ការវាយប្រហារយ៉ាងរន្ធត់នៅក្នុងពិធីរៀបការ ក្នុងទីក្រុងកាប៊ូល ប្រទេសអាហ្វហ្គានីស្ថាន បណ្តាលឲ្យមានអ្នកស្លាប់ជាង៦០នាក់ ខណៈក្រុមភេរវករ IS កាលពីថ្ងៃទី១៨ ខែសីហា បានចេញមុខទទួលស្គាល់ថា ក្រុមខ្លួនជាអ្នកវាយប្រហារដោយគ្រាប់បែក នៅក្នុងពិធីមង្គលការ នៅប្រទេសអាហ្វហ្គានីស្ថាន បណ្តាលឲ្យមនុស្សស្លាប់ និងរបួស ចំនួន២៤០នាក់ ។
សារព័ត៌មាន AP បានដកស្រង់សម្តីរបស់មន្ត្រីអាហ្វហ្គានីស្ថានបានបញ្ជាក់ថា ការវាយប្រហារដោយគ្រាប់បែកអត្តឃាត នៅក្នុងពិធីមង្គលការ នៅទីក្រុងកាប៊ូលនោះ ចំនួនអ្នកស្លាប់បានកើនឡើងដល់៦៣នាក់ និង១៨២នាក់រងរបួស។
ហេតុការណ៍វាយប្រហារដោយគ្រាប់បែកអត្ដឃាតនេះ បានកើតឡើង នៅមជ្ឈមណ្ឌលរៀបចំពិធីជប់លៀង អាពាហ៍ពិពាហ៍ …Dubai City ដែលភាគច្រើនជាក្រុមជនជាតិអ៊ីស្លាម និងកាយស៊ីអ៊ីតរស់នៅ។ រីឯការវាយប្រហារនោះ គឺកើតឡើង ក្នុងពេលមានពលរដ្ឋជាច្រើននាក់ បានទៅចូលរួមពិធីទទួលទានអាហារ នៅក្នុងពិធីមង្គលការនោះ។
លោក Sediq Deddiqi អ្នកនាំពាក្យប្រធានាធិបតីអាហ្វហ្គានីស្ថាន បានបញ្ជាកថា «នេះជាបទល្មើសប្រឆាំងនឹងប្រជាជនរបស់យើង ពេលបំផ្ទុះគ្រាប់បែកអត្តឃាត នៅក្នុងពិធីរៀបការបែបនេះ» ។
នៅមជ្ឈមណ្ឌលរៀបចំពិធីមង្គលការ និងកម្មវិធីផ្សេងៗ តែងតែមានពលរដ្ឋរាប់ពាន់នាក់ចូលរួម ជាពិសេស នៅចុងសប្តាហ៍។ ដោយសារតែមានពិធីបែបនេះ ទើបការវាយប្រហារអត្តឃាតនោះ បណ្តាលឲ្យមានអ្នកស្លាប់ និងរបួសច្រើនបែបនេះ។ អ្នកស្លាប់អាចនឹងបន្តកើនឡើងបន្ថែមទៀត ព្រោះអ្នករបួសធ្ងន់ខ្លះកំពុងស្ថិតក្នុងស្ថានភាពធ្ងន់ធ្ងរបំផុត។
សារព័ត៌មានខាអាម៉ា (Khaama) បានបញ្ជាក់នៅក្នុងរបាយការណ៍របស់ខ្លួនយ៉ាងដូច្នេះថា «ក្រុមអង្គការរដ្ឋឥស្លាមស្ថិតនៅទឹកដីអ៊ីរ៉ាក់ និងស៊ីរី ដែលហៅកាត់ថា ISIS បានអះអាងទទួលខុសត្រូវ ចំពោះការបំផ្ទុះគ្រាប់ បែកដ៏សាហាវនៅភាគខាងលិចទីក្រុងកាប៊ុល ហើយថែមទាំងបាននិយាយនៅក្នុងសេចក្តីថ្លែងការណ៍មួយ ដែលចេញផ្សាយជាភាសាអារ៉ាប់ថា ការវាយប្រហារនេះត្រូវបានធ្វើឡើង ដោយអ្នកបំផ្ទុះគ្រាប់បែកអត្តឃាតម្នាក់ឈ្មោះថា អាប៊ូ អាស៊ីម អាល់ប៉ាគីស្ថាន (Abu Asim Al-Pakistan)»។
គួរជម្រាបថា ការបំផ្ទុះគ្រាប់បែកអត្តឃាតដ៏សាហាវខាងលើបានកើតឡើងនៅម៉ោង១០៖៤០នាទីយប់ នៅថ្ងៃសៅរ៍ចុងសប្ដាហ៍មុន (ម៉ោងក្នុងតំបន់) កំឡុងពិធីមង្គលការនៅឯសាលរៀបអាពាហ៍ពិពាហ៍មួយកន្លែង នៅក្នុងរដ្ឋធានីកាប៊ុល ប្រទេសអាហ្វហ្គានីស្ថាន។ ក្នុងហេតុការណ៍ភេរវកម្មនេះបានសម្លាប់ជីវិតមនុស្សយ៉ាងហោច៦៣នាក់ និងច្រើនជាង ១៨០នាក់ផ្សេងទៀតរងរបួស ៕
