ភ្នំពេញ៖ ជនសង្ស័យ២នាក់ ត្រូវបានកម្លាំងសមត្ថកិច្ចបឹងកេងកង១ ឃាត់ខ្លួន ក្រោយពួកគេធ្វេីសកម្មភាពឆក់កាបូបជនជាតិបរទេស មិនបានសម្រេច ហេីយគាប់ជួនប្រទះនឹងកម្លាំងល្បាតរបស់ប៉ុស្តិ៍បឹងកេងកង១ ជិះដេញទាន់ហើយគៀរអោយដួល រហូតដល់ឃាត់ខ្លួនបានតែម្ដង ។

ការឃាត់ខ្លួនជនសង្ស័យខាងលេី បានធ្វេីឡេីងកាលពីវេលាម៉ោង១២ និង៤០នាទីរំលងអាធ្រាត្រ ឈនចូលថ្ងៃទី២៥ ខែធ្នូ ឆ្នាំ២០១៥  នៅចំនុចមុខPASSION SPA(ម៉ាសា)ផ្លូវ៣០២ សង្កាត់បឹងកេងកង១ ខណ្ឌចំការមន ។

ជនសង្ស័យទាំង២នាក់ដែលឃាត់ខ្លួនបាននេះ ទី១.ឈ្មោះ លី លិន ភេទប្រុស អាយុ១៦ ឆ្នាំ មុខរបរមិនពិតប្រាកដ ស្នាក់នៅផ្ទះជួលម្ដុំផ្សារច្បារអំពៅ ក្នុងខណ្ឌច្បារអំពៅ និងទី២.ឈ្មោះ ជា រដ្ឋា ភេទប្រុស អាយុ១៦ ឆ្នាំ មុខរបរមិនពិតប្រាកដ ស្នាក់នៅ សង្កាត់ច្បារអំពៅ ខណ្ឌច្បារអំពៅ ។ ដកហូតបានម៉ូតូ០១គ្រឿងម៉ាក ស៊ុយស៊ូគីនិច ពណ៌ស ពាក់ស្លាកលេខភ្នំពេញ 1DD-0735។ រីឯជនរងគ្រោះជាជនបរទេស ភេទស្រី មានគ្នាពីរនាក់ សម្ភារៈមិនបានបាត់បង់អ្វីនោះឡើយហើយជនរងគ្រោះក៏មិនមកដាក់ពាក្យបណ្តឹងនោះដែរ ។

បើតាមប្រភពព័ត៌មានពីសមត្ថកិច្ចបានឲ្យដឹងថា នៅមុនពេលកេីតហេតុគឺ ជនរងគ្រោះមានគ្នាពីរនាក់បានដើរកាន់ស្ពាយកាបូបនៅលើខ្លួន ហើយឈរនៅមុខហាងម៉ាសា (កន្លែងកើតហេតុ) ស្រាប់តែជនសង្ស័យទាំង០២នាក់ខាងលើ ជិះម៉ូតូមកក្បែរ ហើយបានឆក់យកកាបូប របស់ជនរងគ្រោះតែមិនបានសម្រេច ខណៈពេលនោះគាប់ជួនត្រូវបានកម្លាំងល្បាតឃើញក៏បានជិះដេញប្រផាប់ចាប់ប្រផីង រហូតដល់ចំនុចផ្លូវ៣០២ កម្លាំងរបស់លោកក៏បានគៀរឲ្យដួលតែម្ដងរហូតឈានដល់ការឃាត់ខ្លួនតែម្ដង ។

បច្ចុប្បន្នជនសង្ស័យទាំងពីរនាក់ត្រូវបានម្លាំងសមត្ថកិច្ចប៉ុស្ដិ៍នគរបាលបឹងកេងកង១ ឃាត់ខ្លូន និងកសាងសំណុំរឿងចាត់ការតាមផ្លូវច្បាប់ ៕

ដោយ៖ ភារ៉ា ដង្កោ