ខេត្តកណ្តាល៖ មុខសញ្ញាចោរកម្មម្នាក់ត្រូវបានកម្លាំងនគរបាលប៉ុស្តិ៍ដីឥដ្ឋចាប់ខ្លួនដកហូតបានទុយោទឹក ប្រវែងជាង១០០ម៉ែត្រ កាលពីវេលាម៉ោង៥ល្ងាច ថ្ងៃទី២៥ ខែធ្នូ ឆ្នាំ២០១៥ នៅភូមិស្តៅ កន្លែង៤ ឃុំដីឥដ្ឋ ស្រុកកៀនស្វាយ ខេត្តកណ្តាល ។

ជនសង្ស័យមានឈ្មោះនៅ សុភ័ក្រ ភេទប្រុស អាយុ២៨ឆ្នាំ មានទីលំនៅភូមិពពាលខែ ឃុំដីឥដ្ឋ ស្រុកកៀនស្វាយ ខេត្តកណ្តាល ។ ជនរងគ្រោះជាម្ចាស់ទុយោមានឈ្មោះភី ភា ភេទប្រុស អាយុ៣៣ឆ្មាំ មានទីលំនៅ ភូមិស្តៅកន្លែង៤ ឃុំដីឥដ្ឋ ស្រុកកៀនស្វាយ ។

មន្ត្រីនគរបាលប៉ុស្តិ៍ដីឥដ្ឋបានអោយដឹងថា មុនពេលចាប់ខ្លួនជនសង្ស័យបានជិះម៉ូតូមួយគ្រឿងម៉ាក ឌឺលុច្ស ស៊េរីចាស់ ពាក្យស្លាកលេខ ថ៥៣៦១-ភព១ ជិះទៅដីចំការបន្លែរបស់ជនរងគ្រោះរួចធ្វើសកម្មភាពសារទុយោច្រកចូលក្នុងផង់លើកដាក់លើម៉ូតូបម្រុងដឹកចេញ ។ គ្រានោះជនរងគ្រោះជាម្ចាស់ចំការបានទៅទាន់ក៏ចាប់ខ្លួនជនសង្ស័យជាប់ហើយបញ្ជូនខ្លួនមកប្រគល់អោយសមត្ថកិច្ចប៉ុស្តិ៍ ដើម្បីចាត់ការតាមផ្លូវច្បាប់ ។

ក្រោយឃាត់ខ្លួនជនសង្ស័យត្រូវបញ្ជូនទៅកាន់អធិការដ្ឋាននគរបាលស្រុកដើម្បីចាត់ការតាមផ្លូវច្បាប់ ៕

ដោយ៖ សណ្តោស