ខេត្តកំពង់ចាម ៖ មនុស្សចំនួន១០នាក់ដែលជាជនសង្ស័យ រួមជាមួយវត្ថុតាងថ្នាំញៀនមួយចំនួន ត្រូវបានសមត្ថកិច្ចចាប់ឃាត់ខ្លួននិងរឹបអូសបាន កាលពីវេលាម៉ោង១៥៖៣០នាទី នៅចំណុចភូមិថ្នល់បែកកើត ឃុំស្វាយទាប ស្រុកចំការលើ ខេត្តកំពង់ចាម ។
ការបង្ក្រាបនិងចាប់ឃាត់ខ្លួនជនសង្ស័យខាងលើ ធ្វើឡើងដោយកម្លាំងកម្លាំងជំនាញការិយាល័យប្រឆាំងគ្រឿងញៀន និងកម្លាំងអធិការដ្ឋាននគរបាលស្រុកចំការលើ ដឹកនាំដោយលោកវរសេនីយ៍ទោ ជីវ សេងរស់ នាយការិយាល័យប្រឆាំងគ្រឿងញៀន ។
លោកវរសេនីយ៍ទោ ជីវ សេងរស់ នាយការិយាល័យប្រឆាំងគ្រឿងញៀនបានឲ្យដឹងថា បន្ទាប់ពីក្រោយពីទទួលព័ត៌មានពីប្រជាពលរដ្ឋ និងចំណាត់ការពីលោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម បានចាត់បញ្ជាឲ្យលោកដឹកនាំកម្លាំងបើកកិច្ចប្រតិបត្តិការបង្រ្កាបករណីជួញដូរដោយខុសច្បាប់នូវសារធាតុញៀន ។
លោកបន្តថា ការបង្ក្រាបដោយប្រើវិធានញុះញង់ ក្នុងនោះកម្លាំងបានឃាត់ខ្លួនជនសង្ស័យចំនួន១០នាក់ និងរឹបអូសវត្ថុតាងរួមមាន: ម្សៅក្រាមពណ៌សចំនួន២២កញ្ចប់ (ធំ ០២កញ្ចប់) ទូរស័ព្ទដៃចំនួន ១១គ្រឿង ម៉ូតូ ០៣គ្រឿង ជញ្ជីងអេឡិត្រូនិច ០១គ្រឿង ក្រដាស់វីងចំនួន០២សន្លឹក ថង់វេចខ្ចប់និងឧបករណ៍សេពមួយចំនួនធំ ។
ក្រោយការឃាត់ខ្លួនជនសង្ស័យទាំង១០នាក់បាននាំពួកគេមកកាន់អង្គភាព ដើម្បីកសាងសំណុំរឿងត្រៀមបញ្ជូនទៅតុលាការចាត់ការតាមច្បាប់ ៕ ដោយ ៖ វណ្ណៈ
