ខេត្តកណ្តាល: បុរសម្នាក់ព្រោះតែខឹងនិងស្ត្រីជាប្រពន្ធមិនព្រមទៅទិញថ្នាំឈឺធ្មេញអោយលេប ក៏ស្ទុះទៅទាញបន្ទះក្តារកុងផ្លាកកេវាយដួលទៅលើដី នៅតែមិនអស់ចិត្តស្ទុះទៅទាត់ធាក់បន្ថែមរហូតសន្លប់ស្តូកស្តឹង បង្កអោយមានការភ្ញាក់ផ្អើលកាលពីវេលាម៉ោង៦ និង៣០នាទីព្រឹក ថ្ងៃទី២ ខែកញ្ញា ឆ្នាំ២០១៩ ត្រង់ចំណុចបន្ទប់ជួល ស្ថិតក្នុងភូមិខ្ពបវែង សង្កាត់កំពង់សំណាញ់ ក្រុងតាខ្មៅ ខេត្តកណ្តាល ។ ក្រោយពីមានហេតុការណ៏កើតឡើងស្ត្រីរងគ្រោះត្រូវបានសាច់ញាតិបញ្ជូនទៅសង្រ្គោះនៅមន្ទីរពេទ្យ រីឯជនដៃដល់ជាប្តីត្រូវបានសមត្ថកិច្ចនគរបាលក្រុងតាខ្មៅឃាត់ខ្លួនធ្វើការសាកសួរ ដើម្បីកសាងសំណុំរឿងចាត់ការតាមច្បាប់។
មន្ត្រីនគរបាលក្រុងតាខ្មៅបានអោយដឹងថា ស្ត្រីរងគ្រោះឈ្មោះ អ៊ុន សុភី ភេទស្រី ជនជាតិខ្មែរ អាយុ៣២ឆ្នាំ មុខរបរ លក់ដំឡូង។ ចំណែកឯជនសង្ស័យឈ្មោះ សឿង ផាន់ន្នី ភេទប្រុស អាយុ៣៧ឆ្នាំ ជនជាតិខ្មែរ មុខរបរ លក់ដំឡូង ។
ទាំង២នាក់នេះជាប្រីប្រពន្ធនិងគ្នា បច្ចុប្បន្នស្នាក់នៅបន្ទប់ជួលក្នុងភូមិ.សង្កាត់កើតហេតុខាងលើ។
ប្រភពដដែលបានបន្តថា នៅមុនពេលកើតហេតុជនសង្ស័យជាប្តីបាននិយាយប្រាប់ប្រពន្ធថាខ្លួនឈឺធ្មេញ និងបានដេញអោយប្រពន្ធទៅទិញថ្នាំអោយលេប តែស្ត្រីជាប្រពន្ធមិនព្រមទៅ រហូតធ្វើអោយជនសង្ស័យកើតក្តីខឹងសម្បា ស្ទុះទាញបន្ទះក្តាកុងផ្លាកកេវាយទៅលើស្ត្រីរងគ្រោះបណ្តាលអោយដួលទៅលើដី តែជនសង្ស័យនៅមិនអស់ចិត្តបានស្ទុះទៅទាត់ធាក់បន្ថែមរហូតស្ត្រីរងគ្រោះសន្លប់ស្តូកស្តឹងនៅហ្នឹងកន្លែងកើតហេតុតែម្តង៕ ស្អាងជ័យ
...
