ដើម្បីទាក់ទាញ់ប្រទេសកូរ៉េខាងជើង និងអ៊ីរ៉ង់ ឲ្យបោះបង់កម្មវិធីអាវុធ ហើយដើរតាម ផ្លូវ ដែលអាមេរិក បានកំណត់ទុកប្រធានាធិបតីដូណាល់ត្រាំបានប្រកាសថា «ខ្ញុំចង់ធ្វើឲ្យកូរ៉េខាងជើង និងអ៊ីរ៉ង់ ក្លាយទៅជាប្រទេសអ្នកមាន ក្នុងតំបន់» ប្រសិនបើប្រទេសទាំងពីរព្រមចុះកិច្ចព្រមព្រៀងជាមួយទីក្រុងវ៉ាស៊ីនតោន ។
ចំពោះកូរ៉េខាងជើង ដែលជាប្រទេសមានសក្កានុពលសេដ្ឋកិច្ចយ៉ាងធំធេង ដោយនៅជិតខាងកូរ៉េខាងជើង គឺជា ប្រទេសដែលមានសេដ្ឋកិច្ចរីកចំរើន ដូចជាកូរ៉េខាងត្បូងនិងចិនជាដើម ។ ជាមួយគ្នានេះដែរ កូរ៉េខាងជើងមានធុនធានធម្មជាតិសម្បូរបែកអាចធ្វើឲ្យសេដ្ឋកិច្ចប្រទេសនេះរីកចំរើនបានយ៉ាងឆាប់រហ័ស ក្រោយពេលរួចទណ្ឌកម្មពីអាមេរិកនោះ ។
លោកត្រាំបញ្ជាក់កាលពីថ្ងៃ ទី២៦ ខែសីហា បានបញ្ជាក់ថា អ៊ីរ៉ង់ និងកូរ៉េខាងជើង មានសក្កានុពលយ៉ាងធំ ក្នុងការអភិវឌ្ឍន៍សេដ្ឋជាតិ។ ទន្ទឹមនឹងនោះ លោកត្រាំបង្ហាញក្តីសង្ឃឹមថា លោកនឹង ជួយដល់ប្រទេសទាំងពីរ កាន់តែរីកចំរើន ប្រសិនបើយលព្រមចុះកិច្ចព្រមព្រៀង ជាមួយទីក្រុងវ៉ាស៊ីនតោន។
លោកត្រាំបញ្ជាក់ថា « ខ្ញុំមើលឃើញថា អ៊ីរ៉ង់មានកម្លាំងសេដ្ឋកិច្ចខ្លាំង ហើយខ្ញុំចង់ឲ្យអ៊ីរ៉ង់ក្លាយទៅជាប្រទេសអ្នកមាន។ អ៊ីរ៉ង់អាចនឹងទទួលបានជោគជ័យគ្រប់យ៉ាងប្រសិនបើ ព្រមដើរតាមអាមេរិកនោះ។
នៅពេលនេះដែរ ប្រធានាធិបតីអាមេរិក លោក ដូណាល់ ត្រាំ បាននិយាយថាលោកអាចនឹងជួបជាមួយ ប្រធានាធិបតីអ៊ីរ៉ង់ លោក ហាសាន់ រូហានី នៅពេលវេលាសក្តិសមណាមួយ ដើម្បីដោះស្រាយ បញ្ហាបច្ចុប្បន្ន រវាងប្រទេសទាំង២។
លោក ដូណាល់ ត្រាំ បង្ហើបពីបំណងចង់ជួបលោក រូហានី កំឡុងពេលធ្វើសន្និសិទសារព័ត៌មាន រួមគ្នាជាមួយប្រធានាធិបតីបារាំង លោក អែមម៉ានុយអែល ម៉ាក្រុង នាឱកាសនៃកិច្ចប្រជុំកំពូល G7 នៅថ្ងៃចន្ទសប្ដាហ៍នេះ ក្នុងទីក្រុង BIARRITZ ប្រទេសបារាំង។ ប្រធានាធិបតីអាមេរិករូបនេះ បានបញ្ជាក់យ៉ាងខ្លីដូច្នេះថា «បើសិនជាពេលវេលាសក្តិសម ខ្ញុំអាចនឹងជួបជាមួយគាត់ (លោក រូហានី)» ។
គួរបញ្ជាក់ថា លោក ដូណាល់ ត្រាំ និងលោក ហាសាន់ រូហានី នឹងត្រូវចូលរួមកិច្ចប្រជុំ មហាសន្និបាតអង្គការ សហប្រជាជាតិ ក្នុងទីក្រុងញូយ៉ក សហរដ្ឋអាមេរិក នៅចុងខែកញ្ញា ខាងមុខនេះ ជាទីដែលមេដឹកនាំទាំង២ ត្រូវបានគេរំពឹងថាអាចនឹងជួបពិភាក្សាការងារជាមួយគ្នា។
ចំណែកសំណុំរឿងវិបត្តិនុយក្លេអ៊ែរអ៊ីរ៉ង់ ជារឿងក្តៅជាងគេ ដែលហាក់គ្របដណ្តប់វេទិកាកំពូលG7នេះ។ មុននឹងបិទបញ្ចប់ជំនួបកំពូល លោកប្រធានាធិបតីអាមេរិកនិងបារាំងបានធ្វើសន្និសីទកាសែតរួមគ្នា។ ប្រមុខរដ្ឋទាំងពីរនិយាយក្នុងសំឡេងតែមួយ ប្រាប់ទៅកាន់អ្នកសារព័ត៌មានថា ក្រុមប្រទេសG៧ មិនចង់ឃើញអ៊ឺរ៉ង់មាននុយក្លេអ៊ែរនោះទេ ។
លោក ម៉ាក្រុង បញ្ជាក់ថា គេត្រូវចរចាឱ្យមានកិច្ចព្រមព្រៀងមួយដែលប្រាកដជាក់ច្បាស់ថា អ៊ីរ៉ង់ មិនបន្តឆ្លៀតចម្រាញ់ជាតិអ៊ុយរ៉ានីញ៉ូម ហើយផ្ទុយមកវិញ គេត្រូវរកវិធីស្តារសេដ្ឋកិច្ចនិងទីផ្សារបស់អ៊ីរ៉ង់ឡើងវិញ។
លោក ដូណាល់ ត្រាំ ថ្លែងដែរថា បើកាលៈទេសៈល្អ លោកអាចនឹងយល់ព្រមទទួលជួបប្រធានាធិបតីអ៊ីរ៉ង់ ។ ចំណែកបារាំងក៏បន្ទរទៀតថា បារាំងសង្ឃឹមថានឹងជួយបង្កើតកាលៈទេសៈល្អនោះ ដើម្បីឱ្យភាគីទាំងពីរបានជួបចរចាគ្នា ៕
