ភ្នំពេញ៖ ក្រុមយុវជនអាណាចក្របៃតងត្រូវឡើងទៅប្រកួតជាមួយក្រុមយុវជនវ៉ិចតូរីអេហ្វស៊ី ដើម្បីដណ្តើមពាន រង្វាន់ Soccer League 2015 នៅវគ្គផ្តាច់ព្រ័ត្រ ខណៈដែលក្រុមសម្ព័ន្ធគណៈកម្មការសម្របសម្រួលនិស្សិត បញ្ញាវន្តកម្ពុជា ត្រូវប្រជែងយកតំណែងលេខ៣ជាមួយក្រុមយុវជនក-១២ នារសៀលថ្ងៃទីសៅរ៍ទី២៦ខែធ្នូ ឆ្នា២០១៥ នៅលើទីលានបាល់ទាត់ពហុកីឡដ្ឋានជាតិ ។
លទ្ធផលដ៏តឹងតែង ក្នុងជំនួបប្រកួតរវាងក្រុមយុវជនអាណាចក្របៃតងនឹងក្រុមក្រុមសម្ព័ន្ធគណៈកម្មការ សម្របសម្រួលនិស្សិតបញ្ញាវន្តកម្ពុជាបានអូសបន្លាយរហូតដល់១១០នាទី នៅតែរក្សាលទ្ធផលពិន្ទុស្មើគ្នា១-១ ហើយឈានដល់ការកាត់សេចក្តីទាត់បាល់ប៉េណាល់ទីក្នុងលទ្ធផល៨-៧គ្រាប់ដើម្បីយកក្រុមឈ្នះ ឡើងទៅ ប្រកួតវគ្គផ្តាច់ព្រ័ត្រជាមួយក្រុមយុវជនវ៉ិចតូរីអេហ្វស៊ីនៅថ្ងៃទី ២៦ ខែធ្នូ ឆ្នាំ២០១៥ លើទីលានពហុកីឡដ្ឋានជាតិវេលាម៉ោង ៥និង៣០នាទីល្ងាច។
សម្រាប់លទ្ធផលប្រកួតវគ្គពាក់កណ្ដាលផ្ដាច់ព្រ័ត្រក្រុមយុវជនវ៉ិចតូរីអែហ្វស៊ីឈ្នះក្រុមយុវជនក-១២ក្នុងលទ្ធ ផល ២ ទល់ ០ កាលពីល្ងាចថ្ងៃទី២១ខែធ្នូ ដោយត្រូវឈរចាំ ក្រុមយុវជនអាណាចក្របៃតងដែលទើបលេងឈ្នះក្រុមសម្ព័ន្ធ គ.ស.ន.ប.កដោយទាត់បាល់ប៉េណាល់ទីកាត់សេចក្តីក្នុងលទ្ធផលពិន្ទុ៨ទល់៧គ្រាប់បន្ថែមពីលើគ្រាប់បាល់ដែលរកបាននៅក្នុងម៉ោងធម្មតានិង ម៉ោងថែម១៥នាទី២ដងខាងលើកាលពីថ្ងៃទី២២ខែធ្នូ ឆ្នាំ២០១៥ នៅពហុកីឡដ្ឋានជាតិ។
គួររំលឹកថា ព្រឹត្តិការណ៍ប្រកួតបាល់ទាត់ដណ្តើមពានរង្វាន់ Soccer League 2015លើកទី៣ មានក្រុមចុះ ឈ្មោះចូលរួមប្រកួតសរុបចំនួន៤២ក្រុម ក្នុងនោះគណៈកម្មការតម្រូវឲ្យក្រុមទាំងអស់ ប្រកួតជម្រុះទុកតែ៣២ ក្រុមរួចធ្វើការបែងចែកក្រុមទាំង៣២នោះទៅជា៨ពូលក្នុងមួយពូលមាន៤ក្រុមដើម្បីប្រកួតជម្រុះរកក្រុមដែលមានពិន្ទុច្រើនជាងគេក្នុងពូលនីមួយៗ ចំនួន១៦ក្រុមរួចបន្តប្រកួតជម្រុះរក៨ក្រុមនិងបន្តជម្រុះចេញ៤ក្រុម ទៀតទុកតែ៤ក្រុមចុងក្រោយប្រកួតវគ្គពាក់កណ្តាលផ្តាច់ព្រ័ត្រនិងផ្តាច់ព្រ័ត្រដណ្តើមពានរង្វាន់ Soccer League 2015។
គួរបញ្ជាក់ថា ក្រុមឈ្នះជើងឯកពានរង្វាន់ Soccer League ២០១៥ ទទួលបានពាន១មេដាយមាសម្នាក់១គ្រឿង អមជាមួយថវិកាចំនួន១០លានរៀល ។ ក្រុមជើងឯករងទទួលបានមេដាយប្រាក់ម្នាក់១គ្រឿងអមជាមួយថវិកា ចំនួន៧លានរៀលនិងក្រុមលេខ៣ ទទួលបានមេដាយសំរឹទ្ធិម្នាក់១គ្រឿង និងថវិកាចំនួន ៥លានរៀល៕
ដោយ៖ សារីម
