រេចដាក់ពាក្យប្តឹងបុរសជាសង្សារ ដើម្បីចាត់ការតាមនីតិវិធី។ នេះបើតាមលោកស្នងការនគរបាលរាជធានីភ្នំពេញ បានបញ្ជាក់ឲ្យដឹង ថាសមត្ថកិច្ចស្រាវជ្រាវ និងទំនាក់ទំនងជនរងគ្រោះបានហើយ ។
លោកស្នងការនគរបាលរាជធានីភ្នំពេញ បានបញ្ជាក់ទៀតថា ដោយសារតែស្ត្រីរងគ្រោះអស់កម្លាំងខ្លាំង មិនអាចចេញពីផ្ទះទៅដាក់ពាក្យបណ្តឹងបាន ទើបស្ត្រីរងគ្រោះសំណូមពរ ឲ្យសមត្ថកិច្ចជួយធ្វើពាក្យបណ្តឹង នៅក្នុងផ្ទះរបស់គាត់ ដើម្បីបានយុត្តិធម៍ពីអំពើហិង្សាប្រព្រឹត្តដោយសង្សារហេងស៊យ។
សមត្ថកិច្ចបានឲ្យដឹងថា៖ ស្ត្រីរងគ្រោះមានឈ្មោះ ថៃ​ ស្រីនាង រស់នៅសង្កាត់បឹងកក់១ ខណ្ឌទួលគោក។
បើតាមដំណឹងពិស្តារស្នងការនគរបាលរាជធានីភ្នំពេញ បានបញ្ជាក់ក្នុង Facbeook ផ្លូវការរបស់ខ្លួនយ៉ាងដូច្នេះថា «បន្ទាប់ពីបានឃើញការចុះផ្សាយនៅលើ​ Account Facebook របស់ជនរងគ្រោះឈ្មោះ​ ថៃ​ ស្រីនាង​ ក៏ដូចជាការចុះផ្សាយរបស់សារព័ត៌មាន​ជាច្រើននៅលើបណ្តាញសង្គម​ ក្រុមការងារប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ​ បានសហការជាមួយប៉ុស្តិ៍នគរបាលបឹងកក់១​ ខណ្ឌទួលគោក​ បានធ្វើការស្រាវជ្រាវ​ និងទំនាក់ទំនងទៅកាន់ជនរងគ្រោះ ដើម្បីធ្វើការសាកសួរបន្ថែមទាក់ទងទៅនឹងករណីហិង្សានេះ​ ដោយស្ថានភាពរងរបួសធ្ងន់ ធ្វើឲ្យជនរងគ្រោះអស់កម្លាំងខ្លាំង ដែលមិនអាចចេញពីផ្ទះទៅដាក់ពាក្យបណ្តឹងបាន​ គាត់ក៏បានសំណូមពរឲ្យសមត្ថកិច្ចទៅជួយទៅធ្វើពាក្យបណ្តឹងនៅផ្ទះរបស់គាត់​។ ប៉ុស្តិ៍បានធ្វើពាក្យបណ្តឹងរួចរាល់ហើយ​ និងបន្តចាត់ការតាមនិតិវិធីច្បាប់»។
ផេកផ្លូវការនេះបានបន្តថា៖ សូមជម្រាបថា ស្ត្រីស៊ិចស៊ី Live លក់ផលិតផលតាម Facebook ឈ្មោះ ថៃ ស្រីនាង បានរងរបួសលើផ្ទៃមុខយ៉ាងដំណាំ ដោយនាងបានអះអាងក្នុង Facebook ថា ត្រូវបុរសជាសង្សារវាយធ្វើបាបជាញឹកញយ មិនតិចជាង១៣០ដងទេ ចាប់តាំងពីស្គាល់គ្នាមក។ ការប្រើអំពើហិង្សារនេះ បានធ្វើឲ្យអ្នកលេង Facebook នាំគ្នារិះគន់លើជនបង្ក ដែលវាយធ្វើបាបស្ត្រីទន់ខ្សោយ។
ជនបង្កហិង្សានេះ គឺប្រព្រឹត្តក្នុងបទល្មើសជាក់ស្តែង សមត្ថកិច្ចអាចឃាត់ខ្លួននាំមកសាកសួរ ខណៈជនរូបនេះមានរឿងអាស្រូវ និងប្រើហិង្សាលើភរិយា ដែលភរិយាជាកូនចៅហ្វាយខេត្តទៀតផង៕

ដោយ៖ សិលា