រាជធានីភ្នំពេញ៖ អាជីវករផ្សារស៊ីនជូរីផ្លាហ្សាប្រមាណជា១០០នាក់បានផ្ទុះការតវ៉ាប្រឆាំងទៅនឹងថៅកែផ្សារបន្ទាប់ពីពួកគាត់កំពុងតែលក់ដូរសុខៗស្រាប់តែថៅកែផ្សារប្រកាសឲ្យផ្អាកដើម្បីរុះរើផ្សារចោលសាងសង់ថ្មីឡើងវិញ។ ការតវ៉ាបានផ្ទុះឡើង កាលពីព្រឹកថ្ងៃទីថ្ងៃទី០៨ ខែសីហា ឆ្នាំ២០១៩នៅមុខផ្សារស៊ីនជូរីផ្លាហ្សារមានទីតាំងស្ថិតនៅទល់មុខសួនកុមារពោធិ៍ចិនតុង តាមបណ្ដោយមហាវិថីសហព័ន្ធរុស្ស៊ី សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។នៅក្នុងការតវ៉ា ក្រុមអាជីវករក៍បានលើករូបថតសម្តេច តេជោហ៊ុន សែននិងសម្ដេចគតិព្រឹទ្ធបណ្ឌិតប៊ុន រ៉ានី ហ៊ុន សែន ព្រមទាំងបានទទូចសុំឲ្យសម្ដេចជួយទប់ស្កាត់ការរុះតើផ្សារនោះផងដែរ។

តាមអាជីវករ ក៍បានចោទថៅកែផ្សារនេះហាក់មានចេតនាធ្វើឲ្យពួកគាត់ជួបការលំបាកដើម្បីខ្លួនឯងទទួលបានប្រយោជន៍កាន់តែច្រើនដោយមិនគិតពីទុក្ខវេទនាពួកគាត់ឡើយ។ ពួកគាត់មិនសុខចិត្តរុះរើនោះទេ បើសិនគ្មានការដោះស្រាយនោះ។ តាមអាជីវករបានអោយដឹងថា នៅក្នុងផ្សារស៊ីនជូរីផ្លាហ្សា មានតូបចំនួន៣៤១តូប និងមាននៅខាងក្រៅជុំវិញផ្សារទៀតមានតូបនិងស្ដង់រាប់មិនអស់ដែលបានរកស៊ីលក់ដូរជាឆ្នាំងបាយម្នាក់ៗ រយៈពេលជាង១០ឆ្នាំនិងអ្នកខ្លះទៀតរហូតដល់ទៅជាង២០ឆ្នាំបែរជាកំពុងលក់ដូរសុខៗ ស្រាប់តែខាងថៅកែផ្សារ ប្រកាសថាឲ្យពួកគាត់ផ្អាកការលក់ដូរដើម្បទុកពេលឲ្យក្រុមហ៊ុនធ្វើការរុះរើផ្សារចោលធ្វើការ សាងសង់ថ្មីឡើងវិញ។ ការរុះរើផ្សារបែបនេះបានធ្វើឲ្យពួកគាត់គ្មានកន្លែងលក់ដូរឡើយ ត្រូវខាតបង់ពេលវេលារាប់ឆ្នាំទម្រាំតែផ្សារសាងសង់រួច។ ទាក់ទងទៅនិងការតវ៉ានេះ តាមបុគ្គលិកផ្សារស៊ីនជូរីផ្លាហ្សាបានឲ្យដឹងថា អាជីវករផ្សារស៊ីនជូរីផ្លាហ្សារនេះបានបញ្ចប់កុងត្រាអស់ហើយទើបក្រុមហ៊ុន ចង់រើផ្សារអភិវឌ្ឍន៍ថ្មីទំនើបស្រាប់តែបងប្អូនអាជីវករប្រមូលផ្តុំគ្នាតវ៉ាមិនឲ្យរុះរើ។ ។នៅព្រឹកនោះគេឃើញលោកប៉ាង លីដាអភិបាលរងខណ្ឌបានចុះទៅធ្វើការសម្របសម្រួលជាមួយអាជីវករ ឲ្យពួកគាត់មានភាពស្ងៀមស្ងាត់និងចាត់តំណាងដើម្បីជួបធ្វើការដោះស្រាយគ្នា៕  សុខាសែនជ័យ​