នៅក្នុងដំណើទស្សនកិច្ច ទៅកាន់ប្រទេសចិន របស់ប្រធានាធិបតីហ្វីលីពីន ក៏បានលើកពីបញ្ហាសាលក្រមតុលាការយុត្តិធម៌ ទីក្រុងឡាអេ ប៉ុន្តែ ប្រធានាធិបតីចិនច្រានចោលតែម្តង។ នៅក្នុងដំណើរទស្សនកិច្ចទៅកាន់ទីក្រុងប៉េកាំង នោះ ប្រធានាធិបតីហ្វីលីពីន លោក Rodrigo Duterte បានជួបពិភាក្សាជាមួយប្រធានាធិបតីចិនលោក ស៊ី ជីនពីង ហើយលោក បានលើកពីសាលក្រមតុលាការយុត្តិធម៌អន្តរជាតិ ស្តីពីដែនសមុទ្រចិនខាងត្បូង តែត្រូវប្រធានាធិបតីចិន ស៊ី ជីនពីង ច្រានចោលភ្លាមៗ។
សារព័ត៌មាន ABS-CBN បានដកស្រង់សម្តីរបស់លោក Salvador Panelo អ្នកនាំពាក្យប្រធានាធិបតីហ្វីលីពីន ដោយបានបញ្ជាក់ថា «ប្រធានាធិបតី Rodrigo Duterte បានលើកយកបញ្ហាវិវាទសមុទ្រចិនខាងត្បូង ក៏ដូចជា ការសម្រេចរបស់តុលាការយុត្តិធម៌អន្តរជាតិ ស្តីពីវិវាទដែនសមុទ្រ។ ប៉ុន្ដែភ្លាមៗនោះ ប្រធានាធិបតីចិន ស៊ី ជីនពីង បានច្រានចោល ដោយប្រកាសថាចិន មិនទទួលស្គាល់សាលក្រមរបស់តុលាការយុត្តិធម៌នោះឡើយ ហើយសាលក្រមនោះក៏មិនអាចផ្លាស់ប្តូរគោលជំហររបស់ចិនបានដែរ» ។
កាលពីឆ្នាំ២០១៦ តុលាការយុត្តិធម៌អន្តរជាតិ បានកាត់ក្តីឲ្យហ្វីលីពីន ជាអ្នកឈ្នះនៅក្នុងវិវាទដែនសមុទ្រ ប៉ុន្តែចិនប្រកាសមិនទទួលស្គាល់នោះឡើយ។ ប៉ុន្តែមេដឹកនាំទាំងពីរ បានព្រមព្រៀងគ្នាថា បើទោះជានៅមានវិវាទជាច្រើន តែមិនអនុញ្ញាតឲ្យវិវាទទាំងនោះ ធ្វើឲ្យប៉ះពាល់ដល់ទំនាក់ទំនងមិត្តភាព ចិន និង ហ្វីលីពីននោះឡើយ។
ប្រធានាធិបតីហ្វីលីពីន លោក Rodrigo Duterte បានទៅបំពេញទស្សនកិច្ច អស់រយៈពេល៥ថ្ងៃទៅកាន់ប្រទេសចិន ដើម្បីពិភាក្សាលើបញ្ហាសំខាន់ៗ ក្នុងទំនាក់ទំនង នៃប្រទេសទាំងពីរ។ ជាមួយគ្នានេះដែរ មេដឹក នាំទាំងពីរ ក៏បានលើកឡើង អំពីគម្រោងសហការគ្នា ស្រាវជ្រាវ និងខួងយករ៉ែប្រេងកាត នៅសមុទ្រចិនខាងត្បូង ៕
