ភ្នំពេញ៖ គ្រួសារនារីរងគ្រោះដែលរងដោយអំពើបាញ់ប្រហារដល់មុខផ្ទះហាក់ដូចជាមិនទាន់បានទទួលភាពយុត្តិធម៌នៅឡើយ គ្រាដែលក្រុមឃាតកនៅមិនទាន់ចាប់ខ្លួនបាន បើទោះបីសមត្ថកិច្ចមូលដ្ឋានអះអាងថា មានតម្រុយពីឃាតកដៃដល់ ដែលអាចឈានដល់ការចាប់ខ្លួននៅពេលខាងមុខក៏ដោយ ។ អ្វីដែលក្រុមគ្រួសារជនរងគ្រោះមិនអស់ចិត្តទៀតនោះ គឺនៅក្នុងបុរី ពិភពថ្មីដែលជនរងគ្រោះទើបទិញផ្ទះល្វែងមកនៅថ្មីៗ(កន្លែងកើតហេតុ) ស្ថិតក្នុងភូមិបាយាប សង្កាត់ភ្នំពេញថ្មី ខណ្ឌសែនសុខ មិនមានសន្តិសុខបរិបូណ៌គួរឲ្យរស់នៅនោះទេ ។
ក្រុមគ្រួសារស្ត្រីរងគ្រោះមួយរូបសុំមិនបញ្ចេញឈ្មោះបាននិយាយថា វាសមល្មមសមត្ថកិច្ចវែកមុខជនដៃដល់ឃើញហើយ ព្រោះអ្វីៗបានកើតឡើងគ្រួសារជនរងគ្រោះបានបំភ្លឺដល់សមត្ថកិច្ចជំនាញគ្រប់គ្រាន់ទាក់ទិនមុនការបាញ់ប្រហារនេះ ។
ក្រុមគ្រួសារស្រី្តរងគ្រោះបានបន្តថា អ្វីដែលគួរឲ្យសោកស្តាយនោះមិនគួរណាមកទិញផ្ទះនៅបុរីពិភពថ្មីកន្លែងកើតហេតុដែលគ្មានមនុស្សរស់នៅច្រើន គ្មានសុវត្ថិភាព និងគ្មានសន្តិ សុខពេញលេញដូចនៅបុរីឯទៀតនោះទេ ។ លើសពីនេះទៀតបុរីនេះធំប៉ុនណាណី បែរជាគ្មានបុគ្គលិកសន្តិសុខយាមកាមត្រឹមត្រូវ ទុកឲ្យជនទុច្ចរិតចេញចូលតាមចិត្ត បង្កភាព អនាធិបតេយ្យ និងអសន្តិសុខខ្លាំងណាស់។ទាំងនេះនៅមិនទាន់រាប់បញ្ចូលចោរលួចគាស់ផ្ទះ ឬ ចោរលួចទ្រព្យសម្បត្តិជាប្រចាំនៅក្នុងបុរីនេះនៅឡើយទេ ។
រីឯអតិថិជនម្នាក់ទៀតដែលបានមកទិញផ្ទះក្នុងបុរីពិភពថ្មីនេះដែរបាននិយាយថា ក្រៅ ពីក្នុងបរិវេណបុរីគ្មានសន្តិសុខល្អ គាត់ក៏នៅមានការព្រួយបារម្ភពីអគារកំពុងសាងសង់ជាច្រើន ថាគ្មានសុវត្ថិភាពដែរ ព្រោះតែគេសង់មិនត្រូវស្តង់ដារ ឆាប់ប្រេះស្រាំដោយអន្លើៗទៅហើយនោះ។
ទាក់ទិននឹងការបាញ់ប្រហារស្រី្តខាងលើនៅក្នុងបុរីពិភពថ្មីក្នុងខណ្ឌសែនសុខនេះ លោកវរសេនីយ៍ឯកម៉ក់ ហុង អធិការនគរបាលខណ្ឌសែនសុខបានប្រាប់អ្នកកាសែតក្នុងស្រុកកាលពីថ្ងៃទី២១ខែធ្នូនេះថា ឃាតកស៊ីឈ្នួលបាញ់សម្លាប់ស្រី្តរងគ្រោះឈ្មោះ ចាន់ ដា ត្រូវបានសមត្ថកិច្ចរបស់លោកដឹងតម្រុយខ្លះហើយ ដោយមិនយូរមិនឆាប់នឹងចាប់ខ្លួនមកផ្តន្ទាទោសឲ្យខាងតែបាន។
លោកអធិការបង្ហើបឲ្យដឹងថា ក្នុងករណីនេះអាចទាក់ទងនឹងរឿងស្នេហាត្រីកោណ តែលោកមិនបានប្រាប់មនុស្សលេងល្បែងស្នេហាត្រីកោណជាអ្នកណាខ្លះនោះទេ ។
នគរវត្តមិនអាចសុំការបញ្ជាក់ពីអ្នកទទួលខុសត្រូវបុរីពិភពថ្មីនៅ ខណ្ឌសែនសុខ បានទេកាលពីម្សិលមិញនេះ ព្រោះគ្មានលេខទូរស័ព្ទទំនាក់ទំនង ។
គួរបញ្ជាក់ថា កាលពីវេលាម៉ោង៦និង៣០នាទីយប់ ថ្ងៃទី២០ ខែធ្នូឆ្នាំ២០១៥ នៅក្នុងបុរី ភិភពថ្មី ក្នុងភូមិបាយាប សង្កាត់ភ្នំពេញថ្មី ខណ្ឌសែនសុខ ស្រី្តឈ្មោះចាន់ ដា អាយុ ៣៣ឆ្នាំ ត្រូវឃាតកមិនស្គាល់មុខចូលទៅបាញ់ប្រហារដល់មុខផ្ទះចំនួន២គ្រាប់រងរបួសធ្ងន់ត្រូវបានក្រុមគ្រួសារដឹកយកទៅសង្គ្រោះនៅមន្ទីរពេទ្យព្រះកុសុមៈភ្លាមៗ ។ រីឯក្រុមឃាតកនាំគ្នាជិះម៉ូតូ គេចខ្លួនបាត់ដោយសុវត្ថិភាព ៕
ដោយ៖ ប្រាថ្នា
