វាយប្រពន្ធ២ដៃ ប្រកាច់ស្លាប់មួយរំពេច ដោយសារភ្លើងប្រច័ណ្ឌ

ចែករំលែក៖

ភ្នំពេញ ៖ អ្នក​ណា​ក៏​អាច​កើត​មានចិត្ត​ប្រច័ណ្ឌ​ដែរ គ្រាន់តែ​ការ​ប្រច័ណ្ឌ​បាន​សម្ដែង​ចេញ​មកខុស​ៗ​គ្នា ។ ជា​ការណ៍​ពិត​ការ​ប្រច័ណ្ឌ​របស់​បុគ្គល​មួយ​ចំនួន​ដែល​មានការ​យល់​ដឹង​ល្អ ហើយ​ចេះ​រក​ដំណោះស្រាយ​ នោះ​មិន​មាន​បញ្ហា​អ្វី​ទេ តែ​ជន​ខ្លះ​ទៀត​បែរជា​ប្រចណ្ឌ​ដោយ​ការ​គុំ​ទុក​ក្នុង​ចិត្ត មិន​ព្រម​ស្វែងរក​ដំណោះស្រាយ និង​អាច​ឈាន​ទៅ​ដល់​កើត​មាន​បញ្ហា​ផ្លូវចិត្ត និង​អាច​បង្ក​គ្រោះថ្នាក់​ដល់​អ្នក​ដទៃ​បានគ្រប់ពេល ។

ពិតជាអាសូរណាស់ នារីម្នាក់បានស្លាប់ក្រោមកណ្តាប់ដៃប្តី វាយចំ២ដៃគុំថ្គាម និងក្ដោងច្រមុះ បណ្ដាលឲ្យប្រកាច់ស្លាប់ភ្លាមៗនៅនឹងកន្លែង កាលពីវេលាម៉ោងជាង១១យប់ ថ្ងៃទី៥ ខែសីហា ឆ្នាំ២០១៩ ស្ថិតនៅក្នុងភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ផ្តើមឡើងដោយសារភ្លើងប្រច័ណ្ឌខ្លាំង តែងតែឈ្លោះជាមួយប្រពន្ធស្ទើររាល់ថ្ងៃ ។

សពនារីរងគ្រោះឈ្មោះ នុយ វណ្ណារី អាយុ២៣ឆ្នាំ មានមុខរបរជាស្រី្តមេផ្ទះ មានទីលំនៅស្នាក់នៅផ្ទះជួលមួយកន្លែង ស្ថិតក្នុងភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ។ ចំណែកជនបង្កហេតុឈ្មោះ ផង់ សំណាង អាយុ២៣ឆ្នាំ មុខរបររត់ម៉ូតូឌុប ។ អ្នកទាំង២ស្នាក់នៅជាមួយគ្នា ស្ថិតក្នុងភូមិ-សង្កាត់ខាងលើ ។

ដំណើររឿងបានឲ្យដឹងថា ជនសង្ស័យតែងតែប្រច័ណ្ឌប្រពន្ធ និងកើតជម្លោះស្ទើររាល់ថ្ងៃ ។ លុះមកដល់ថ្ងៃកើតហេតុ ប្ដីទើបតែមកពីផឹកស្រាមកដល់ផ្ទះ ក៏រករឿងឈ្លោះប្រកែកគ្នាជាមួយប្រពន្ធ ។ ភាគច្រើនផ្តើមឡើងដោយសារតែភ្លើងប្រច័ណ្ឌ រហូតប្ដីទ្រាំលែងបានស្ទុះទៅវាយប្រពន្ធចំនួន២ដៃចំគុំថ្គាម និងក្ដោងច្រមុះ បណ្ដាលឲ្យ​ស្លាប់ភ្លាមៗនៅនឹងកន្លែង ។ ឃើញដូច្នេះជនបង្កបានហៅបងប្អូនដើម្បីឲ្យមកជួយសង្រ្គោះ តែប្រពន្ធបានដាច់ខ្យល់ផុតដង្ហើមទៅហើយ ។

ជនបង្កត្រូវបានសមត្ថកិច្ចឃាត់ខ្លួន យកទៅធ្វើការសាកសួរនាំនៅប៉ុស្តិ៍នគរបាលកាកាបទី២ ដើម្បីកសាងសំណុំរឿង និងបញ្ជូនទៅផ្ដន្ទាទោសតាមច្បាប់ ៕ ដោយ ៖ ជាយក្រុង

...


ចែករំលែក៖
ពាណិជ្ជកម្ម៖
ads2 ads3 ambel-meas ads6 scanpeople ads7 fk Print