ភ្នំពេញ៖ ជនសង្ស័យ២នាក់ត្រូវបានកម្លាំងកងរាជអាវុធហត្ថខណ្ឌដូនពេញចាប់ឃាត់ខ្លួន ក្រោយពួកគេធ្វេីសកម្មភាពឆក់ទូរស័ព្ទជនបរទេស បានសម្រេច ហេីយតែត្រូវជនរងគ្រោះស្រែកឆោឡោ គាប់ជួនប្រទះនិងកម្លាំងល្បាតដេញចាប់ប្រផាប់ប្រផីង រហូតដល់ឃាត់ខ្លួនជនសង្ស័យបានផ្តួលម៉ូតូរត់ចោលឡើងលើផ្ទះរបស់ប្រជាពលរដ្ឋនៅក្បែរនោះ ក៏ត្រូវសមត្ថកិច្ចឡេីងព័ន្ធចាប់ក្របួចជាប់ ។
ករណីឃាត់ខ្លួនជនសង្ស័យខាងលេី បានធ្វេីឡេីងកាលពីវេលាម៉ោង២១ និង១៥នាទីយប់ថ្ងៃទី២៤ ខែធ្នូ ឆ្នាំ២០១៥ នៅចំនុចផ្លូវ២៦៤កែង១៩ សង្កាត់ចតុមុខ នៅចំនុចផ្លូវសុធារសកែងសុរ៉ាម្រិត សង្កាត់ចតុមុខ ខណ្ឌដូនពេញ ។
តាមប្រភពពីមន្រ្តីកងរាជអាវុធហត្ថបានឲ្យដឹងថា ជនសង្ស័យទាំង២នាក់នេះ ទី១.ឈ្មោះ សុខ តុលា ហៅអាកាក់ ភេទប្រុស អាយុ២០ឆ្នាំ មុខរបរមិនពិតប្រាកដ ស្នាក់នៅផ្ទះលេខN១០៨ ផ្លូវ៣១០ ភូមិ០៦ ទន្លេបាសាក់ ខណ្ឌចំការមន(ជាអ្នកឆក់) និងទី២.ឈ្មោះ ពេជ្រ វណ្ណនេត ភេទប្រុស អាយុ២៣ឆ្នាំ មុខរបរមិនពិតប្រាកដ ស្នាក់នៅ ភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ (ជាអ្នកបើកម៉ូតូ) ។ សមត្ថកិច្ចដកហូតបានម៉ូតូ០១គ្រឿងម៉ាក ស៊ុយស៊ូគីស្មាស ពណ៏ខ្មៅ ពាក់ស្លាកលេខភ្នំពេញ 1BN-6837 ។ រីឯជនរងគ្រោះជាជនបរទេស ភេទស្រី បាត់បង់ទូរស័ព្ទ០១គ្រឿងម៉ាកអាយហ្វូនហ្វាយ ហើយយើងមិនអាចទាក់ទងអោយគាត់មកដាក់ពាក្យបណ្តឹងបានទេ ។
ប្រភពដដែរបានបន្តទៀតថា នៅមុនពេលកេីតហេតុគឺ ជនរងគ្រោះដើរកាន់ទូរស័ព្ទ នៅលើផ្លូវសុធារសកែងសុរ៉ាម្រិត សង្កាត់ចតុមុខ ជិតនាគបាញ់ទឹក ស្រាប់តែជនសង្ស័យទាំង២នាក់ខាងលើ ជិះម៉ូតូមកក្បែរ ហើយបានឆក់យកទូរស័ព្ទរបស់ជនរងគ្រោះម៉ាក អាយហ្វូនហ្វាយ ហើយបានជិះម៉ូតូគេចខ្លួន ភ្លាមនោះជនរងគ្រោះបានស្រែកឆោឡោឡើង ហើយកម្លាំងល្បាតយើងបានដេញប្រផាប់ចាប់ប្រផីង រហូតដល់ចំនុចផ្លូវ២៦៤កែង១៩ សង្កាត់ចតុមុខ ជនសង្ស័យក៏បានផ្តួលម៉ូតូចោលហើយរត់គេចខ្លួនរត់ឡើងលើផ្ទះរបស់ប្រជាពលរដ្ឋនៅក្បែរនោះ ហើយក៏ត្រូវបានកម្លាំងយើងឃាត់ខ្លួនបានម្នាក់ឈ្មោះ ពេជ្រ វណ្ណនេត រីឯជនសង្ស័យម្នាក់ទៀតបានរត់ឆ្លងកាត់សួនច្បារនាគបាញ់ទឹក ហើយបានរត់ឡើងលើការដ្ឋានកំពុងសាងសង់ជាន់ទី៣ ក្បែរផ្សារកាប់គោ សង្កាត់ទន្លេបាសាក់ ត្រូវបានកម្លាំងយើងឃាត់ខ្លួនបានតែម្តងគឺឈ្មោះ សុខ តុលា ។
ក្រោយឃាត់ខ្លួនជនសង្ស័យទាំង២នាក់ បានឆ្លើយសារភាពថាពួកគេពិតជាបានឆក់ទូរស័ព្ទរបស់ជនបរទេសពិតប្រាកដមែន ហើយបានជ្រុះបាត់នៅពេលដែលពួកគេរត់គេចខ្លួនពីការតាមចាប់របស់សមត្ថកិច្ចផងដែរ ៕
បច្ចុប្បន្នជនសង្ស័យនឹងវត្ថុតាងត្រូវបានញ្ជូនបន្តទៅទីបញ្ជាការអាវុធហត្ថរាជធានីភ្នំពេញ ដើម្បីចាត់ការតាមនិតិវិធី ៕
...
ដោយ៖ ស ដារ៉ា
