ក្រោយពេលប្រទេសមួយចំនួន ថ្កោលទោស ក៏ដូចជាប្រព័ន្ធផ្សព្វផ្សាយនានាជុំវិញពិភពលោក បានថ្កោលទោសថាកូរ៉េខាងជើង សាកល្បងមីស៊ីលនោះ និងធ្វើឲ្យដំណើរពិភាក្សាស្វែងរកសន្តិភាពឧបទ្វីបកូរ៉េប្រឈមនៅបញ្ហា ជាបន្តទៀត ។
ក៏ប៉ុន្តែ ប្រធានាធិបតីអាមេរិកដូណាលត្រាំវិញ មិនបានថ្កោលទោសកូរ៉េខាងជើងនោះឡើយ ដោយលោក បញ្ជាក់ថា នោះជារឿងធម្មតាតែប៉ុណ្ណោះ ដោយប្រទេសជុំវិញពិភពលោក មានសិទ្ធសាកល្បង មីស៊ីលរយៈចម្ងាយខ្លី ធម្មតា ។
សកម្មភាពខាងលើរបស់លោកត្រាំគឺខុសពីរាល់លើក ឲ្យតែកូរ៉េខាងជើង សាកល្បង មីស៊ីល គឺអាមេរិកជាអ្នកប្រតិកម្ម មុនគេ ដោយថ្កោលទោសយ៉ាងខ្លាំង ដល់សកម្មភាពរបស់កូរ៉េខាងជើង ។ ប៉ុន្តែសម្រាប់ការសាកល្បងនាពេលថ្មីៗនេះ ប្រធានាធិបតីដូណាល់ ត្រាំ បានប្រកាសថា កាំជ្រួចមីស៊ីលរបស់ កូរ៉េខាងជើង ដែលទើបតែសាកល្បងនោះជាប្រភេទខ្លី ហើយប្រទេសជាច្រើនជុំវិញពិភពលោក ក៏មានមីស៊ីលប្រភេទនេះ ។ មួយវិញទៀត កូរ៉េខាងជើង មិនបានគំរាមកំហែងដល់អាមេរិកនោះឡើយពេលសាកល្បង។
ប្រធានាធិបតី ដូណាល់ ត្រាំ បានប្រកាសថា« មីស៊ីលដែលកូរ៉េខាងជើង បាញ់សាកល្បង ជាប្រភេទ រយៈចម្ងាយខ្លី ដូចជាប្រទេសផ្សេងទៀត ។ ចំណែកទំនាក់ទំនងរវាងខ្ញុំនិង មេដឹកនាំគីមជុងអ៊ុន នៅតែល្អដូចដើម ហើយការសាកល្បងនោះមិនប៉ះពាល់ដល់ទំនាក់ទំនងជិតស្និទ្ធនោះឡើយ»។
នៅពេលដែលក្រុមអ្នកសារព័ត៌មាន សួរថា តើការបាញ់មីស៊ីលថ្មីបំផុតរបស់កូរ៉េខាងជើង រំខានដល់អាមេរិកដែរ ឬទេ? លោកត្រាំឆ្លើយ« ទេ! មិនមានអ្វីរំខានឡើយសូម្បីតែបន្តិច នោះជារឿងធម្មតា»។
កាំជ្រួចមីស៊ីលដែលកូរ៉េខាងជើង បានសាកល្បង កាលពីថ្ងៃ ទី២៥ខែកក្កដា ដោយ១ដើមហោះបានចម្ងាយ៤៣០គីឡូម៉ែត្រ និង១ដើមទៀតហោះបានចម្ងាយ ៦៩០គីឡូម៉ែត្រ ឆ្ពោះទៅកាន់សមុទ្រជប៉ុន ។ ប្រព័ន្ធផ្សព្វផ្សាយរបស់កូរ៉េខាងជើង បានផ្សាយថា ការបាញ់សាកល្បងមីស៊ីល ក្រោមការត្រួតពិនិត្យពី មេដឹកនាំ គីម ជុងអ៊ុន គឺជា ការប្រឆាំងគម្រោង ធ្វើសមយុទ្ធ របស់អាមេរិកនិងកូរ៉េខាងត្បូង នៅក្នុងខែសីហាខាងមុខ ៕
ដោយ៖ មែវ សាធី
