ភ្នំពេញ៖ ស្ត្រីម្នាក់កំពុងជិះម៉ូតូតាមបណ្ដោយផ្លូវលេខ២១៧ ត្រូវបានជនសង្ស័យម្នាក់ជិះម៉ូតូម៉ាកsl មកអែបក្បែរធ្វើសកម្មភាពឆក់កាបូប រួចព្យាយាមគេចខ្លួនតែត្រូវបានកម្លាំងនគរបាលព្រហ្មទណ្ឌ សហការជាមួយកម្លាំងនគរបាលមូលដ្ឋានខណ្ឌ៧មករា តាមប្រផាប់ប្រផីញចាប់បានភ្លាមៗ ។
ហេតុការណ៍ឃាត់នេះបង្កការភ្ញាក់ផ្អើលដល់ប្រជាពលរដ្ឋដែលធ្វើដំណើរដើរលេងតាមដងផ្លូវកាលពីវេលាម៉ោង០៦និង៥០នាទីយប់ ថ្ងៃទី២៥ ខែធ្នូ ឆ្នាំ២០១៥ ស្ថិតនៅចំណុចផ្លូវឌឿងហែមក្រោយប៉ុស្តិ៍អូរឬស្សី២ ក្នុងសង្កាត់អូរឬស្សី២ ខណ្ឌ៧មករា រាជធានីភ្នំពេញ ។
ជនសង្ស័យមានឈ្មោះ ឆៃ យ៉ា ភេទប្រុស អាយុ២៩ឆ្នាំ ស្នាក់នៅនិងមុខរបរមិនពិតប្រាកដ។ ចំណែកជនរងគ្រោះមិនត្រូវបាននគរបាលរកឃើញអញ្ជើញមកដាក់បណ្ដឹងនោះទេ ដោយភ័យខ្លាំងពេលក៏ជិះម៉ូតូទៅបាត់តែម្ដង ។
យោងតាមសាក្សីនៅក្បែរនិងកន្លែងកើតហេតុបានអោយដឹងថា នៅមុនពេលកើតហេតុ គេឃើញមានស្ត្រីម្នាក់ជិះម៉ូតូមួយគ្រឿងមិនចាំម៉ាកធ្វើដំណើរតាមបណ្ដោយផ្លូវលេខ២១៧ ក្នុងទិសដៅពីកើតមកលិច ខណៈមលចំណុចកែងនិងផ្លូវលេខ១៦១ ក្បែរនិងប៉ុស្តិ៍នគរបាលអូរឬស្សី២ ស្រាប់តែមានជនសង្ស័យម្នាក់ជិះម៉ូតូម៉ាកsl ពណ៌ទឹកប្រាក់បិតតែមពណ៌ទឹកបិច ពាក់ស្លាកលេខភ្នំពេញ១BL-០៧០៩ ធ្វើដំណើរស្របទិសគ្នា ពេលក្បែរជនរងគ្រោះធ្វើសកម្មភាព ឆក់ការបូបពីជនរងគ្រោះ តែមិនបានសម្រេច ត្រូវជនរងគ្រោះដួល រួចជនសង្ស័យបានព្យាយាមគេចខ្លួនត្រូវបានកម្លាំងនគរបាលព្រហ្មទណ្ឌខណ្ឌ៧មករាកំពុងល្បាតនៅក្បែរនោះក៏បានដេញចាប់ប្រផាប់ប្រភីញ បានភ្លាមៗតែម្ដង ។
បច្ចុប្បន្នជនសង្ស័យត្រូវបាននគរបាលនាំយកមកឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌ៧មករាដើម្បីសាកសួរនិងចាត់ការតាមនីតិវិធី ៕
ដោយ៖ ស រស្មី
